ਸਾਬਕਾ ਭਾਰਤੀ ਕ੍ਰਿਕਟਰ ਹਰਭਜਨ ਸਿੰਘ ਨੇ ਚੇਨਈ ਸੁਪਰ ਕਿੰਗਜ਼ (CSK) ਦੇ ਨੌਜਵਾਨ ਬੱਲੇਬਾਜ਼ ਉਰਵਿਲ ਪਟੇਲ ਦੀ ਸ਼ਾਨਦਾਰ ਅਤੇ ਬੇਖੌਫ਼ ਬੱਲੇਬਾਜ਼ੀ ਦੀ ਰੱਜ ਕੇ ਸ਼ਲਾਘਾ ਕੀਤੀ ਹੈ। ਉਰਵਿਲ ਨੇ ਆਈਪੀਐਲ 2026 ਵਿੱਚ ਲਖਨਊ ਸੁਪਰ ਜਾਇੰਟਸ (LSG) ਵਿਰੁੱਧ ਖੇਡੇ ਗਏ ਅਹਿਮ ਮੁਕਾਬਲੇ ਵਿੱਚ ਚੇਨਈ ਦੀ ਜਿੱਤ ਵਿੱਚ ਬਹੁਤ ਵੱਡੀ ਭੂਮਿਕਾ ਨਿਭਾਈ ਹੈ।
ਰਣਨੀਤੀ ਅਤੇ ਬੱਲੇਬਾਜ਼ੀ ਸ਼ੈਲੀ ਤੋਂ ਪ੍ਰਭਾਵਿਤ ਹੋਏ
ਹਰਭਜਨ ਹਰਭਜਨ ਸਿੰਘ ਅਨੁਸਾਰ ਉਰਵਿਲ ਨੇ ਦਬਾਅ ਭਰੇ ਮੈਚ ਵਿੱਚ ਬਹੁਤ ਹੀ ਹੌਸਲੇ ਨਾਲ ਬੱਲੇਬਾਜ਼ੀ ਕੀਤੀ ਅਤੇ ਮੈਚ ਦਾ ਪਾਸਾ ਪਲਟ ਦਿੱਤਾ। ਉਨ੍ਹਾਂ ਨੇ ਜੀਓ ਸਟਾਰ 'ਤੇ ਗੱਲਬਾਤ ਕਰਦਿਆਂ ਕਿਹਾ ਕਿ ਉਰਵਿਲ ਸ਼ੁਰੂ ਤੋਂ ਹੀ ਆਪਣੀ ਖੇਡ ਯੋਜਨਾ ਨੂੰ ਲੈ ਕੇ ਸਪੱਸ਼ਟ ਸਨ ਅਤੇ ਉਨ੍ਹਾਂ ਨੇ ਮੁਸ਼ਕਲ ਪਿੱਚ 'ਤੇ ਵੀ 'ਕਾਊ ਕਾਰਨਰ' ਵਰਗੇ ਖਾਸ ਖੇਤਰਾਂ ਨੂੰ ਨਿਸ਼ਾਨਾ ਬਣਾ ਕੇ ਸ਼ਾਨਦਾਰ ਹਿੱਟਿੰਗ ਕੀਤੀ। ਹਰਭਜਨ ਨੇ ਭਵਿੱਖਬਾਣੀ ਕੀਤੀ ਕਿ ਉਰਵਿਲ ਪਟੇਲ ਨਿਸ਼ਚਿਤ ਤੌਰ 'ਤੇ ਭਵਿੱਖ ਦੇ ਸਟਾਰ ਖਿਡਾਰੀ ਹਨ।
ਮੈਚ ਦਾ ਮੋਮੈਂਟਮ ਬਦਲਿਆ
ਹਰਭਜਨ ਦਾ ਮੰਨਣਾ ਹੈ ਕਿ ਇੱਕ ਸਮੇਂ ਇਹ ਮੁਕਾਬਲਾ ਲਖਨਊ ਦੇ ਹੱਕ ਵਿੱਚ ਜਾਂਦਾ ਦਿਖਾਈ ਦੇ ਰਿਹਾ ਸੀ, ਪਰ ਉਰਵਿਲ ਦੀ ਹਮਲਾਵਰ ਪਾਰੀ ਨੇ ਸਾਰਾ ਮੋਮੈਂਟਮ ਚੇਨਈ ਸੁਪਰ ਕਿੰਗਜ਼ ਵੱਲ ਮੋੜ ਦਿੱਤਾ। ਉਨ੍ਹਾਂ ਨੇ ਵੱਡੇ ਸ਼ਾਟ ਲਗਾ ਕੇ ਵਿਰੋਧੀ ਗੇਂਦਬਾਜ਼ਾਂ 'ਤੇ ਇੰਨਾ ਦਬਾਅ ਬਣਾਇਆ ਕਿ CSK ਲਈ ਜਿੱਤ ਦਾ ਰਾਹ ਪੱਧਰਾ ਹੋ ਗਿਆ।
ਸ਼ਿਵਮ ਦੂਬੇ ਅਤੇ ਲਖਨਊ ਦੀਆਂ ਗਲਤੀਆਂ
ਮੈਚ ਦੇ ਅੰਤ ਵਿੱਚ ਸ਼ਿਵਮ ਦੂਬੇ ਦੁਆਰਾ ਲਗਾਏ ਗਏ ਦੋ ਫੈਸਲਾਕੁੰਨ ਛੱਕਿਆਂ ਦੀ ਵੀ ਹਰਭਜਨ ਸਿੰਘ ਨੇ ਤਾਰੀਫ਼ ਕੀਤੀ। ਉਨ੍ਹਾਂ ਕਿਹਾ ਕਿ ਜਦੋਂ ਟੀਮ ਨੂੰ ਲੋੜ ਸੀ, ਤਾਂ ਦੂਬੇ ਨੇ ਆਪਣਾ ਕੰਮ ਬਾਖੂਬੀ ਨਿਭਾਇਆ। ਦੂਜੇ ਪਾਸੇ, ਹਰਭਜਨ ਨੇ ਮੰਨਿਆ ਕਿ ਇਹ ਮੈਚ ਚੇਨਈ ਲਈ 'ਕਰੋ ਜਾਂ ਮਰੋ' ਵਰਗਾ ਸੀ, ਪਰ ਲਖਨਊ ਸੁਪਰ ਜਾਇੰਟਸ ਨੇ ਖ਼ਰਾਬ ਕੈਚਿੰਗ ਅਤੇ ਕਮਜ਼ੋਰ ਮਿਡਲ ਆਰਡਰ ਬੱਲੇਬਾਜ਼ੀ ਕਾਰਨ ਜਿੱਤਿਆ ਹੋਇਆ ਮੈਚ ਆਪਣੇ ਹੱਥੋਂ ਗੁਆ ਦਿੱਤਾ।