ਹਾਰਟ ਅਟੈਕ ਅਤੇ ਸਟਰੋਕ ਮਰੀਜ਼ਾਂ ਲਈ ਰਾਹਤ, ਹੁਣ ਨੇੜੇ ਹੀ ਮਿਲੇਗਾ ਐਡਵਾਂਸ ਇਲਾਜ

ਚੰਡੀਗੜ੍ਹ : ਮਨੀਮਾਜਰਾ ਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਦੇ ਲੋਕਾਂ ਲਈ ਵੱਡੀ ਰਾਹਤ ਵਾਲੀ ਖ਼ਬਰ ਹੈ। ਪ੍ਰਸ਼ਾਸਨ ਨੇ ਮਨੀਮਾਜਰਾ ਹਸਪਤਾਲ ’ਚ 50 ਬਿਸਤਰਿਆਂ ਵਾਲੇ ਆਧੁਨਿਕ ਕ੍ਰਿਟੀਕਲ ਕੇਅਰ ਬਲਾਕ ਦੀ ਉਸਾਰੀ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਕਰੀਬ 82 ਕਰੋੜ ਰੁਪਏ ਦੀ ਲਾਗਤ ਨਾਲ ਤਿਆਰ ਹੋਣ ਵਾਲਾ ਇਹ ਪ੍ਰਾਜੈਕਟ ਗੰਭੀਰ ਮਰੀਜ਼ਾਂ ਲਈ ਜੀਵਨਦਾਨ ਸਾਬਤ ਹੋ ਸਕਦਾ ਹੈ, ਕਿਉਂਕਿ ਹਾਰਟ ਅਟੈਕ, ਸਟਰੋਕ, ਸੜਕ ਹਾਦਸਿਆਂ ਤੇ ਸਾਹ ਨਾਲ ਜੁੜੀਆਂ ਗੰਭੀਰ ਬੀਮਾਰੀਆਂ ਦੇ ਮਾਮਲਿਆਂ ’ਚ ਇਲਾਜ ਦੇ ਸ਼ੁਰੂਆਤੀ ਮਿੰਟ ਸਭ ਤੋਂ ਅਹਿਮ ਮੰਨੇ ਜਾਂਦੇ ਹਨ। ਫਿਲਹਾਲ ਮਨੀਮਾਜਰਾ, ਮੌਲੀਜਾਗਰਾਂ, ਕਿਸ਼ਨਗੜ੍ਹ, ਆਈ. ਟੀ. ਪਾਰਕ, ਰਾਏਪੁਰ ਕਲਾਂ ਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਦੇ ਗੰਭੀਰ ਮਰੀਜ਼ਾਂ ਨੂੰ ਪੀ. ਜੀ. ਆਈ., ਜੀ. ਐੱਮ. ਸੀ. ਐੱਚ.-32 ਜਾਂ ਜੀ. ਐੱਮ. ਐੱਸ. ਐੱਚ.-16 ਵਰਗੇ ਵੱਡੇ ਹਸਪਤਾਲਾਂ ’ਚ ਲਿਜਾਣਾ ਪੈਂਦਾ ਹੈ।

ਕਈ ਵਾਰ ਹਸਪਤਾਲ ਤੱਕ ਪਹੁੰਚਣ ’ਚ ਹੋਣ ਵਾਲੀ ਦੇਰੀ ਮਰੀਜ਼ ਦੀ ਜਾਨ ਲਈ ਖ਼ਤਰਾ ਬਣ ਜਾਂਦੀ ਹੈ। ਨਵੇਂ ਕ੍ਰਿਟੀਕਲ ਕੇਅਰ ਬਲਾਕ ਸ਼ੁਰੂ ਹੋਣ ਨਾਲ ਮਰੀਜ਼ਾਂ ਨੂੰ ਆਪਣੇ ਖੇਤਰ ਨੇੜੇ ਹੀ ਉੱਚ ਪੱਧਰੀ ਇਲਾਜ ਮਿਲ ਸਕੇਗਾ। ਪ੍ਰਸ਼ਾਸਨ ਦੀ ਪ੍ਰਾਜੈਕਟ ਅਪ੍ਰੇਜ਼ਲ ਐਂਡ ਅਪਰੂਵਲ ਕਮੇਟੀ ਵੱਲੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੁਣ ਇਸ ਮਹੱਤਵਪੂਰਨ ਪ੍ਰਾਜੈਕਟ ਦੀ ਉਸਾਰੀ ਦਾ ਰਸਤਾ ਸਾਫ਼ ਹੋ ਗਿਆ ਹੈ। ਇਹ ਸਹੂਲਤ ਪ੍ਰਧਾਨ ਮੰਤਰੀ ਆਯੁਸ਼ਮਾਨ ਭਾਰਤ ਸਿਹਤ ਬੁਨਿਆਦੀ ਢਾਂਚਾ ਮਿਸ਼ਨ ਤਹਿਤ ਵਿਕਸਤ ਕੀਤੀ ਜਾਵੇਗੀ। ਕੇਂਦਰ ਸਰਕਾਰ ਵੱਲੋਂ ਇਸ ਲਈ 16.63 ਕਰੋੜ ਰੁਪਏ ਦੀ ਮਦਦ ਵੀ ਮਨਜ਼ੂਰ ਕੀਤੀ ਜਾ ਚੁੱਕੀ ਹੈ। ਇਹ ਪ੍ਰਾਜੈਕਟ ਮਨੀਮਾਜਰਾ ਸਥਿਤ ਉਪ-ਜ਼ਿਲ੍ਹਾ ਹਸਪਤਾਲ ਦੀ 2.88 ਏਕੜ ਜ਼ਮੀਨ ’ਤੇ ਤਿਆਰ ਕੀਤਾ ਜਾਵੇਗਾ।

ਗੰਭੀਰ ਮਰੀਜ਼ਾਂ ਲਈ ਬਣੇਗਾ ਜੀਵਨ ਰੱਖਿਅਕ
ਨਵੇਂ ਕ੍ਰਿਟੀਕਲ ਕੇਅਰ ਬਲਾਕ ਵਿੱਚ ਆਈ. ਸੀ. ਯੂ., ਹਾਈ ਡਿਪੈਂਡੈਂਸੀ ਯੂਨਿਟ (ਐੱਚ. ਡੀ. ਯੂ.), ਐਡਵਾਂਸ ਮਾਨੀਟਰਿੰਗ ਸਿਸਟਮ, ਵੈਂਟੀਲੇਟਰ ਸਹੂਲਤਾਂ ਤੇ ਗੰਭੀਰ ਮਰੀਜ਼ਾਂ ਲਈ ਵਿਸ਼ੇਸ਼ ਬਿਸਤਰੇ ਉਪਲੱਬਧ ਹੋਣਗੇ। ਇਸ ਨਾਲ ਦਿਲ ਦੇ ਦੌਰੇ, ਸਟਰੋਕ, ਗੰਭੀਰ ਇਨਫੈਕਸ਼ਨ, ਸਾਹ ਦੀਆਂ ਬੀਮਾਰੀਆਂ ਤੇ ਸੜਕ ਹਾਦਸਿਆਂ ਦੇ ਪੀੜਤਾਂ ਨੂੰ ਸਮੇਂ ਸਿਰ ਇਲਾਜ ਮਿਲ ਸਕੇਗਾ। ਇਸ ਨਾਲ ਪੀ.ਜੀ.ਆਈ., ਜੀ.ਐੱਮ.ਸੀ.ਐੱਚ.-32 ਤੇ ਜੀ.ਐੱਮ.ਐੱਸ.ਐੱਚ.-16 ’ਚ ਮਰੀਜ਼ਾਂ ਦੀ ਭੀੜ ਘਟੇਗੀ।

ਤੇਜ਼ੀ ਨਾਲ ਵੱਧ ਰਹੀ ਹੈ ਲੋੜ
ਪਿਛਲੇ ਕੁੱਝ ਸਾਲਾਂ ਦੌਰਾਨ ਮਨੀਮਾਜਰਾ, ਆਈ. ਟੀ. ਪਾਰਕ ਤੇ ਇਸ ਨਾਲ ਲੱਗਦੇ ਖੇਤਰਾਂ ਦੀ ਆਬਾਦੀ ’ਚ ਤੇਜ਼ੀ ਨਾਲ ਵਾਧਾ ਹੋਇਆ ਹੈ। ਇਸ ਤੋਂ ਇਲਾਵਾ ਪੰਚਕੂਲਾ ਤੇ ਆਲੇ-ਦੁਆਲੇ ਦੇ ਕਈ ਇਲਾਕਿਆਂ ਦੇ ਲੋਕ ਵੀ ਇਲਾਜ ਲਈ ਮਨੀਮਾਜਰਾ ਹਸਪਤਾਲ ’ਤੇ ਨਿਰਭਰ ਹਨ। ਅਜਿਹੇ ’ਚ ਆਧੁਨਿਕ ਕ੍ਰਿਟੀਕਲ ਕੇਅਰ ਸਹੂਲਤ ਦੀ ਲੋੜ ਲੰਬੇ ਸਮੇਂ ਤੋਂ ਮਹਿਸੂਸ ਕੀਤੀ ਜਾ ਰਹੀ ਸੀ। ਸਿਹਤ ਮਾਹਰਾਂ ਦਾ ਮੰਨਣਾ ਹੈ ਕਿ ਪ੍ਰਾਜੈਕਟ ਸਿਰਫ਼ ਨਵੀਂ ਇਮਾਰਤ ਨਹੀਂ, ਸਗੋਂ ਚੰਡੀਗੜ੍ਹ ਦੇ ਪੂਰਬੀ ਹਿੱਸੇ ਲਈ ਵੱਡਾ ਸਿਹਤ ਕੇਂਦਰ ਸਾਬਤ ਹੋਵੇਗਾ, ਜੋ ਐਮਰਜੈਂਸੀ ਹਾਲਾਤਾਂ ’ਚ ਹਜ਼ਾਰਾਂ ਲੋਕਾਂ ਲਈ ਜੀਵਨ ਰੇਖਾ ਬਣ ਸਕਦਾ ਹੈ।