ਹੈਦਰਾਬਾਦ : ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ 49ਵੇਂ ਮੈਚ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਤੋਂ 33 ਦੌੜਾਂ ਨਾਲ ਮਿਲੀ ਹਾਰ ਤੋਂ ਬਾਅਦ ਪੰਜਾਬ ਕਿੰਗਜ਼ (PBKS) ਦੇ ਕਪਤਾਨ ਸ਼੍ਰੇਅਸ ਅਈਅਰ ਨੇ ਫੀਲਡਰਾਂ ਦੁਆਰਾ ਛੱਡੇ ਗਏ ਕੈਚਾਂ 'ਤੇ ਡੂੰਘੀ ਨਿਰਾਸ਼ਾ ਜ਼ਾਹਰ ਕੀਤੀ ਹੈ। SRH ਵੱਲੋਂ ਦਿੱਤੇ ਗਏ 236 ਦੌੜਾਂ ਦੇ ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਦਿਆਂ ਪੰਜਾਬ ਦੀ ਟੀਮ ਕੂਪਰ ਕੋਨੋਲੀ ਦੇ ਸ਼ਾਨਦਾਰ ਸੈਂਕੜੇ ਦੇ ਬਾਵਜੂਦ ਹਾਰ ਗਈ।
ਮਹਿੰਗੇ ਸਾਬਿਤ ਹੋਏ ਜੀਵਨਦਾਨ
ਮੈਚ ਦੌਰਾਨ ਪੰਜਾਬ ਦੇ ਫੀਲਡਰਾਂ ਨੇ ਹੈਦਰਾਬਾਦ ਦੇ ਬੱਲੇਬਾਜ਼ਾਂ ਨੂੰ ਕਈ ਮੌਕੇ ਦਿੱਤੇ ਜੋ ਅੰਤ ਵਿੱਚ ਮੈਚ ਦਾ ਨਤੀਜਾ ਬਦਲਣ ਵਾਲੇ ਸਾਬਿਤ ਹੋਏ। 8ਵੇਂ ਓਵਰ ਵਿੱਚ ਜਦੋਂ ਈਸ਼ਾਨ ਕਿਸ਼ਨ ਸਿਰਫ਼ 9 ਦੌੜਾਂ 'ਤੇ ਸੀ, ਤਾਂ ਕੂਪਰ ਕੋਨੋਲੀ ਨੇ ਉਸਦਾ ਕੈਚ ਛੱਡ ਦਿੱਤਾ। ਬਾਅਦ ਵਿੱਚ 11ਵੇਂ ਓਵਰ ਵਿੱਚ ਲੋਕੀ ਫਰਗੂਸਨ ਨੇ ਵੀ ਕਿਸ਼ਨ ਦਾ ਇੱਕ ਹੋਰ ਕੈਚ ਟਪਕਾਇਆ ਜਦੋਂ ਉਹ 18 ਦੌੜਾਂ 'ਤੇ ਸੀ। ਕਿਸ਼ਨ ਨੇ ਇਹਨਾਂ ਮੌਕਿਆਂ ਦਾ ਭਰਪੂਰ ਫ਼ਾਇਦਾ ਉਠਾਉਂਦਿਆਂ 55 ਦੌੜਾਂ ਬਣਾਈਆਂ। 9ਵੇਂ ਓਵਰ ਵਿੱਚ ਸ਼ਸ਼ਾਂਕ ਸਿੰਘ ਨੇ ਯੁਜ਼ਵੇਂਦਰ ਚਾਹਲ ਦੀ ਗੇਂਦ 'ਤੇ ਕਲਾਸੇਨ ਦਾ ਇੱਕ ਆਸਾਨ ਕੈਚ ਛੱਡ ਦਿੱਤਾ। ਕਲਾਸੇਨ ਨੇ ਇਸ ਜੀਵਨਦਾਨ ਤੋਂ ਬਾਅਦ 43 ਗੇਂਦਾਂ ਵਿੱਚ 69 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡੀ।
ਕੂਪਰ ਕੋਨੋਲੀ ਦਾ ਸੈਂਕੜਾ ਗਿਆ ਬੇਕਾਰ
ਪੰਜਾਬ ਕਿੰਗਜ਼ ਲਈ ਕੂਪਰ ਕੋਨੋਲੀ ਨੇ ਬੇਹੱਦ ਦਬਾਅ ਵਾਲੀ ਸਥਿਤੀ ਵਿੱਚ 59 ਗੇਂਦਾਂ ਵਿੱਚ ਨਾਬਾਦ 107 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਪਰ ਦੂਜੇ ਪਾਸੇ ਤੋਂ ਸਾਥ ਨਾ ਮਿਲਣ ਕਾਰਨ ਉਹ ਆਪਣੀ ਟੀਮ ਨੂੰ ਜਿੱਤ ਦੀ ਦਹਿਲੀਜ਼ ਪਾਰ ਨਹੀਂ ਕਰਵਾ ਸਕੇ।
ਕਪਤਾਨ ਸ਼੍ਰੇਅਸ ਅਈਅਰ ਦਾ ਬਿਆਨ
ਮੈਚ ਤੋਂ ਬਾਅਦ ਸ਼੍ਰੇਅਸ ਅਈਅਰ ਨੇ ਕਿਹਾ ਕਿ ਖ਼ਰਾਬ ਫੀਲਡਿੰਗ, ਖਾਸ ਕਰਕੇ ਸ਼ੁਰੂਆਤ ਵਿੱਚ ਛੱਡੇ ਗਏ ਕੈਚਾਂ ਕਾਰਨ ਹੈਦਰਾਬਾਦ ਨੂੰ ਮੈਚ 'ਤੇ ਕਾਬੂ ਪਾਉਣ ਦਾ ਮੌਕਾ ਮਿਲ ਗਿਆ। ਅਈਅਰ ਅਨੁਸਾਰ, "ਅਸੀਂ ਸ਼ੁਰੂਆਤ ਵਿੱਚ ਹੀ ਕੈਚ ਛੱਡ ਦਿੱਤੇ ਸਨ ਅਤੇ ਜਿਵੇਂ-ਜਿਵੇਂ ਮੈਚ ਵਧਿਆ, ਪਿੱਚ ਹੌਲੀ ਹੁੰਦੀ ਗਈ। ਜੇਕਰ ਅਸੀਂ ਇਸੇ ਫਾਰਮ ਨਾਲ ਖੇਡਦੇ ਰਹੇ, ਤਾਂ ਸਾਨੂੰ ਕੋਈ ਫ਼ਾਇਦਾ ਨਹੀਂ ਹੋਵੇਗਾ; ਸਾਨੂੰ ਆਪਣੀ ਨਿਰੰਤਰਤਾ ਅਤੇ ਫੀਲਡਿੰਗ ਦੇ ਪੱਧਰ ਵਿੱਚ ਸੁਧਾਰ ਕਰਨ ਦੀ ਲੋੜ ਹੈ"। ਹਾਲਾਂਕਿ, ਉਨ੍ਹਾਂ ਨੇ ਯੁਜ਼ਵੇਂਦਰ ਚਾਹਲ ਦੀ ਨਿਡਰ ਗੇਂਦਬਾਜ਼ੀ ਅਤੇ ਕੋਨੋਲੀ ਦੀ ਉੱਚੀ ਸੋਚ ਵਾਲੀ ਪਾਰੀ ਦੀ ਤਾਰੀਫ਼ ਵੀ ਕੀਤੀ।