ਮੈਲਬੌਰਨ : ਆਸਟ੍ਰੇਲੀਆਈ ਕ੍ਰਿਕਟ ਵਿੱਚ ਭੂਚਾਲ ਲਿਆਉਣ ਵਾਲੇ 2018 ਦੇ 'ਸੈਂਡਪੇਪਰ ਗੇਟ' ਗੇਂਦ ਨਾਲ ਛੇੜਛਾੜ ਵਿਵਾਦ ਵਿੱਚ ਸ਼ਾਮਲ ਰਹੇ ਕੈਮਰਨ ਬੈਨਕ੍ਰਾਫ਼ਟ ਨੇ ਇੱਕ ਵੱਡਾ ਦਾਅਵਾ ਕੀਤਾ ਹੈ। ਬੈਨਕ੍ਰਾਫ਼ਟ ਅਨੁਸਾਰ ਇਸ ਸਾਜ਼ਿਸ਼ ਬਾਰੇ ਪੂਰੀ ਆਸਟ੍ਰੇਲੀਆਈ ਟੀਮ ਨੂੰ ਪਤਾ ਸੀ, ਪਰ ਅੰਤ ਵਿੱਚ ਕੇਵਲ ਤਿੰਨ ਖਿਡਾਰੀਆਂ ਨੂੰ ਹੀ ਬਲੀ ਦਾ ਬੱਕਰਾ ਬਣਾਇਆ ਗਿਆ। ਇਸ ਘਟਨਾ ਤੋਂ ਬਾਅਦ ਕ੍ਰਿਕਟ ਆਸਟ੍ਰੇਲੀਆ ਨੇ ਬੈਨਕ੍ਰਾਫ਼ਟ, ਸਟੀਵ ਸਮਿਥ ਅਤੇ ਡੇਵਿਡ ਵਾਰਨਰ 'ਤੇ ਪਾਬੰਦੀ ਲਗਾ ਦਿੱਤੀ ਸੀ। ਇਸ ਵਿਵਾਦ ਤੋਂ ਬਾਅਦ ਬੈਨਕ੍ਰਾਫ਼ਟ ਦੁਬਾਰਾ ਕਦੇ ਆਸਟ੍ਰੇਲੀਆ ਲਈ ਨਹੀਂ ਖੇਡ ਸਕੇ, ਜਦਕਿ ਸਮਿਥ ਅਤੇ ਵਾਰਨਰ ਨੇ ਟੀਮ ਵਿੱਚ ਵਾਪਸੀ ਕੀਤੀ।
ਸਾਬਕਾ ਬੱਲੇਬਾਜ਼ ਉਸਮਾਨ ਖ਼ਵਾਜਾ ਨੇ ਵੀ ਆਪਣੀ ਹਾਲ ਹੀ ਵਿੱਚ ਪ੍ਰਕਾਸ਼ਿਤ ਕਿਤਾਬ ਵਿੱਚ ਖ਼ੁਲਾਸਾ ਕੀਤਾ ਸੀ ਕਿ ਪੂਰੀ ਟੀਮ ਨੂੰ ਇਸ ਸਾਜ਼ਿਸ਼ ਦੀ ਜਾਣਕਾਰੀ ਸੀ, ਜਿਸ ਦਾ ਸਮਰਥਨ ਡੇਵਿਡ ਵਾਰਨਰ ਅਤੇ 12ਵੇਂ ਖਿਡਾਰੀ ਚੈਡ ਸੇਅਰਸ ਨੇ ਵੀ ਕੀਤਾ। ਬੈਨਕ੍ਰਾਫ਼ਟ ਨੇ 'ਕ੍ਰਿਕਇਨਫੋ' ਵਿੱਚ ਲਿਖੇ ਇੱਕ ਲੇਖ ਵਿੱਚ ਦੱਸਿਆ ਕਿ ਉਹ ਅੱਠ ਸਾਲਾਂ ਤੱਕ ਇਸ ਬੋਝ ਨੂੰ ਚੁੱਕਦੇ ਰਹੇ। ਉਨ੍ਹਾਂ ਕਬੂਲ ਕੀਤਾ ਕਿ 2018 ਵਿੱਚ ਕ੍ਰਿਕਟ ਆਸਟ੍ਰੇਲੀਆ ਦੀ ਜਾਂਚ ਦੌਰਾਨ ਉਨ੍ਹਾਂ ਨੇ ਪੂਰੀ ਅਤੇ ਸੱਚੀ ਜਾਣਕਾਰੀ ਨਹੀਂ ਦਿੱਤੀ ਸੀ।
ਬੈਨਕ੍ਰਾਫ਼ਟ ਨੇ ਦੱਸਿਆ ਕਿ ਮੌਜੂਦਾ ਕਪਤਾਨ ਪੈਟ ਕਮਿਨਸ ਦੀ ਪ੍ਰੈੱਸ ਕਾਨਫ਼ਰੰਸ ਤੋਂ ਬਾਅਦ ਉਨ੍ਹਾਂ ਨੂੰ ਬਹੁਤ ਗੁੱਸਾ ਆਇਆ ਅਤੇ ਵਿਸ਼ਵਾਸਘਾਤ ਮਹਿਸੂਸ ਹੋਇਆ, ਜਿਸ ਕਰਕੇ ਉਨ੍ਹਾਂ ਨੂੰ ਸੱਚ ਬੋਲਣ ਲਈ ਮਜਬੂਰ ਹੋਣਾ ਪਿਆ। ਦੂਜੇ ਪਾਸੇ, ਕਪਤਾਨ ਪੈਟ ਕਮਿਨਸ ਨੇ ਇਨ੍ਹਾਂ ਦਾਅਵਿਆਂ ਨੂੰ ਪੂਰੀ ਤਰ੍ਹਾਂ ਬਕਵਾਸ ਕਰਾਰ ਦਿੱਤਾ ਹੈ।