ਵਿਸ਼ਵ ਕੱਪ ਫਾਈਨਲ ’ਚ ਹਾਰ ਦੇ ‘ਦਰਦ’ ਤੋਂ ਉੱਭਰਨ ’ਚ ਸਮਾਂ ਲੱਗੇਗਾ : ਮੈਸੀ

ਲਿਓਨਿਲ ਮੈਸੀ ਨੇ ਵਿਸ਼ਵ ਕੱਪ ਫਾਈਨਲ ’ਚ ਅਰਜਨਟੀਨਾ ਦੀ ਸਪੇਨ ਹੱਥੋਂ ਹਾਰ ਤੋਂ ਬਾਅਦ ਆਪਣਾ ‘ਦਰਦ’ ਬਿਆਨ ਕਰਦਿਆਂ ਕਿਹਾ ਕਿ ਸਿਰਫ ਸਮਾਂ ਹੀ ਟੀਮ ਨੂੰ ਨਤੀਜੇ ਤੋਂ ਉੱਭਰਨ ’ਚ ਮਦਦ ਕਰੇਗਾ। ਨਿਊ ਜਰਸੀ ’ਚ ਫੇਰਾਨ ਟੋਰੇਸ ਦੇ ਵਾਧੂ ਸਮੇਂ ਦੇ ਗੋਲ ਨੇ ਐਤਵਾਰ ਨੂੰ ਅਰਜਨਟੀਨਾ ਦੀ ਲਗਾਤਾਰ ਖਿਤਾਬ ਜਿੱਤਣ ਦੀਆਂ ਉਮੀਦਾਂ ਨੂੰ ਖਤਮ ਕਰ ਦਿੱਤਾ ਤੇ ਮੈਸੀ ਨੂੰ ਦੂਜੇ ਵਿਸ਼ਵ ਕੱਪ ਖਿਤਾਬ ਦੇ ਨਾਲ ਆਪਣੇ ਸ਼ਾਨਦਾਰ ਕਰੀਅਰ ਦਾ ਅੰਤ ਕਰਨ ਦਾ ਮੌਕਾ ਨਹੀਂ ਦਿੱਤਾ। 39 ਸਾਲਾ ਖਿਡਾਰੀ ਦੇ 2030 ’ਚ ਅਗਲੇ ਵਿਸ਼ਵ ਕੱਪ ’ਚ ਖੇਡਣ ਦੀ ਉਮੀਦ ਨਹੀਂ ਹੈ, ਹਾਲਾਂਕਿ ਉਸ ਨੇ ਅਜੇ ਤੱਕ ਸੰਨਿਆਸ ਦੀ ਯੋਜਨਾ ਦਾ ਐਲਾਨ ਨਹੀਂ ਕੀਤਾ ਹੈ।

ਮੈਸੀ ਨੇ ਸੋਸ਼ਲ ਮੀਡੀਆ ’ਤੇ ਲਿਖਿਆ, ‘‘ਦਰਦ ਬਹੁਤ ਹੈ ਤੇ ਇਸ ਜ਼ਖ਼ਮ ਨੂੰ ਠੀਕ ਹੋਣ ’ਚ ਸਮਾਂ ਲੱਗੇਗਾ ਪਰ ਮੈਂ ਸਾਰੀਆਂ ਚੰਗੀਆਂ ਚੀਜ਼ਾਂ ’ਤੇ ਵੀ ਕਾਇਮ ਹਾਂ। ਅਸੀਂ ਆਪਣਾ ਸਭ ਕੁਝ ਦੇ ਕੇ ਮੈਚ ਪਲਟ ਦਿੱਤਾ । ਉਹ ਪਲ ਜੋ ਸਾਡੀਆਂ ਯਾਦਾਂ ’ਚ ਹਮੇਸ਼ਾ ਬਣੇ ਰਹਿਣਗੇ ਤੇ ਪੂਰੇ ਦੇਸ਼ ਦਾ ਸਮਰਥਨ, ਜਿਸ ਨੇ ਇਸ ਟੀਮ ਦੀ ਸਖਤ ਮਿਹਨਤ ਤੇ ਕੋਸ਼ਿਸ਼ ਦੀ ਮਿਲ ਕੇ ਹੌਸਲਾਅਫਜ਼ਾਈ ਕੀਤੀ।’’

ਬਾਰਸੀਲੋਨਾ ਤੇ ਪੈਰਿਸ ਸੈਂਟ-ਜਰਮਨ ਦੇ ਸਾਬਕਾ ਸਟਾਰ ਨੇ ਆਪਣੇ ਸਾਥੀਆਂ ਦੀ ਸ਼ਲਾਘਾ ਕੀਤੀ ਤੇ ਟੀਮ ਦੇ ਪ੍ਰਦਰਸ਼ਨ ’ਤੇ ਮਾਣ ਪ੍ਰਗਟਾਇਆ। ਉਸ ਨੇ ਕਿਹਾ,‘‘ਅਜੇ ਸਾਡੀ ਉਪਲੱਬਧੀ ਦੀ ਪੂਰੀ ਸ਼ਲਾਘਾ ਕਰਨੀ ਔਖੀ ਹੈ ਪਰ ਇਹ ਟੀਮ ਲਗਾਤਾਰ ਦੋ ਵਿਸ਼ਵ ਕੱਪ ਫਾਈਨਲਾਂ ’ਚ ਪਹੁੰਚੀ। ਹਰ ਕਿਸੇ ਨੂੰ ਵਧਾਈ ਤੇ ਸੰਦੇਸ਼ ਲਈ ਤਹਿ ਦਿਲੋਂ ਧੰਨਵਾਦ। ਇਕ ਵਾਰ ਫਿਰ, ਅਸੀਂ ਇਕ ਦੇਸ਼ ਦੇ ਰੂਪ ’ਚ ਇਕਜੁੱਟ ਹੋਣ ਤੇ ਇਕੱਠੇ ਖੜ੍ਹੇ ਹੋਣ ’ਚ ਕਾਮਯਾਬ ਰਹੇ, ਅਰਜਨਟੀਨੀ ਹੋਣ ਦੇ ਮਾਣ ਹੈ।’’

ਉਸ ਨੇ ਕਿਹਾ, ‘‘ਮੈਂ ਸਪੇਨ ਨੂੰ ਚੈਂਪੀਅਨਸ਼ਿਪ ਜਿੱਤਣ ’ਤੇ ਵੀ ਵਧਾਈ ਦੇਣਾ ਚਾਹੁੰਦਾ ਹਾਂ।’’