ਬਾਗਪਤ : ਉੱਤਰ ਪ੍ਰਦੇਸ਼ ਦੇ ਬਾਗਪਤ ਜ਼ਿਲ੍ਹੇ 'ਚ ਦੀਵਾਲੀ 'ਤੇ ਪਟਾਕੇ ਚਲਾਉਣ ਨੂੰ ਲੈ ਕੇ ਹੋਏ ਵਿਵਾਦ ਮਗਰੋਂ ਛੁੱਟੀ 'ਤੇ ਘਰ ਆਏ ਰਾਸ਼ਟਰਪਤੀ ਦੇ ਬਾਡੀਗਾਰਡ ਦਲ 'ਚ ਤਾਇਨਾਤ ਇਕ ਜਵਾਨ ਨੂੰ ਗੋਲੀ ਮਾਰ ਦਿੱਤੀ ਗਈ। ਪੁਲਸ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਪੁਲਸ ਦੇ ਅਨੁਸਾਰ, ਗੋਲੀ ਜਵਾਨ ਸੌਰਭ ਤੋਮਰ (26) ਦੇ ਕੰਨ ਦੇ ਬਿਲਕੁਲ ਪਿੱਛੇ ਲੱਗੀ। ਉਸ ਦੇ ਸਿਰ 'ਚ ਫਸੀ ਗੋਲੀ ਕੱਢਣ ਲਈ ਮੇਰਠ ਦੇ ਇਕ ਨਿੱਜੀ ਹਸਪਤਾਲ 'ਚ ਆਪਰੇਸ਼ਨ ਕੀਤਾ ਗਿਆ। ਫਿਲਹਾਲ ਉਹ ਹਸਪਤਾਲ ਦੇ ਇੰਟੈਂਸਿਵ ਕੇਅਰ ਯੂਨਿਟ (ਆਈਸੀਯੂ) 'ਚ ਦਾਖ਼ਲ ਹੈ ਅਤੇ ਉਸ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।
ਪੁਲਸ ਨੇ ਦੱਸਿਆ ਕਿ ਇਹ ਘਟਨਾ ਰਾਮਾਲਾ ਥਾਣਾ ਖੇਤਰ ਦੇ ਅਧੀਨ ਆਉਂਦੇ ਗੋਪਾਲਪੁਰ ਖਡਾਨਾ ਪਿੰਡ 'ਚ ਵਾਪਰੀ। ਪਿੰਡ ਦਾ ਰਹਿਣ ਵਾਲਾ ਸੌਰਭ 2021 'ਚ ਭਰਤੀ ਹੋਇਆ ਸੀ ਅਤੇ ਫਿਲਹਾਲ ਉਸ ਦੀ ਤਾਇਨਾਤੀ ਰਾਸ਼ਟਰਪਤੀ ਭਵਨ 'ਚ ਹੈ। ਉਹ ਦੀਵਾਲੀ ਮਨਾਉਣ ਲਈ ਛੁੱਟੀ ਲੈ ਕੇ ਪਿੰਡ ਆਇਆ ਹੋਇਆ ਸੀ। ਐਤਵਾਰ ਰਾਤ ਸੌਰਭ ਆਪਣੇ ਭਰਾਵਾਂ ਵਿਨੀਤ ਅਤੇ ਮਿੰਟੂ ਨਾਲ ਆਪਣੇ ਘਰ ਦੇ ਬਾਹਰ ਪਟਾਕੇ ਚਲਾ ਰਿਹਾ ਸੀ। ਇਸੇ ਦੌਰਾਨ ਪਿੰਡ ਦੇ 2 ਲੋਕਾਂ ਧੀਰਜ ਅਤੇ ਉਸ ਦੇ ਭਰਾ ਮੋਨੂੰ ਉਰਫ਼ ਪ੍ਰਵੀਨ ਨਾਲ ਉਸ ਦਾ ਵਿਵਾਦ ਹੋ ਗਿਆ। ਵਿਵਾਦ ਵਧਣ 'ਤੇ ਧੀਰਜ ਨੇ ਦੇਸੀ ਪਿਸਤੌਲ ਨਾਲ ਗੋਲੀ ਚਲਾਈ। ਗੋਲੀ ਪਹਿਲਾਂ ਕੰਧ ਟਕਰਾਈ ਅਤੇ ਫਿਰ ਉੱਛਲ ਕੇ ਸੌਰਭ ਦੇ ਸਿਰ 'ਚ ਜਾ ਲੱਗੀ।
ਪਰਿਵਾਰ ਵਾਲੇ ਸੌਰਭ ਨੂੰ ਬੜੌਤ ਦੇ ਕਮਿਊਨਿਟੀ ਹੈਲਥ ਸੈਂਟਰ ਲੈ ਗਿਆ, ਜਿੱਥੋਂ ਉਸ ਨੂੰ ਮੇਰਠ ਮੈਡੀਕਲ ਕਾਲਜ ਰੈਫਰ ਕਰ ਦਿੱਤਾ ਗਿਆ। ਹਾਲਾਂਕਿ, ਪਰਿਵਾਰ ਉਸ ਨੂੰ ਮੇਰਠ ਦੇ ਇਕ ਨਿੱਜੀ ਹਸਪਤਾਲ ਲੈ ਗਿਆ, ਜਿੱਥੇ ਆਪਰੇਸ਼ਨ ਕਰ ਕੇ ਉਸ ਦੇ ਸਿਰ 'ਚ ਫਸੀ ਗੋਲੀ ਕੱਢ ਦਿੱਤੀ ਗਈ। ਸਥਾਨਕ ਥਾਣਾ ਇੰਚਾਰਜ ਨੇ ਦੱਸਿਆ,"ਸੌਰਭ ਦੇ ਪਿਤਾ ਦੀ ਲਿਖਤੀ ਸ਼ਿਕਾਇਤ ਦੇ ਆਧਾਰ 'ਤੇ, ਧੀਰਜ ਅਤੇ ਮੋਨੂੰ ਵਿਰੁੱਧ ਐੱਫਆਈਆਰ ਦਰਜ ਕੀਤੀ ਗਈ ਹੈ। ਦੋਵਾਂ ਨੂੰ ਗ੍ਰਿਫ਼ਤਾਰ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।" ਰਾਸ਼ਟਰਪਤੀ ਦਾ ਬਾਡੀਗਾਰਡ ਦਲ ਭਾਰਤੀ ਫੌਜ ਦੀ ਸਭ ਤੋਂ ਪੁਰਾਣੀ ਅਤੇ ਸਭ ਤੋਂ ਸੀਨੀਅਰ ਘੋੜਸਵਾਰ ਰੈਜੀਮੈਂਟ ਹੈ। ਇਸ ਦੀ ਤਾਇਨਾਤੀ ਨਵੀਂ ਦਿੱਲੀ ਸਥਿਤ ਰਾਸ਼ਟਰਪਤੀ ਭਵਨ 'ਚ ਹੈ।