ਮੈਡ੍ਰਿਡ : ਸੱਟ ਤੋਂ ਉੱਭਰ ਕੇ ਵਾਪਸੀ ਕਰਨ ਵਾਲੇ ਹੈਰੀ ਕੇਨ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਬਦੌਲਤ ਬਾਇਰਨ ਮਿਊਨਿਖ ਨੇ ਚੈਂਪੀਅਨਜ਼ ਲੀਗ ਫੁੱਟਬਾਲ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਦੇ ਪਹਿਲੇ ਪੜਾਅ ’ਚ ਰੀਅਲ ਮੈਡ੍ਰਿਡ ਨੂੰ 2-1 ਨਾਲ ਹਰਾਇਆ। ਕੇਨ ਨੇ ਇਕ ਗੋਲ ਕੀਤਾ ਜਦਕਿ ਇਕ ਹੋਰ ਗੋਲ ਕਰਨ ’ਚ ਮਦਦ ਕੀਤੀ ਜਿਸ ਨਾਲ ਬਾਇਰਨ 2-0 ਨਾਲ ਅੱਗੇ ਹੋ ਗਿਆ। ਕਾਇਲਿਆਨ ਐਮਬਾਪੇ ਨੇ ਰੀਅਲ ਮੈਡ੍ਰਿਡ ਵੱਲੋਂ ਗੋਲ ਕਰਕੇ ਫਰਕ ਨੂੰ ਘੱਟ ਕੀਤਾ।
ਕੇਨ ਗਿੱਟੇ ਦੀ ਸੱਟ ਕਾਰਨ ਪਿਛਲੇ ਹਫਤੇ ਦੇ ਅੰਤ ’ਚ ਬੁੰਡੇਸਲੀਗਾ ਮੈਚ ’ਚ ਨਹੀਂ ਖੇਡ ਸਕਿਆ ਸੀ ਅਤੇ ਉਸ ਦਾ ਇਸ ਮੈਚ ’ਚ ਖੇਡਣਾ ਸ਼ੱਕੀ ਮੰਨਿਆ ਜਾ ਰਿਹਾ ਸੀ। ਉਸ ਨੇ ਹਾਲਾਂਕਿ ਨਾ ਸਿਰਫ ਮੈਚ ਖੇਡਿਆ ਸਗੋਂ ਸ਼ਾਨਦਾਰ ਪ੍ਰਦਰਸ਼ਨ ਵੀ ਕੀਤਾ। ਇਸ ਨਤੀਜੇ ਨਾਲ ਬਾਇਰਨ ਮਿਊਨਿਖ ਨੂੰ ਅਗਲੇ ਹਫਤੇ ਜਰਮਨੀ ’ਚ ਹੋਣ ਵਾਲੇ ਦੂਜੇ ਪੜਾਅ ਦੇ ਮੈਚ ਤੋਂ ਪਹਿਲਾਂ ਬੜ੍ਹਤ ਮਿਲ ਗਈ ਹੈ। ਉਹ 2023-24 ਤੋਂ ਬਾਅਦ ਪਹਿਲੀ ਵਾਰ ਚੈਂਪੀਅਨਜ਼ ਲੀਗ ਦੇ ਸੈਮੀਫਾਈਨਲ ’ਚ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਕੇਨ ਨੇ 41ਵੇਂ ਮਿੰਟ ’ਚ ਬਾਇਰਨ ਦੇ ਪਹਿਲੇ ਗੋਲ ’ਚ ਮਦਦ ਕੀਤੀ। ਉਸ ਨੇ ਸਰਜ ਗਨਾਬਰੀ ਨਾਲ ਮਿਲ ਕੇ ਮੂਵ ਬਣਾਇਆ ਅਤੇ ਫਿਰ ਲੂਈ ਡਿਆਜ਼ ਨੂੰ ਪੈਨਲਟੀ ਏਰੀਆ ਦੇ ਅੰਦਰ ਪਾਸ ਦਿੱਤਾ। ਕੋਲੰਬੀਆਈ ਫਾਰਵਰਡ ਨੇ ਰੀਅਲ ਮੈਡ੍ਰਿਡ ਦੇ ਗੋਲਕੀਪਰ ਐਂਰੀ ਲੂਨਿਨ ਨੂੰ ਝਕਾਨੀ ਦੇ ਕੇ ਗੋਲ ਕੀਤਾ। ਕੇਨ ਨੇ 46ਵੇਂ ਮਿੰਟ ’ਚ ਬਾਇਰਨ ਵੱਲੋਂ ਦੂਜਾ ਗੋਲ ਕੀਤਾ। ਇਹ ਚੈਂਪੀਅਨਜ਼ ਲੀਗ ’ਚ ਉਸ ਦਾ 11ਵਾਂ ਗੋਲ ਸੀ। ਐਮਬਾਪੇ ਨੇ ਇਸ ਤੋਂ ਬਾਅਦ 74ਵੇਂ ਮਿੰਟ ’ਚ ਰੀਅਲ ਮੈਡ੍ਰਿਡ ਵੱਲੋਂ ਗੋਲ ਕਰਕੇ ਉਸ ਦੀਆਂ ਉਮੀਦਾਂ ਨੂੰ ਜਿਊਂਦਾ ਰੱਖਿਆ। ਐਮਬਾਪੇ ਇਸ ਸੈਸ਼ਨ ’ਚ ਚੈਂਪੀਅਨਜ਼ ਲੀਗ ’ਚ 14 ਗੋਲ ਕਰਕੇ ਟਾਪ ’ਤੇ ਕਾਬਜ਼ ਹਨ। ਉਹ ਚੈਂਪੀਅਨਜ਼ ਲੀਗ ਦੇ ਇਕ ਸੈਸ਼ਨ ’ਚ ਸਭ ਤੋਂ ਵੱਧ ਗੋਲ ਕਰਨ ਦੇ ਰਿਕਾਰਡ ਤੋਂ 3 ਗੋਲ ਪਿੱਛੇ ਹਨ, ਜਿਹੜਾ ਕ੍ਰਿਸਟੀਆਨੋ ਰੋਨਾਲਡੋ ਨੇ 2013-14 ’ਚ ਰੀਅਲ ਮੈਡ੍ਰਿਡ ਲਈ ਬਣਾਇਆ ਸੀ।