ਇੰਡੀਅਨ ਪ੍ਰੀਮੀਅਰ ਲੀਗ 2026 ਵਿੱਚ ਚੇਨਈ ਸੁਪਰ ਕਿੰਗਜ਼ (CSK) ਅਤੇ ਦਿੱਲੀ ਕੈਪੀਟਲਜ਼ (DC) ਵਿਚਾਲੇ ਖੇਡੇ ਗਏ ਮੁਕਾਬਲੇ ਤੋਂ ਬਾਅਦ ਦੋਵਾਂ ਟੀਮਾਂ ਦੇ ਖਿਡਾਰੀਆਂ 'ਤੇ ਅਨੁਸ਼ਾਸਨੀ ਕਾਰਵਾਈ ਕੀਤੀ ਗਈ ਹੈ। ਚੇਨਈ ਦੇ ਕਪਤਾਨ ਰੁਤੂਰਾਜ ਗਾਇਕਵਾੜ ਨੂੰ 'ਸਲੋ ਓਵਰ ਰੇਟ' ਲਈ ਸਜ਼ਾ ਮਿਲੀ ਹੈ, ਜਦਕਿ ਦਿੱਲੀ ਕੈਪੀਟਲਜ਼ ਦੇ ਖਿਡਾਰੀ ਨੀਤੀਸ਼ ਰਾਣਾ 'ਤੇ ਅੰਪਾਇਰ ਨਾਲ ਬਹਿਸ ਕਰਨ ਕਾਰਨ ਭਾਰੀ ਜੁਰਮਾਨਾ ਲਗਾਇਆ ਗਿਆ ਹੈ।
ਚੇਨਈ ਸੁਪਰ ਕਿੰਗਜ਼ ਨੂੰ ਆਈਪੀਐਲ ਕੋਡ ਆਫ ਕੰਡਕਟ ਦੇ ਆਰਟੀਕਲ 2.22 ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ, ਜੋ ਕਿ ਸਲੋ ਓਵਰ ਰੇਟ ਨਾਲ ਸਬੰਧਤ ਹੈ। ਇਸ ਸੀਜ਼ਨ ਵਿੱਚ ਚੇਨਈ ਦੀ ਇਹ ਪਹਿਲੀ ਗਲਤੀ ਹੈ, ਜਿਸ ਕਾਰਨ ਕਪਤਾਨ ਰੁਤੂਰਾਜ ਗਾਇਕਵਾੜ 'ਤੇ 12 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਗਾਇਕਵਾੜ ਇਸ ਸੀਜ਼ਨ ਵਿੱਚ ਸਲੋ ਓਵਰ ਰੇਟ ਲਈ ਸਜ਼ਾ ਭੁਗਤਣ ਵਾਲੇ ਤੀਜੇ ਕਪਤਾਨ ਬਣ ਗਏ ਹਨ। ਉਨ੍ਹਾਂ ਤੋਂ ਪਹਿਲਾਂ ਪੰਜਾਬ ਕਿੰਗਜ਼ ਦੇ ਕਪਤਾਨ ਸ਼੍ਰੇਅਸ ਅਈਅਰ (ਦੋ ਵਾਰ) ਅਤੇ ਗੁਜਰਾਤ ਟਾਈਟਨਸ ਦੇ ਕਪਤਾਨ ਸ਼ੁਭਮਨ ਗਿੱਲ 'ਤੇ ਵੀ ਇਹ ਜੁਰਮਾਨਾ ਲੱਗ ਚੁੱਕਾ ਹੈ।
ਦੂਜੇ ਪਾਸੇ, ਦਿੱਲੀ ਕੈਪੀਟਲਜ਼ ਦੇ ਖਿਡਾਰੀ ਨੀਤੀਸ਼ ਰਾਣਾ ਚੌਥੇ ਅੰਪਾਇਰ ਨਾਲ ਬਹਿਸ ਕਰਨ ਦੇ ਦੋਸ਼ੀ ਪਾਏ ਗਏ ਹਨ। ਨਿਯਮਾਂ ਦੀ ਉਲੰਘਣਾ ਕਾਰਨ ਉਨ੍ਹਾਂ ਦੀ ਮੈਚ ਫੀਸ ਵਿੱਚ 25 ਫੀਸਦੀ ਦੀ ਕਟੌਤੀ ਕੀਤੀ ਗਈ ਹੈ ਅਤੇ ਉਨ੍ਹਾਂ ਦੇ ਖਾਤੇ ਵਿੱਚ ਇੱਕ ਡੀਮੈਰਿਟ ਪੁਆਇੰਟ ਵੀ ਜੋੜਿਆ ਗਿਆ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਰਾਣਾ ਨੂੰ ਇਹ ਸਜ਼ਾ ਉਦੋਂ ਮਿਲੀ ਜਦੋਂ ਉਹ ਅਜੇ ਮੈਦਾਨ 'ਤੇ ਖੇਡਣ ਵੀ ਨਹੀਂ ਉਤਰੇ ਸਨ ਅਤੇ 'ਇਮਪੈਕਟ ਸਬ' ਵਜੋਂ ਬਾਹਰ ਬੈਠੇ ਸਨ।
ਇਹ ਘਟਨਾ ਮੈਚ ਦੇ 19ਵੇਂ ਓਵਰ ਦੌਰਾਨ ਵਾਪਰੀ। ਦਿੱਲੀ ਦੇ ਬੱਲੇਬਾਜ਼ ਟ੍ਰਿਸਟਨ ਸਟੱਬਸ ਆਪਣੇ ਗਲਵਜ਼ (ਦਸਤਾਨੇ) ਬਦਲਣਾ ਚਾਹੁੰਦੇ ਸਨ, ਪਰ ਚੌਥੇ ਅੰਪਾਇਰ ਨੇ ਉਨ੍ਹਾਂ ਨੂੰ ਅਜਿਹਾ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ। ਅਗਲੀ ਹੀ ਗੇਂਦ 'ਤੇ ਸਟੱਬਸ ਆਊਟ ਹੋ ਗਏ, ਜਿਸ ਕਾਰਨ ਨੀਤੀਸ਼ ਰਾਣਾ ਅਤੇ ਦਿੱਲੀ ਦੇ ਕੋਚ ਕਾਫੀ ਨਾਰਾਜ਼ ਹੋ ਗਏ ਅਤੇ ਉਨ੍ਹਾਂ ਨੇ ਬਾਊਂਡਰੀ 'ਤੇ ਖੜ੍ਹੇ ਅੰਪਾਇਰ ਨਾਲ ਤਿੱਖੀ ਬਹਿਸ ਕੀਤੀ। ਮੈਚ ਦੌਰਾਨ ਸਟੱਬਸ ਵੀ ਗੁੱਸੇ ਵਿੱਚ ਆਪਣਾ ਹੈਲਮੇਟ ਸੁੱਟਦੇ ਹੋਏ ਨਜ਼ਰ ਆਏ ਸਨ।