IPL 2026 ਵਿੱਚ ਰਾਜਸਥਾਨ ਰਾਇਲਜ਼ (RR) ਅਤੇ ਮੁੰਬਈ ਇੰਡੀਅਨਜ਼ (MI) ਦੇ ਮੁਕਾਬਲੇ ਦੌਰਾਨ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਨੇ ਆਪਣੇ ਬੱਲੇ ਨਾਲ ਅਜਿਹਾ ਤੂਫ਼ਾਨ ਲਿਆਂਦਾ ਕਿ ਦੁਨੀਆ ਦੇ ਸਭ ਤੋਂ ਖ਼ਤਰਨਾਕ ਗੇਂਦਬਾਜ਼ਾਂ ਵਿੱਚੋਂ ਇੱਕ ਜਸਪ੍ਰੀਤ ਬੁਮਰਾਹ ਵੀ ਹੈਰਾਨ ਰਹਿ ਗਏ। ਵੈਭਵ ਨੇ ਬੁਮਰਾਹ ਵਰਗੇ ਦਿੱਗਜ ਗੇਂਦਬਾਜ਼ ਦੇ ਖ਼ਿਲਾਫ਼ ਨਿਡਰ ਹੋ ਕੇ ਬੱਲੇਬਾਜ਼ੀ ਕੀਤੀ ਅਤੇ ਸਾਰਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ।
ਬੁਮਰਾਹ ਦੇ ਖ਼ਿਲਾਫ਼ ਬੇਖ਼ੌਫ਼ ਬੱਲੇਬਾਜ਼ੀ
ਸੂਰਿਆਵੰਸ਼ੀ ਨੇ ਬੁਮਰਾਹ ਦਾ ਪਹਿਲੀ ਵਾਰ ਸਾਹਮਣਾ ਕਰਦਿਆਂ ਹੀ ਉਨ੍ਹਾਂ ਦੇ ਇੱਕੋ ਓਵਰ ਵਿੱਚ ਦੋ ਗਗਨਚੁੰਬੀ ਛੱਕੇ ਜੜ ਦਿੱਤੇ। ਉਨ੍ਹਾਂ ਦੀ ਇਸ ਆਕਰਾਮਕ ਬੱਲੇਬਾਜ਼ੀ ਨੇ ਨਾ ਸਿਰਫ਼ ਮੈਚ ਦਾ ਰੁਖ ਬਦਲ ਦਿੱਤਾ, ਸਗੋਂ ਰਾਜਸਥਾਨ ਨੂੰ ਬੇਹੱਦ ਮਜ਼ਬੂਤ ਸਥਿਤੀ ਵਿੱਚ ਪਹੁੰਚਾ ਦਿੱਤਾ। ਇੱਥੋਂ ਤੱਕ ਕਿ ਭਾਰਤ ਦੇ ਸਾਬਕਾ ਦਿੱਗਜ ਅਨਿਲ ਕੁੰਬਲੇ ਨੇ ਵੀ ਨੋਟ ਕੀਤਾ ਕਿ ਵੈਭਵ ਨੇ ਬੁਮਰਾਹ ਵਰਗੇ ਚੋਟੀ ਦੇ ਗੇਂਦਬਾਜ਼ ਨੂੰ 'ਸਲੋਅਰ ਬਾਲ' (Slower Ball) ਸੁੱਟਣ ਲਈ ਮਜ਼ਬੂਰ ਕਰ ਦਿੱਤਾ।
ਡੇਲ ਸਟੇਨ ਨੇ ਬੰਨ੍ਹੇ ਤਾਰੀਫ਼ਾਂ ਦੇ ਪੁਲ
ਦੁਨੀਆ ਦੇ ਮਹਾਨ ਤੇਜ਼ ਗੇਂਦਬਾਜ਼ ਰਹੇ ਡੇਲ ਸਟੇਨ ਨੇ ਵੀ ਵੈਭਵ ਦੀ ਇਸ ਪਾਰੀ ਦੀ ਸ਼ਲਾਘਾ ਕੀਤੀ ਹੈ। ਸਟੇਨ ਨੇ ਕਿਹਾ ਕਿ ਇਸ ਨੌਜਵਾਨ ਨੇ ਗੇਂਦਬਾਜ਼ਾਂ ਦੇ ਮਨ ਵਿੱਚ ਇਹ ਡਰ ਪੈਦਾ ਕਰ ਦਿੱਤਾ ਹੈ ਕਿ ਉਹ ਹਰ ਗੇਂਦ 'ਤੇ ਬਾਊਂਡਰੀ ਮਾਰ ਸਕਦਾ ਹੈ। ਉਨ੍ਹਾਂ ਮੁਤਾਬਕ ਬੁਮਰਾਹ ਵਰਗੇ ਗੇਂਦਬਾਜ਼ ਵੀ ਇਹ ਸੋਚਣ ਲਈ ਮਜ਼ਬੂਰ ਹੋ ਗਏ ਕਿ ਜੇਕਰ ਮਾਮੂਲੀ ਗਲਤੀ ਹੋਈ ਤਾਂ ਇਹ ਬੱਲੇਬਾਜ਼ ਛੱਕਾ ਮਾਰ ਦੇਵੇਗਾ
ਜਾਇਸਵਾਲ ਨਾਲ ਮਿਲ ਕੇ ਮਚਾਈ ਤਬਾਹੀ
ਵੈਭਵ ਸੂਰਿਆਵੰਸ਼ੀ ਅਤੇ ਯਸ਼ਸਵੀ ਜੈਸਵਾਲ ਨੇ ਮਿਲ ਕੇ ਪਹਿਲੀ ਵਿਕਟ ਲਈ 80 ਦੌੜਾਂ ਦੀ ਧਮਾਕੇਦਾਰ ਸਾਂਝੇਦਾਰੀ ਕੀਤੀ। ਜਾਇਸਵਾਲ ਨੇ ਵੀ ਸ਼ਾਨਦਾਰ ਖੇਡ ਦਿਖਾਉਂਦਿਆਂ ਮਹਿਜ਼ 32 ਗੇਂਦਾਂ ਵਿੱਚ ਨਾਬਾਦ 77 ਦੌੜਾਂ ਬਣਾਈਆਂ। ਇਸ ਬਿਹਤਰੀਨ ਸ਼ੁਰੂਆਤ ਦੇ ਸਿਰ 'ਤੇ ਰਾਜਸਥਾਨ ਰਾਇਲਜ਼ ਨੇ 11 ਓਵਰਾਂ ਵਿੱਚ 150/3 ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ।
ਮੁੰਬਈ ਦੀ ਲਗਾਤਾਰ ਦੂਜੀ ਹਾਰ
151 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਦਿਆਂ ਹਾਰਦਿਕ ਪੰਡਿਆ ਦੀ ਅਗਵਾਈ ਵਾਲੀ ਮੁੰਬਈ ਇੰਡੀਅਨਜ਼ ਦੀ ਟੀਮ ਪੂਰੀ ਤਰ੍ਹਾਂ ਫਲਾਪ ਰਹੀ। ਮੁੰਬਈ ਦੇ ਬੱਲੇਬਾਜ਼ ਕ੍ਰੀਜ਼ 'ਤੇ ਟਿਕਣ ਵਿੱਚ ਨਾਕਾਮ ਰਹੇ ਅਤੇ ਟੀਮ 11 ਓਵਰਾਂ ਵਿੱਚ 123/9 ਹੀ ਬਣਾ ਸਕੀ। ਨਤੀਜੇ ਵਜੋਂ ਮੁੰਬਈ ਨੂੰ 27 ਦੌੜਾਂ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਰਾਜਸਥਾਨ ਰਾਇਲਜ਼ ਇਸ ਸੀਜ਼ਨ ਵਿੱਚ ਅਜੇ ਤੱਕ ਅਜੇਤੂ ਹੈ ਅਤੇ ਅੰਕ ਸੂਚੀ ਵਿੱਚ ਸਿਖਰ 'ਤੇ ਬਣੀ ਹੋਈ ਹੈ।