ਬਾਰਸੀਲੋਨਾ : ਰੇਸਿੰਗ ਦੀ ਦੁਨੀਆ ਦੇ ਧਾਕੜ ਭਾਰਤੀ ਖਿਡਾਰੀ ਕੁਸ਼ ਮੈਨੀ (Kush Maini) ਨੇ ਆਪਣੀਆਂ ਉਪਲੱਧੀਆਂ ਦੀ ਸੂਚੀ 'ਚ ਇਕ ਨਵਾਂ ਮੀਲ ਦਾ ਪੱਥਰ ਕਾਇਮ ਕੀਤਾ ਹੈ। ਕੁਸ਼ ਮੈਨੀ (Kush Maini) ਨੇ ਸਰਕਟ ਡੇ ਬਾਰਸੀਲੋਨਾ-ਕੈਟਾਲੁਨੀਆ ਵਿਖੇ ਇਤਿਹਾਸ ਰਚਦੇ ਹੋਏ 2026 ਫਾਰਮੂਲਾ 2 ਸੀਜ਼ਨ ਦੀ ਪਹਿਲੀ ਜਿੱਤ ਦਰਜ ਕੀਤੀ ਹੈ। ਏਆਰਟੀ ਗ੍ਰੈਂਡ ਪ੍ਰਿਕਸ (ART Grand Prix) ਟੀਮ ਵੱਲੋਂ ਖੇਡਦਿਆਂ ਮੈਣੀ ਨੇ ਬਾਰਸੀਲੋਨਾ ਸਪ੍ਰਿੰਟ ਰੇਸ ਵਿੱਚ ਸ਼ੁਰੂ ਤੋਂ ਲੈ ਕੇ ਅੰਤ ਤੱਕ ਆਪਣਾ ਦਬਦਬਾ ਬਣਾਈ ਰੱਖਿਆ ਅਤੇ ਵਿਰੋਧੀਆਂ ਨੂੰ ਕੋਈ ਮੌਕਾ ਨਹੀਂ ਦਿੱਤਾ।
ਗਰਿੱਡ 'ਤੇ ਦੂਜੇ ਸਥਾਨ ਤੋਂ ਰੇਸ ਦੀ ਸ਼ੁਰੂਆਤ ਕਰਦੇ ਹੋਏ, ਕੁਸ਼ ਮੈਨੀ ਨੇ ਬਹੁਤ ਹੀ ਸ਼ਾਨਦਾਰ ਰਫ਼ਤਾਰ ਫੜੀ। ਉਨ੍ਹਾਂ ਨੇ ਪਹਿਲੇ ਹੀ ਮੋੜ 'ਤੇ ਪੋਲ ਪੁਜ਼ੀਸ਼ਨ ਤੋਂ ਸ਼ੁਰੂਆਤ ਕਰਨ ਵਾਲੇ ਨੋਏਲ ਲਿਓਨ ਨੂੰ ਪਿੱਛੇ ਛੱਡ ਦਿੱਤਾ ਅਤੇ ਰੇਸ ਦੀ ਕਮਾਨ ਸੰਭਾਲ ਲਈ। ਪੂਰੀ ਰੇਸ ਦੌਰਾਨ ਉਨ੍ਹਾਂ ਨੇ ਆਪਣੇ ਟਾਇਰਾਂ ਦਾ ਬਹੁਤ ਵਧੀਆ ਪ੍ਰਬੰਧਨ ਕੀਤਾ ਅਤੇ ਲਗਾਤਾਰ ਆਪਣੀ ਬੜ੍ਹਤ ਵਧਾਉਂਦੇ ਗਏ।
ਰੇਸ ਦੇ ਅੰਤ ਤੱਕ ਕੁਸ਼ ਮੈਨੀ ਨੇ ਦੂਜੇ ਸਥਾਨ 'ਤੇ ਰਹੇ ਗੈਬਰੀਅਲ ਮਿਨੀ ਤੋਂ 7.269 ਸਕਿੰਟਾਂ ਦੀ ਮਜ਼ਬੂਤ ਲੀਡ ਹਾਸਲ ਕਰ ਲਈ ਸੀ। ਨਿਕੋਲਾ ਸੋਲੋਵ ਤੀਜੇ ਸਥਾਨ 'ਤੇ ਰਹੇ, ਜਦੋਂ ਕਿ ਨੋਏਲ ਲਿਓਨ ਚੌਥੇ ਸਥਾਨ 'ਤੇ ਖ਼ਿਸਕ ਗਏ। ਇਹ ਕੁਸ਼ ਮੈਣੀ ਦੇ ਫਾਰਮੂਲਾ 2 ਕਰੀਅਰ ਦੀ ਤੀਜੀ ਜਿੱਤ ਹੈ, ਜੋ ਉਨ੍ਹਾਂ ਦੀ ਚੈਂਪੀਅਨਸ਼ਿਪ ਮੁਹਿੰਮ ਲਈ ਇੱਕ ਵੱਡਾ ਹੁਲਾਰਾ ਸਾਬਤ ਹੋਵੇਗੀ।
ਇਸ ਸ਼ਾਨਦਾਰ ਜਿੱਤ ਦੀ ਬਦੌਲਤ ਕੁਸ਼ ਮੈਣੀ ਫਾਰਮੂਲਾ 2 ਡਰਾਈਵਰਜ਼ ਚੈਂਪੀਅਨਸ਼ਿਪ ਵਿੱਚ 10ਵੇਂ ਤੋਂ 8ਵੇਂ ਸਥਾਨ 'ਤੇ ਪਹੁੰਚ ਗਏ ਹਨ। ਰੇਸ ਤੋਂ ਬਾਅਦ ਮੈਨੀ ਨੇ ਆਪਣੀ ਟੀਮ ਦੀ ਸਖ਼ਤ ਮਿਹਨਤ ਦੀ ਤਾਰੀਫ਼ ਕੀਤੀ ਅਤੇ ਇਹ ਸਫ਼ਲਤਾ ਉਨ੍ਹਾਂ ਨੂੰ ਸਮਰਪਿਤ ਕੀਤੀ।
2026 ਸੀਜ਼ਨ ਦੀ ਪਹਿਲੀ ਅਤੇ ਕਰੀਅਰ ਦੀ ਤੀਜੀ F2 ਜਿੱਤ। ਮੈਨੀ ਅਲਪਾਈਨ ਫਾਰਮੂਲਾ 1 ਟੀਮ ਲਈ ਰਿਜ਼ਰਵ ਅਤੇ ਟੈਸਟ ਡਰਾਈਵਰ ਵਜੋਂ ਵੀ ਕੰਮ ਕਰ ਰਹੇ ਹਨ। ਉਹ ਮਹਿੰਦਰਾ ਰੇਸਿੰਗ ਦੇ ਫਾਰਮੂਲਾ E ਰਿਜ਼ਰਵ ਡਰਾਈਵਰ ਵਜੋਂ ਵੀ ਜੁੜੇ ਹੋਏ ਹਨ।