ਹੈਦਰਾਬਾਦ- ਭਾਰਤੀ ਬੱਲੇਬਾਜ਼ ਸੰਜੂ ਸੈਮਸਨ ਦਾ ਮੰਨਣਾ ਹੈ ਕਿ ਵੈਸਟਇੰਡੀਜ਼ ਵਿਰੁੱਧ ਚੌਥੇ ਟੀ-20 ਮੈਚ ਵਿੱਚ ਤਿਲਕ ਵਰਮਾ ਦਾ ਆਊਟ ਹੋਣਾ ਹੀ ਹਾਰ ਦਾ ਮੁੱਖ 'ਟ੍ਰਨਿੰਗ ਪੁਆਇੰਟ' ਸੀ। 248 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਦਿਆਂ ਭਾਰਤ ਨੇ 130 ਦੌੜਾਂ 'ਤੇ 5 ਵਿਕਟਾਂ ਗੁਆ ਦਿੱਤੀਆਂ ਸਨ, ਪਰ ਤਿਲਕ ਵਰਮਾ ਅਤੇ ਨੀਤੀਸ਼ ਕੁਮਾਰ ਰੈੱਡੀ ਨੇ ਟੀਮ ਦੀਆਂ ਉਮੀਦਾਂ ਬਰਕਰਾਰ ਰੱਖੀਆਂ। ਜਦੋਂ 19 ਗੇਂਦਾਂ ਵਿੱਚ 48 ਦੌੜਾਂ ਦੀ ਲੋੜ ਸੀ, ਤਾਂ ਰੋਮਾਰੀਓ ਸ਼ੈਫਰਡ ਨੇ ਤਿਲਕ ਨੂੰ ਆਊਟ ਕਰ ਕੇ ਮੈਚ ਵੈਸਟਇੰਡੀਜ਼ ਦੇ ਪੱਖ ਵਿੱਚ ਮੋੜ ਦਿੱਤਾ।
ਮੈਚ ਵਿੱਚ 23 ਗੇਂਦਾਂ 'ਚ 56 ਦੌੜਾਂ ਬਣਾਉਣ ਵਾਲੇ ਸੈਮਸਨ ਨੇ ਕਿਹਾ ਕਿ ਤਿਲਕ ਦੇ ਕ੍ਰੀਜ਼ 'ਤੇ ਰਹਿੰਦਿਆਂ ਭਾਰਤ ਮੈਚ ਜਿੱਤਣ ਦੀ ਮਜ਼ਬੂਤ ਸਥਿਤੀ ਵਿੱਚ ਸੀ। ਜਸਪ੍ਰੀਤ ਬੁਮਰਾਹ ਦੀ ਘਾਟ ਬਾਰੇ ਬੋਲਦਿਆਂ ਉਨ੍ਹਾਂ ਕਿਹਾ ਕਿ ਬੁਮਰਾਹ ਦਾ ਕੋਈ ਵਿਕਲਪ ਨਹੀਂ ਹੈ, ਪਰ ਅਰਸ਼ਦੀਪ ਸਿੰਘ ਅਤੇ ਪ੍ਰਿੰਸ ਯਾਦਵ ਵਰਗੇ ਯੁਵਾ ਗੇਂਦਬਾਜ਼ਾਂ ਵਿੱਚ ਬਹੁਤ ਪ੍ਰਤਿਭਾ ਹੈ। ਉਨ੍ਹਾਂ ਦੱਸਿਆ ਕਿ ਆਖਰੀ ਓਵਰ ਵਿੱਚ ਸ਼ਮਾਰ ਜੋਸੇਫ਼ ਦੀ ਬਾਊਂਸਰ ਲੱਗਣ ਨਾਲ ਜ਼ਖਮੀ ਹੋਏ ਅਰਸ਼ਦੀਪ ਦੇ ਮੋਢੇ 'ਤੇ ਬਰਫ਼ ਲਗਾਈ ਜਾ ਰਹੀ ਹੈ ਅਤੇ ਉਮੀਦ ਹੈ ਕਿ ਉਹ ਸ਼ਨੀਵਾਰ ਨੂੰ ਬੈਂਗਲੁਰੂ ਵਿਖੇ ਹੋਣ ਵਾਲੇ ਆਖਰੀ ਮੈਚ ਤੱਕ ਫਿੱਟ ਹੋ ਜਾਣਗੇ।