ਫਗਵਾੜਾ/ਜਲੰਧਰ : ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ ਦੇ ਵਿਵਾਦ ਦੌਰਾਨ ਵਾਕੀ-ਟਾਕੀ ਲੈ ਕੇ ਪਹੁੰਚੇ ਲੋਕਾਂ ਬਾਰੇ ਸਪੈਸ਼ਲ ਡਾਇਰੈਕਟਰ ਜਨਰਲ ਆਫ਼ ਪੁਲਸ (ਡੀ. ਜੀ. ਪੀ) ਨੇ ਵੱਡਾ ਖ਼ੁਲਾਸਾ ਕੀਤਾ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਵਾਕੀ-ਟਾਕੀ ਵਾਲੇ ਵਿਅਕਤੀ ਬਾਹਰੀ ਨਹੀਂ ਸਨ, ਸਗੋਂ ਫ਼ੌਜ ਦੇ ਅਧਿਕਾਰੀ ਸਨ।
ਸਪੈਸ਼ਲ ਡੀ. ਜੀ. ਪੀ. ਮੁਤਾਬਕ ਕੁਝ ਫ਼ੌਜੀ ਅਧਿਕਾਰੀਆਂ ਦੇ ਬੱਚੇ ਐੱਲ. ਪੀ. ਯੂ. 'ਚ ਪੜ੍ਹਦੇ ਹਨ। ਇਹ ਅਧਿਕਾਰੀ ਸਥਿਤੀ ਨੂੰ ਵੈਰੀਫਾਈ ਕਰਨ ਲਈ ਯੂਨੀਵਰਸਿਟੀ ਪਹੁੰਚੇ ਸਨ। ਉਨ੍ਹਾਂ ਦੇ ਨਾਲ ਕੁਝ ਜਵਾਨ ਵੀ ਮੌਜੂਦ ਸਨ। ਅਧਿਕਾਰੀਆਂ ਕੋਲ ਰਵਾਇਤੀ ਹਥਿਆਰ ਸਨ, ਜਦੋਂ ਕਿ ਇਕ ਅਧਿਕਾਰੀ ਕੋਲ ਵਾਕੀ-ਟਾਕੀ ਵੀ ਸੀ। ਉਨ੍ਹਾਂ ਕਿਹਾ ਕਿ ਪੁਲਸ ਟੀਮ ਨੇ ਵਾਕੀ-ਟਾਕੀ ਨੂੰ ਸਾਈਡ 'ਤੇ ਲਿਜਾ ਕੇ ਉਸ ਦੀ ਜਾਂਚ ਕੀਤੀ। ਸਬੰਧਤ ਮੇਜਰ ਪੱਧਰ ਦੇ ਅਧਿਕਾਰੀ ਕੋਲ ਇਕ ਪਛਾਣ ਪੱਤਰ ਵੀ ਮੌਜੂਦ ਸੀ।
ਸਪੈਸ਼ਲ ਡੀ. ਜੀ. ਪੀ. ਨੇ ਕਿਹਾ ਕਿ ਐੱਲ. ਪੀ. ਯੂ. ਵਿਵਾਦ ਨਾਲ ਸਬੰਧਤ ਜ਼ਿਆਦਾਤਰ ਸ਼ਿਕਾਇਤਾਂ ਯੂਨੀਵਰਸਿਟੀ ਪ੍ਰਸ਼ਾਸਨ ਨੂੰ ਲੈ ਕ ਸਾਹਮਣੇ ਆਈਆਂ ਹਨ। ਪੁਲਸ ਵਿਰੁੱਧ ਕੋਈ ਸ਼ਿਕਾਇਤ ਨਹੀਂ ਮਿਲੀ ਹੈ। ਹਾਲਾਂਕਿ ਜਾਂਚ ਨਾਲ ਸਬੰਧਤ ਹੋਰ ਵੇਰਵੇ ਇਸ ਸਮੇਂ ਜਾਰੀ ਨਹੀਂ ਕੀਤੇ ਜਾ ਸਕਦੇ।