ਗਲਾਸਗੋ : ਗਲਾਸਗੋ ਵਿੱਚ ਚੱਲ ਰਹੀਆਂ ਕਾਮਨਵੈਲਥ ਗੇਮਜ਼ 2026 ਦਾ 10ਵਾਂ ਦਿਨ ਭਾਰਤ ਲਈ ਇਤਿਹਾਸਕ ਸਾਬਤ ਹੋਇਆ ਹੈ। ਸ਼ਨੀਵਾਰ (1 ਅਗਸਤ) ਨੂੰ ਭਾਰਤੀ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਇੱਕੋ ਦਿਨ ਵਿੱਚ ਕੁੱਲ 13 ਤਗਮੇ ਜਿੱਤੇ। ਇਸ ਧਮਾਕੇਦਾਰ ਪ੍ਰਦਰਸ਼ਨ ਦੀ ਬਦੌਲਤ ਭਾਰਤ ਹੁਣ ਤਗਮਾ ਸੂਚੀ ਵਿੱਚ 10ਵੇਂ ਸਥਾਨ ਤੋਂ ਲੰਮੀ ਛਾਲ ਮਾਰ ਕੇ ਸਿੱਧਾ ਚੌਥੇ ਸਥਾਨ 'ਤੇ ਪਹੁੰਚ ਗਿਆ ਹੈ।
ਬਾਕਸਿੰਗ ਵਿੱਚ ਰਿਕਾਰਡ 7 ਸੋਨ ਤਗਮੇ
ਭਾਰਤੀ ਮੁੱਕੇਬਾਜ਼ਾਂ ਨੇ ਰਿੰਗ ਵਿੱਚ ਆਪਣਾ ਪੂਰਾ ਦਬਦਬਾ ਬਣਾ ਕੇ ਰੱਖਿਆ ਅਤੇ ਰਾਸ਼ਟਰਮੰਡਲ ਖੇਡਾਂ ਦੇ ਇੱਕੋ ਸੀਜ਼ਨ ਵਿੱਚ ਬਾਕਸਿੰਗ ਵਿੱਚ ਰਿਕਾਰਡ 7 ਸੋਨ ਤਗਮੇ ਜਿੱਤ ਕੇ ਨਵਾਂ ਇਤਿਹਾਸ ਸਿਰਜਿਆ ਹੈ। ਪੁਰਸ਼ਾਂ ਦੇ 60 ਕਿਲੋਗ੍ਰਾਮ ਵਰਗ ਦੇ ਫਾਈਨਲ ਵਿੱਚ ਸਚਿਨ ਸਿਵਾਚ ਨੇ ਨਾਮੀਬੀਆ ਦੇ ਮੁੱਕੇਬਾਜ਼ ਨੂੰ ਹਰਾ ਕੇ ਸੋਨ ਤਗਮਾ ਜਿੱਤਿਆ। ਮਹਿਲਾ ਵਰਗ ਵਿੱਚ ਪ੍ਰੀਤੀ ਪਵਾਰ, ਜੈਸਮੀਨ ਲਾਂਬੋਰੀਆ, ਅਰੁੰਧਤੀ ਚੌਧਰੀ, ਸਾਕਸ਼ੀ ਚੌਧਰੀ ਅਤੇ ਪ੍ਰਿਆ ਘੰਘਾਸ ਚੈਂਪੀਅਨ ਬਣ ਕੇ ਉਭਰੀਆਂ। ਇਸ ਤੋਂ ਇਲਾਵਾ ਸਟਾਰ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਨੇ ਚਾਂਦੀ ਦਾ ਤਗਮਾ ਹਾਸਲ ਕੀਤਾ।
ਪੈਰਾ-ਐਥਲੈਟਿਕਸ ਦੇ ਸ਼ਾਟ ਪੁਟ (F57) ਇਵੈਂਟ ਵਿੱਚ ਭਾਰਤ ਨੇ ਪਹਿਲੇ ਦੋਵੇਂ ਸਥਾਨਾਂ 'ਤੇ ਕਬਜ਼ਾ ਕੀਤਾ। ਸੋਮਨ ਰਾਣਾ ਨੇ 13.40 ਮੀਟਰ ਦੇ ਸਰਵੋਤਮ ਥਰੋਅ ਨਾਲ ਸੋਨ ਤਗਮਾ ਜਿੱਤਿਆ, ਜਦਕਿ ਸ਼ੁਭਮ ਜੁਯਾਲ ਨੇ ਚਾਂਦੀ ਦਾ ਤਗਮਾ ਆਪਣੇ ਨਾਂ ਕੀਤਾ। ਪੁਰਸ਼ਾਂ ਦੇ ਟ੍ਰਿਪਲ ਜੰਪ ਮੁਕਾਬਲੇ ਵਿੱਚ ਪ੍ਰਵੀਨ ਚਿੱਤਰਾਵੇਲ ਨੇ 16.58 ਮੀਟਰ ਦੀ ਛਾਲ ਨਾਲ ਚਾਂਦੀ ਅਤੇ ਨੌਜਵਾਨ ਐਥਲੀਟ ਸੇਲਵਾ ਪ੍ਰਭੂ ਨੇ ਕਾਂਸੀ ਦਾ ਤਗਮਾ ਜਿੱਤਿਆ।
ਸ਼ਨੀਵਾਰ ਦੇ ਪ੍ਰਦਰਸ਼ਨ ਤੋਂ ਬਾਅਦ ਭਾਰਤ ਦੇ ਕੁੱਲ ਤਗਮਿਆਂ ਦੀ ਗਿਣਤੀ 36 ਹੋ ਗਈ ਹੈ, ਜਿਨ੍ਹਾਂ ਵਿੱਚ 12 ਸੋਨੇ, 16 ਚਾਂਦੀ ਅਤੇ 8 ਕਾਂਸੀ ਦੇ ਤਗਮੇ ਸ਼ਾਮਲ ਹਨ। ਭਾਰਤ ਲਈ ਹੁਣ ਤੱਕ ਗੋਲਡ ਜਿੱਤਣ ਵਾਲੇ ਹੋਰ ਪ੍ਰਮੁੱਖ ਖਿਡਾਰੀਆਂ ਵਿੱਚ ਮੀਰਾਬਾਈ ਚਾਨੂੰ (ਵੇਟਲਿਫਟਿੰਗ), ਸ਼ਰਮੀਲਾ ਧਨਖੜ (ਪੈਰਾ ਸ਼ਾਟ ਪੁਟ), ਦਿਲੀਪ ਮਹਾਦੂ ਗਾਵਿਤ (ਪੈਰਾ 100 ਮੀਟਰ), ਅਸਮਿਤਾ ਡੇ (ਜੂਡੋ) ਅਤੇ ਹਰਸ਼ ਸਿੰਘ (ਜੂਡੋ) ਸ਼ਾਮਲ ਹਨ। ਜੂਡੋ ਵਿੱਚ ਉੱਨਤੀ ਸ਼ਰਮਾ ਨੇ ਵੀ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ, ਜਿਸ ਨਾਲ ਆਉਣ ਵਾਲੇ ਦਿਨਾਂ ਵਿੱਚ ਭਾਰਤ ਦੀ ਤਗਮਾ ਸੂਚੀ ਵਿੱਚ ਹੋਰ ਵਾਧਾ ਹੋਣ ਦੀ ਉਮੀਦ ਹੈ।