ਸੁਥਾਰ ਦਾ ਕਾਊਂਟੀ ਕ੍ਰਿਕਟ ਵਿੱਚ ਸ਼ਾਨਦਾਰ ਆਗਾਜ਼, ਵਾਰਵਿਕਸ਼ਾਇਰ ਵਲੋਂ ਝਟਕੀਆਂ ਦੋ ਵਿਕਟਾਂ

ਭਾਰਤ ਲਈ ਯਾਦਗਾਰੀ ਟੈਸਟ ਡੈਬਿਊ ਕਰਨ ਵਾਲੇ ਖੱਬੇ ਹੱਥ ਦੇ ਸਪਿਨਰ ਮਾਨਵ ਸੁਥਾਰ ਨੇ ਯਾਰਕਸ਼ਾਇਰ ਵਿਰੁੱਧ ਕਾਊਂਟੀ ਚੈਂਪੀਅਨਸ਼ਿਪ ਡਿਵੀਜ਼ਨ ਵਨ ਵਿੱਚ ਵਾਰਵਿਕਸ਼ਾਇਰ ਲਈ ਆਪਣੇ ਡੈਬਿਊ ਮੈਚ ਦੇ ਪਹਿਲੇ ਦਿਨ ਦੋ ਵਿਕਟਾਂ ਲਈਆਂ। ਇਸ ਹਫ਼ਤੇ ਅਫਗਾਨਿਸਤਾਨ ਵਿਰੁੱਧ ਇੱਕੋ ਇੱਕ ਟੈਸਟ ਵਿੱਚ ਸੱਤ ਵਿਕਟਾਂ ਨਾਲ ਪਲੇਅਰ ਆਫ਼ ਦ ਮੈਚ ਚੁਣੇ ਗਏ ਸੁਥਾਰ ਨੇ ਸ਼ੁੱਕਰਵਾਰ ਨੂੰ ਯੌਰਕਸ਼ਾਇਰ ਵਿਰੁੱਧ 76 ਦੌੜਾਂ ਦੇ ਕੇ ਦੋ ਵਿਕਟਾਂ ਲਈਆਂ। ਯੌਰਕਸ਼ਾਇਰ ਨੇ ਖੇਡ ਦੇ ਅੰਤ ਤੱਕ ਛੇ ਵਿਕਟਾਂ 'ਤੇ 398 ਦੌੜਾਂ ਬਣਾਈਆਂ ਸਨ। 23 ਸਾਲਾ ਗੇਂਦਬਾਜ਼ ਨੇ ਯੌਰਕਸ਼ਾਇਰ ਦੇ ਤੀਜੇ ਕ੍ਰਮ ਦੇ ਬੱਲੇਬਾਜ਼ ਸੈਮ ਵਾਈਟਮੈਨ ਦੇ ਰੂਪ ਵਿੱਚ ਆਪਣੇ ਕਾਊਂਟੀ ਕਰੀਅਰ ਦੀ ਪਹਿਲੀ ਵਿਕਟ ਲਈ। ਵਾਈਟਮੈਨ 55 ਦੌੜਾਂ ਬਣਾ ਕੇ ਆਊਟ ਹੋ ਗਿਆ। ਸੁਥਾਰ ਨੇ ਦਿਨ ਦੇ ਆਖਰੀ ਪਲਾਂ ਵਿੱਚ ਓਪਨਰ ਵਿਲੀਅਮ ਲਕਸਟਨ ਨੂੰ ਐਲਬੀਡਬਲਯੂ ਆਊਟ ਕਰਕੇ ਯੌਰਕਸ਼ਾਇਰ ਨੂੰ ਵੱਡਾ ਝਟਕਾ ਦਿੱਤਾ। ਲਕਸਟਨ ਨੇ 261 ਗੇਂਦਾਂ 'ਤੇ 167 ਦੌੜਾਂ ਦੀ ਮੈਰਾਥਨ ਪਾਰੀ ਖੇਡੀ। ਸੁਥਾਰ ਨੂੰ ਚੱਲ ਰਹੀ ਕਾਊਂਟੀ ਚੈਂਪੀਅਨਸ਼ਿਪ ਦੇ ਅਗਲੇ ਦੋ ਦੌਰਾਂ ਲਈ ਵਾਰਵਿਕਸ਼ਾਇਰ ਦੁਆਰਾ ਇਕਰਾਰ ਕੀਤਾ ਗਿਆ ਹੈ। ਉਸ ਦੇ ਅਗਲੇ ਹਫ਼ਤੇ ਟੌਂਟਨ ਵਿੱਚ ਸਮਰਸੈੱਟ ਖ਼ਿਲਾਫ਼ ਖੇਡਣ ਦੀ ਵੀ ਉਮੀਦ ਹੈ। 

ਰਾਜਸਥਾਨ ਦੇ ਇਸ ਸਪਿੰਨਰ ਨੇ ਟੈਸਟ ਕ੍ਰਿਕਟ ਵਿੱਚ ਆਪਣੇ ਪਹਿਲੇ ਓਵਰ ਵਿੱਚ ਇੱਕ ਵਿਕਟ ਵੀ ਲਈ। ਉਸਨੇ ਅਫਗਾਨਿਸਤਾਨ ਖ਼ਿਲਾਫ਼ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ, ਪਹਿਲੀ ਪਾਰੀ ਵਿੱਚ 33 ਦੌੜਾਂ ਦੇ ਕੇ ਛੇ ਵਿਕਟਾਂ ਅਤੇ ਦੂਜੀ ਪਾਰੀ ਵਿੱਚ 29 ਦੌੜਾਂ ਦੇ ਕੇ ਇੱਕ ਵਿਕਟ ਲਈ। ਭਾਰਤ ਨੇ ਉਹ ਮੈਚ ਇੱਕ ਪਾਰੀ ਅਤੇ 300 ਦੌੜਾਂ ਨਾਲ ਜਿੱਤਿਆ। ਇਸ ਦੌਰਾਨ, ਭਾਰਤ ਦੇ ਤਜਰਬੇਕਾਰ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਜੈਦੇਵ ਉਨਾਦਕਟ ਨੇ ਵੀ ਸਸੇਕਸ ਲਈ ਆਪਣੀ ਪ੍ਰਭਾਵਸ਼ਾਲੀ ਫਾਰਮ ਜਾਰੀ ਰੱਖੀ। ਉਸਨੇ ਗਲੈਮੋਰਗਨ ਖ਼ਿਲਾਫ਼ 14.2 ਓਵਰਾਂ ਵਿੱਚ 29 ਦੌੜਾਂ ਦੇ ਕੇ ਚਾਰ ਵਿਕਟਾਂ ਲਈਆਂ। ਉਨਾਦਕਟ ਦੀ ਘਾਤਕ ਗੇਂਦਬਾਜ਼ੀ ਨੇ ਗਲੈਮੋਰਗਨ ਨੂੰ 51.2 ਓਵਰਾਂ ਵਿੱਚ 155 ਦੌੜਾਂ ਤੱਕ ਸੀਮਤ ਕਰ ਦਿੱਤਾ। ਉਨਾਦਕਟ 2024 ਵਿੱਚ ਸਸੇਕਸ ਨਾਲ ਦੋ ਸਾਲਾਂ ਦੇ ਇਕਰਾਰਨਾਮੇ 'ਤੇ ਦਸਤਖਤ ਕਰਨ ਤੋਂ ਬਾਅਦ ਕਾਉਂਟੀ ਟੀਮ ਲਈ ਖੇਡਣ ਲਈ ਵਾਪਸ ਆਇਆ ਹੈ।