ਲੰਡਨ : ਮੱਧਕ੍ਰਮ ਦੇ ਬੱਲੇਬਾਜ਼ਾਂ ਦੇ ਨਾ ਚੱਲ ਸਕਣ ਅਤੇ ਖਰਾਬ ਫੀਲਡਿੰਗ ਕਾਰਨ ਹੁਣ ਤੱਕ ਉਮੀਦਾਂ ਅਨੁਸਾਰ ਪ੍ਰਦਰਸ਼ਨ ਨਾ ਕਰ ਸਕਣ ਵਾਲੀ ਭਾਰਤੀ ਟੀਮ ਨੂੰ ਜੇਕਰ ਮਹਿਲਾ ਟੀ-20 ਵਿਸ਼ਵ ਕੱਪ ਦੇ ਸੈਮੀਫਾਈਨਲ ’ਚ ਜਗ੍ਹਾ ਬਣਾਉਣੀ ਹੈ ਤਾਂ ਉਸ ਨੂੰ ਆਸਟ੍ਰੇਲੀਆ ਦੀ ਮਜ਼ਬੂਤ ਟੀਮ ਖਿਲਾਫ ਐਤਵਾਰ ਨੂੰ ਇੱਥੇ ਹੋਣ ਵਾਲੇ ਗਰੁੱਪ-ਏ ਦੇ ਆਪਣੇ ਆਖਰੀ ਮੈਚ ’ਚ ਖੇਡ ਦੇ ਹਰ ਵਿਭਾਗ ’ਚ ਚੰਗਾ ਪ੍ਰਦਰਸ਼ਨ ਕਰਨਾ ਹੋਵੇਗਾ। ਭਾਰਤੀ ਟੀਮ ਲਈ ਇਹ ਮੈਚ ‘ਕਰੋ ਜਾਂ ਮਰੋ’ ਵਰਗਾ ਹੈ। ਇਸ ਗਰੁੱਪ ਦੇ ਆਖਰੀ ਦੋ ਮੈਚਾਂ ਤੋਂ ਸੈਮੀਫਾਈਨਲ ’ਚ ਪਹੁੰਚਣ ਵਾਲੀਆਂ ਟੀਮਾਂ ਦਾ ਫੈਸਲਾ ਹੋਵੇਗਾ। ਇਨ੍ਹਾਂ ਮੈਚਾਂ ’ਚ ਦੱਖਣੀ ਅਫਰੀਕਾ (6 ਅੰਕ) ਲਾਰਡਸ ’ਚ ਬੰਗਲਾਦੇਸ਼ (4) ਨਾਲ ਭਿੜੇਗਾ, ਜਿਸ ਤੋਂ ਬਾਅਦ ਭਾਰਤ (6) ਦਾ ਸਾਹਮਣਾ ਅਜੇਤੂ ਆਸਟ੍ਰੇਲੀਆ (8) ਨਾਲ ਹੋਵੇਗਾ।
ਦੱਖਣੀ ਅਫਰੀਕਾ ਦੇ ਬੰਗਲਾਦੇਸ਼ ਖਿਲਾਫ ਸ਼ਾਨਦਾਰ ਰਿਕਾਰਡ (12 ਮੈਚਾਂ ’ਚ 9-2) ਨੂੰ ਦੇਖਦੇ ਹੋਏ ਭਾਰਤ ਅਤੇ ਆਸਟ੍ਰੇਲੀਆ ਵਿਚਾਲੇ ਹੋਣ ਵਾਲਾ ਮੁਕਾਬਲਾ ਕੁਆਰਟਰ ਫਾਈਨਲ ਵਰਗਾ ਹੋਣ ਦੀ ਉਮੀਦ ਹੈ। ਜੇਕਰ ਪਿਛਲੀ ਵਾਰ ਫਾਈਨਲ ’ਚ ਪਹੁੰਚਣ ਵਾਲੀ ਦੱਖਣੀ ਅਫਰੀਕਾ ਦੀ ਟੀਮ ਉਮੀਦਾਂ ਮੁਤਾਬਕ ਜਿੱਤ ਜਾਂਦੀ ਹੈ ਤਾਂ ਭਾਰਤ ਨੂੰ ਕੁਆਲੀਫਾਈ ਕਰਨ ਲਈ ਆਸਟ੍ਰੇਲੀਆ ਨੂੰ ਹਰਾਉਣਾ ਪਵੇਗਾ। ਅਜਿਹੀ ਸਥਿਤੀ ’ਚ ਇਸ ਮੈਚ ’ਚ ਹਾਰ ਨਾਲ ਮੌਜੂਦਾ ਵਨ ਡੇ ਵਿਸ਼ਵ ਚੈਂਪੀਅਨ ਦੀਆਂ ਉਮੀਦਾਂ ਖਤਮ ਹੋ ਜਾਣਗੀਆਂ। ਦੂਜੇ ਪਾਸੇ ਆਸਟ੍ਰੇਲੀਆ 8 ਅੰਕਾਂ ਅਤੇ 4.724 ਦੀ ਬਿਹਤਰ ਨੈੱਟ ਰਨ ਰੇਟ ਦੀ ਬਦੌਲਤ ਹਾਰ ਦੇ ਬਾਵਜੂਦ ਵੀ ਅੱਗੇ ਵੱਧ ਸਕਦੀ ਹੈ। ਬੰਗਲਾਦੇਸ਼ ਜੇਕਰ ਦੱਖਣੀ ਅਫਰੀਕਾ ਨੂੰ ਹਰਾ ਦਿੰਦੀ ਹੈ ਤਾਂ ਭਾਰਤ ਤੋਂ ਦਬਾਅ ਘੱਟ ਹੋ ਜਾਵੇਗਾ ਕਿਉਂਕਿ ਹਾਰ ਦੇ ਬਾਵਜੂਦ ਵੀ ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਵਾਲੀ ਟੀਮ ਅਾਖਰੀ-4 ’ਚ ਜਗ੍ਹਾ ਬਣਾ ਸਕਦੀ ਹੈ। ਜੇਕਰ ਉਸ ਦੀ ਨੈੱਟ ਰਨ ਰੇਟ 2.268 ਦੱਖਣੀ ਅਫਰੀਕਾ ਦੀ ਮੌਜੂਦਾ 0.734 ਤੋਂ ਬਿਹਤਰ ਬਣੀ ਰਹਿੰਦੀ ਹੈ।
ਇਸ ਮੈਚ ’ਚ ਭਾਰਤੀ ਟੀਮ ਦੇ ਜਜ਼ਬੇ ਦੀ ਪ੍ਰੀਖਿਆ ਵੀ ਹੋਵੇਗੀ ਜੋ ਅਜੇ ਤੱਕ ਹਰ ਵਿਭਾਗ ’ਚ ਕੁਝ ਨਾ ਕੁਝ ਸਮੱਸਿਆਵਾਂ ਨਾਲ ਜੂਝ ਰਹੀ ਹੈ। ਭਾਰਤ ਲਈ ਇਕ ਹੋਰ ਵੱਡੀ ਚਿੰਤਾ ਖਰਾਬ ਫੀਲਡਿੰਗ ਹੈ। ਪਿਛਲੇ 2 ਮੈਚਾਂ ’ਚ ਉਸ ਦੀਆਂ ਖਿਡਾਰਨਾਂ ਨੇ 6 ਕੈਚ ਛੱਡੇ ਹਨ। ਇਨ੍ਹਾਂ ’ਚੋਂ ਦੱਖਣੀ ਅਫਰੀਕਾ ਖਿਲਾਫ ਕੈਚ ਛੱਡਣਾ ਉਸ ਨੂੰ ਮਹਿੰਗਾ ਪਿਆ ਕਿਉਂਕਿ ਟੀਮ ਇਸ ਮੈਚ ’ਚ ਹਾਰ ਗਈ ਸੀ। ਮੁੱਖ ਕੋਚ ਅਮੋਲ ਮਜੂਮਦਾਰ ਅਤੇ ਕਪਤਾਨ ਹਰਮਨਪ੍ਰੀਤ ਇਸ ਗੱਲ ਨੂੰ ਚੰਗੀ ਤਰ੍ਹਾਂ ਸਮਝਦੇ ਹਨ ਕਿ ਆਸਟ੍ਰੇਲੀਆ ਖਿਲਾਫ ਇਸ ਤਰ੍ਹਾਂ ਦੀ ਗਲਤੀ ਉਸ ਨੂੰ ਭਾਰੀ ਪੈ ਸਕਦੀ ਹੈ। ਰਾਧਾ ਯਾਦਵ ਨੂੰ ਬਿਹਤਰੀਨ ਫੀਲਡਰ ਮੰਨਿਆ ਜਾਂਦਾ ਹੈ ਪਰ ਉਸ ਨੇ 3 ਕੈਚ ਛੱਡੇ ਹਨ। ਇਨ੍ਹਾਂ ’ਚੋਂ 2 ਕੈਚ ਉਸ ਨੇ ਦੱਖਣੀ ਅਫਰੀਕਾ ਖਿਲਾਫ ਛੱਡੇ ਸਨ।
ਭਾਰਤ ਨੂੰ ਵਨ ਡੇ ਵਿਸ਼ਵ ਕੱਪ ਦੇ ਸੈਮੀਫਾਈਨਲ ’ਚ ਆਸਟ੍ਰੇਲੀਆ ’ਤੇ ਮਿਲੀ ਜਿੱਤ ਤੋਂ ਨਿਸ਼ਚਿਤ ਰੂਪ ’ਚ ਪ੍ਰੇਰਣਾ ਮਿਲੇਗੀ, ਜਿਸ ’ਚ ਜੇਮਿਮਾ ਦੀ ਸ਼ਾਨਦਾਰ ਪਾਰੀ ਨੇ ਉਸ ਨੂੰ ਅਾਖਰੀ ਅੜਿੱਕੇ ਨੂੰ ਪਾਰ ਕਰਨ ਅਤੇ ਆਪਣੇ ਪਹਿਲੇ ਵਿਸ਼ਵ ਪੱਧਰੀ ਖਿਤਾਬ ਦੀ ਜਿੱਤ ਦੀ ਰਾਹ ’ਤੇ ਅੱਗੇ ਵਧਣ ’ਚ ਮਦਦ ਕੀਤੀ ਸੀ। ਦੂਜੇ ਪਾਸੇ ਆਸਟ੍ਰੇਲੀਆ ਨੂੰ ਆਪਣੀ ਕਲਾ ’ਤੇ ਪੂਰਾ ਭਰੋਸਾ ਹੋਵੇਗਾ ਅਤੇ ਭਾਰਤ ਖਿਲਾਫ ਮੈਦਾਨ ’ਚ ਉਤਰਦੇ ਸਮੇਂ ਉਸ ਦੀਅਾਂ ਨਜ਼ਰਾਂ ਸੈਮੀਫਾਈਨਲ ’ਤੇ ਹੋਣਗੀਆਂ।
ਟੀਮਾਂ ਇਸ ਤਰ੍ਹਾਂ ਹਨ
ਭਾਰਤ-ਹਰਮਨਪ੍ਰੀਤ ਕੌਰ (ਕਪਤਾਨ), ਸਮ੍ਰਿਤੀ ਮੰਧਾਨਾ (ਉਪ ਕਪਤਾਨ), ਯਾਸਤਿਕਾ ਭਾਟੀਆ (ਵਿਕਟਕੀਪਰ), ਰਿਚਾ ਘੋਸ਼ (ਵਿਕਟਕੀਪਰ), ਜੇਮਿਮਾ ਰੋਡ੍ਰਿਗਜ਼, ਭਾਰਤੀ ਫੁਲਮਾਲੀ, ਸ਼ੈਫਾਲੀ ਵਰਮਾ, ਦੀਪਤੀ ਸ਼ਰਮਾ, ਕ੍ਰਾਂਤੀ ਗੌੜ, ਰੇਣੁੂਕਾ ਸਿੰਘ ਠਾਕੁਰ, ਪ੍ਰੇਮਾ ਰਾਵਤ, ਅਰੁੰਧਤੀ ਰੈੱਡੀ, ਨੰਦਨੀ ਸ਼ਰਮਾ, ਸ਼੍ਰੀ ਚਰਣੀ, ਰਾਧਾ ਯਾਦਵ।
ਆਸਟ੍ਰੇਲੀਆ : ਸੋਫੀ ਮੋਲਿਨਿਊ (ਕਪਤਾਨ), ਫੀਬੀ ਲਿਚਿਫੀਲਡ, ਬੈਥ ਮੂਨੀ (ਵਿਕਟਕੀਪਰ), ਜਾਰਜੀਆ ਵੋਲ, ਤਾਹਿਲਿਆ ਮੈਕਗ੍ਰਾ (ਉਪ ਕਪਤਾਨ), ਐਸ਼ਲੇ ਗਾਰਡਨਰ, ਕਿਮ ਗਾਰਥ, ਲੂਸੀ ਹੈਮਿਲਟਨ, ਗ੍ਰੇਸ ਹੈਰਿਸ, ਅਲਾਨਾ ਕਿੰਗ, ਐਲਿਸ ਪੇਰੀ, ਐਨਾਬੈਲ ਸਦਰਲੈਂਡ, ਨਿਕੋਲਾ ਕੈਰੀ, ਮੇਗਨ ਸ਼ਟ, ਜਾਰਜੀਆ ਵੇਅਰਹੈਮ।