ਮੁੰਬਈ : ਆਈ.ਪੀ.ਐੱਲ. 2026 ਵਿੱਚ ਪੰਜਾਬ ਕਿੰਗਜ਼ (PBKS) ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੂੰ ਦੇਖਦੇ ਹੋਏ ਬਾਲੀਵੁੱਡ ਸੁਪਰਸਟਾਰ ਸਲਮਾਨ ਖਾਨ ਨੇ ਆਪਣੀ ਦੋਸਤ ਅਤੇ ਅਦਾਕਾਰਾ ਪ੍ਰਿਟੀ ਜ਼ਿੰਟਾ ਨੂੰ ਵਧਾਈ ਦਿੱਤੀ ਹੈ। ਸਲਮਾਨ ਖਾਨ ਨੇ ਆਪਣੇ ਅਧਿਕਾਰਤ ਐਕਸ (ਪਹਿਲਾਂ ਟਵਿੱਟਰ) ਹੈਂਡਲ 'ਤੇ ਟੀਮ ਦੀ ਤਾਰੀਫ਼ ਕਰਦਿਆਂ ਇੱਕ ਟਵੀਟ ਸਾਂਝਾ ਕੀਤਾ ਹੈ।
ਸ਼੍ਰੇਅਸ ਅਈਅਰ ਦੀ ਕਪਤਾਨੀ ਵਿੱਚ ਚਮਕੀ ਪੰਜਾਬ ਦੀ ਟੀਮ
ਪ੍ਰਿਟੀ ਜ਼ਿੰਟਾ ਦੀ ਟੀਮ ਪੰਜਾਬ ਕਿੰਗਜ਼ ਇਸ ਸੀਜ਼ਨ ਵਿੱਚ ਬਿਹਤਰੀਨ ਫਾਰਮ ਵਿੱਚ ਨਜ਼ਰ ਆ ਰਹੀ ਹੈ। ਸ਼੍ਰੇਅਸ ਅਈਅਰ ਦੀ ਕਪਤਾਨੀ ਹੇਠ ਟੀਮ ਨੇ ਹੁਣ ਤੱਕ ਕੁੱਲ 4 ਮੈਚ ਖੇਡੇ ਹਨ, ਜਿਨ੍ਹਾਂ ਵਿੱਚੋਂ 3 ਵਿੱਚ ਜਿੱਤ ਹਾਸਲ ਕੀਤੀ ਹੈ, ਜਦਕਿ ਇੱਕ ਮੁਕਾਬਲਾ ਬਿਨਾਂ ਕਿਸੇ ਨਤੀਜੇ (No Result) ਦੇ ਰਿਹਾ ਹੈ। ਟੀਮ ਦੇ ਇਸ ਅਜੇਤੂ ਸਫ਼ਰ ਤੋਂ ਖੁਸ਼ ਹੋ ਕੇ ਸਲਮਾਨ ਨੇ ਲਿਖਿਆ, "ਸ਼ਾਬਾਸ਼ ਜ਼ਿੰਟਾ, ਵਧਾਈ ਹੋਵੇ ਜ਼ਿੰਟਾ, ਟੀਮ ਵਧੀਆ ਖੇਡ ਰਹੀ ਹੈ..."।
12 ਸਾਲ ਪੁਰਾਣੀ ਯਾਦ ਹੋਈ ਤਾਜ਼ਾ
ਸਲਮਾਨ ਖਾਨ ਦਾ ਇਹ ਟਵੀਟ ਸਾਹਮਣੇ ਆਉਂਦੇ ਹੀ ਪ੍ਰਸ਼ੰਸਕਾਂ ਨੂੰ ਉਨ੍ਹਾਂ ਦਾ 2014 ਦਾ 12 ਸਾਲ ਪੁਰਾਣਾ ਟਵੀਟ ਯਾਦ ਆ ਗਿਆ। ਉਸ ਸਮੇਂ ਸਲਮਾਨ ਨੇ ਪ੍ਰਿਟੀ ਦੀ ਟੀਮ ਬਾਰੇ ਸਵਾਲ ਕਰਦਿਆਂ ਲਿਖਿਆ ਸੀ, "ਕੀ ਪ੍ਰਿਟੀ ਜ਼ਿੰਟਾ ਦੀ ਟੀਮ ਜਿੱਤ ਗਈ?"। ਹੁਣ ਨੈਟੀਜ਼ਨਜ਼ ਇਨ੍ਹਾਂ ਦੋਵਾਂ ਟਵੀਟਾਂ ਨੂੰ ਜੋੜ ਕੇ ਮਜ਼ੇਦਾਰ ਪ੍ਰਤੀਕਿਰਿਆਵਾਂ ਦੇ ਰਹੇ ਹਨ। ਇੱਕ ਯੂਜ਼ਰ ਨੇ ਲਿਖਿਆ, "12 ਸਾਲ ਬਾਅਦ ਸੀਕਵਲ ਰਿਲੀਜ਼ ਹੋਇਆ, ਟਾਈਗਰ ਜ਼ਿੰਟਾ ਹੈ", ਜਦਕਿ ਦੂਜੇ ਨੇ ਕਿਹਾ ਕਿ ਜ਼ਿੰਟਾ ਲਈ ਸਲਮਾਨ ਦਾ ਪਿਆਰ ਹਰ ਦਿਨ ਬਰਕਰਾਰ ਹੈ।
ਸਲਮਾਨ ਅਤੇ ਪ੍ਰੀਤੀ ਦਾ ਫਿਲਮੀ ਸਫ਼ਰ
ਦੱਸ ਦੇਈਏ ਕਿ ਸਲਮਾਨ ਖਾਨ ਅਤੇ ਪ੍ਰਿਟੀ ਜ਼ਿੰਟਾ ਵਿਚਕਾਰ ਬਹੁਤ ਗੂੜ੍ਹਾ ਰਿਸ਼ਤਾ ਹੈ ਅਤੇ ਉਨ੍ਹਾਂ ਨੇ ਕਈ ਫਿਲਮਾਂ ਜਿਵੇਂ ਕਿ 'ਚੋਰੀ ਚੋਰੀ ਚੁਪਕੇ ਚੁਪਕੇ' ਅਤੇ 'ਹਰ ਦਿਲ ਜੋ ਪਿਆਰ ਕਰੇਗਾ' ਵਿੱਚ ਇਕੱਠੇ ਕੰਮ ਕੀਤਾ ਹੈ। ਜੇਕਰ ਵਰਕ ਫਰੰਟ ਦੀ ਗੱਲ ਕਰੀਏ ਤਾਂ ਸਲਮਾਨ ਜਲਦ ਹੀ ਫਿਲਮ 'ਮਾਤ੍ਰਭੂਮੀ' ਵਿੱਚ ਨਜ਼ਰ ਆਉਣਗੇ, ਜਦਕਿ ਪ੍ਰਿਟੀ ਜ਼ਿੰਟਾ ਲੰਬੇ ਸਮੇਂ ਬਾਅਦ ਫਿਲਮ 'ਲਾਹੌਰ 1947' ਰਾਹੀਂ ਵੱਡੇ ਪਰਦੇ 'ਤੇ ਵਾਪਸੀ ਕਰ ਰਹੀ ਹੈ।