ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ਆਈ. ਸੀ. ਸੀ.) ਨੇ ਵੀਰਵਾਰ ਨੂੰ ਐਲਾਨ ਕੀਤਾ ਕਿ 2027 ਆਈ. ਸੀ. ਸੀ. ਪੁਰਸ਼ ਵਨ ਡੇ ਵਿਸ਼ਵ ਕੱਪ ਦੇ ਮੁਕਾਬਲੇ ਦੱਖਣੀ ਅਫਰੀਕਾ, ਜ਼ਿੰਬਾਬਵੇ ਅਤੇ ਨਾਮੀਬੀਆ ਦੇ ਕੁੱਲ 12 ਸਟੇਡੀਅਮਾਂ ’ਚ ਖੇਡੇ ਜਾਣਗੇ। ਇਨ੍ਹਾਂ ’ਚੋਂ 8 ਮੈਦਾਨ ਦੱਖਣੀ ਅਫਰੀਕਾ ’ਚ ਹੋਣਗੇ। 50 ਓਵਰਾਂ ਦਾ ਇਹ ਵੱਕਾਰੀ ਟੂਰਨਾਮੈਂਟ 24 ਸਾਲ ਬਾਅਦ ਅਫਰੀਕਾ ਪਰਤ ਰਿਹਾ ਹੈ। ਇਸ ਤੋਂ ਪਹਿਲਾਂ ਦੱਖਣੀ ਅਫਰੀਕਾ, ਜ਼ਿੰਬਾਬਵੇ ਤੇ ਕੀਨੀਆ ਨੇ ਸਾਂਝੇ ਤੌਰ ’ਤੇ 2003 ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕੀਤੀ ਸੀ।
ਜੌਹਾਨਿਸਬਰਗ ’ਚ ਆਯੋਜਿਤ ਇਕ ਸ਼ਾਨਦਾਰ ਸਮਾਰੋਹ ’ਚ ਦੱਖਣੀ ਅਫਰੀਕਾ ਦੇ 8 ਸ਼ਹਿਰਾਂ, ਜ਼ਿੰਬਾਬਵੇ ਦੇ 3 ਸ਼ਹਿਰਾਂ ਅਤੇ ਨਾਮੀਬੀਆ ਦੀ ਰਾਜਧਾਨੀ ਵਿੰਡਹੋਕ ਨੂੰ ਟੂਰਨਾਮੈਂਟ ਦੇ ਸਹਿ-ਮੇਜ਼ਬਾਨ ਦੇ ਰੂਪ ’ਚ ਪੇਸ਼ ਕੀਤਾ ਗਿਆ। ਇਸ ਮੌਕੇ ਦੱਖਣੀ ਅਫਰੀਕਾ ਦੇ ਚੌਟੀ ਦੇ ਕ੍ਰਿਕਟਰ ਗ੍ਰੀਮ ਸਮਿੱਥ, ਮਖਾਇਆ ਏਨਟੀਨੀ, ਹਾਸ਼ਿਮ ਅਮਲਾ, ਤੇਮਬਾ ਬਾਵੁਮਾ ਤੇ ਕਾਗੀਸੋ ਰਬਾਡਾ ਤੋਂ ਇਲਾਵਾ ਜ਼ਿੰਬਾਬਵੇ ਦੇ ਹੈਮਿਲਟਨ ਮਾਸਕਾਦਜ਼ਾ ਅਤੇ ਨਾਮੀਬੀਆ ਦੇ ਰੁਡੋਲਫ ਜਾਨਸੇਨ ਵਾਨ ਵੁਰੇਨ ਵੀ ਮੌਜੂਦ ਸਨ।
ਦ. ਅਫਰੀਕਾ ਦੇ 8 ਮੈਦਾਨ : ਵਾਂਡਰਰਜ਼ ਸਟੇਡੀਅਮ (ਜੌਹਾਨਿਸਬਰਗ), ਸੁਪਰਸਪੋਰਟ ਪਾਰਕ, ਸੈਂਚੁਰੀਅਨ (ਸ਼ਵਾਨੇ), ਨਿਊਲੈਂਡਜ਼ ਕ੍ਰਿਕਟ ਗਰਾਊਂਡ (ਕੇਪਟਾਊਨ), ਕਿੰਗਜ਼ਮੀਡ ਕ੍ਰਿਕਟ ਗਰਾਊਂਡ (ਡਰਬਨ), ਸੈਂਟ ਜੌਰਜ ਪਾਰਕ (ਗਕੇਬੇਰਹਾ), ਮੰਗਾਉਂਗ ਓਵਲ (ਬਲੋਮਫੋਂਟੇਨ), ਬੋਲੈਂਡ ਪਾਰਕ (ਪਾਰਲ) ਅਤੇ ਬਫੇਲੋ ਪਾਰਕ (ਕੁਗੋਮਪੋ ਸਿਟੀ) ਹਨ।
ਜ਼ਿੰਬਾਬਵੇ ਦੇ 3 ਮੈਦਾਨ : ਹਰਾਰੇ ਸਪੋਰਟਸ ਕਲੱਬ (ਹਰਾਰੇ), ਕੁਵੀਂਸ ਸਪੋਰਟਸ ਕਲੱਬ (ਬੁਲਾਵਾਯੋ) ਤੇ ਨਵੇਂ ਬਣੇ ਫਾਲੇ ਮੋਸੀ-ਓਆ-ਟੁੰਯਾ ਅੰਤਰਰਾਸ਼ਟਰੀ ਕ੍ਰਿਕਟ ਸਟੇਡੀਅਮ (ਵਿਕਟੋਰੀਆ ਫਾਲਜ਼) ਹਨ। ਉੱਥੇ ਹੀ ਨਾਮੀਬੀਆ ’ਚ ਮੈਚ ਨਾਮੀਬੀਆ ਕ੍ਰਿਕਟ ਗਰਾਊਂਡ (ਵਿੰਡਹੋਕ) ’ਚ ਖੇਡੇ ਜਾਣਗੇ।