ਨਵੀਂ ਦਿੱਲੀ : ਭਾਰਤ ਦੇ ਇਲੈਕਟ੍ਰਾਨਿਕ ਵਸਤੂਆਂ ਦੇ ਨਿਰਯਾਤ (ਬਰਾਮਦ) ਨੇ ਵਿੱਤੀ ਸਾਲ 2026-27 ਦੀ ਅਪ੍ਰੈਲ-ਸਤੰਬਰ ਦੀ ਮਿਆਦ ਦੌਰਾਨ 44.0% ਦੀ ਮਜ਼ਬੂਤੀ ਦਰਜ ਕੀਤੀ ਹੈ। ਸਰਕਾਰ ਵੱਲੋਂ ਮੰਗਲਵਾਰ ਨੂੰ ਜਾਰੀ ਕੀਤੇ ਗਏ ਅੰਕੜਿਆਂ ਅਨੁਸਾਰ, ਇਹ ਨਿਰਯਾਤ ਪਿਛਲੇ ਵਿੱਤੀ ਸਾਲ (2025-26) ਦੀ ਇਸੇ ਮਿਆਦ ਦੇ 22.20 ਅਰਬ ਡਾਲਰ ਤੋਂ ਵਧ ਕੇ 31.97 ਅਰਬ ਡਾਲਰ ਤੱਕ ਪਹੁੰਚ ਗਿਆ ਹੈ। ਹਾਲਾਂਕਿ ਸਮਾਰਟਫੋਨ ਅਜੇ ਵੀ ਇਲੈਕਟ੍ਰਾਨਿਕਸ ਨਿਰਯਾਤ ਦਾ ਸਭ ਤੋਂ ਵੱਡਾ ਹਿੱਸਾ ਬਣੇ ਹੋਏ ਹਨ, ਪਰ ਗੈਰ-ਸਮਾਰਟਫੋਨ ਸ਼੍ਰੇਣੀ ਵਿੱਚ ਕਿਤੇ ਜ਼ਿਆਦਾ ਤੇਜ਼ੀ ਨਾਲ ਵਾਧਾ ਦੇਖਣ ਨੂੰ ਮਿਲਿਆ ਹੈ, ਜੋ ਭਾਰਤ ਦੇ ਇਲੈਕਟ੍ਰਾਨਿਕਸ ਉਤਪਾਦਨ ਦੇ ਵਧਦੇ ਦਾਇਰੇ ਨੂੰ ਦਰਸਾਉਂਦਾ ਹੈ।
ਸਰਕਾਰੀ ਬਿਆਨ ਮੁਤਾਬਕ, ਸਮਾਰਟਫੋਨ ਨਿਰਯਾਤ 35.8% ਵਧ ਕੇ 13.38 ਅਰਬ ਡਾਲਰ ਤੋਂ 18.17 ਅਰਬ ਡਾਲਰ ਹੋ ਗਿਆ ਹੈ, ਪਰ ਕੁੱਲ ਇਲੈਕਟ੍ਰਾਨਿਕਸ ਬਰਾਮਦ ਵਿੱਚ ਇਸ ਦੀ ਹਿੱਸੇਦਾਰੀ 60.3% ਤੋਂ ਘਟ ਕੇ 56.8% ਰਹਿ ਗਈ ਹੈ। ਦੂਜੇ ਪਾਸੇ, ਗੈਰ-ਸਮਾਰਟਫੋਨ ਇਲੈਕਟ੍ਰਾਨਿਕਸ ਦਾ ਨਿਰਯਾਤ 56.5% ਦੇ ਵੱਡੇ ਉਛਾਲ ਨਾਲ 8.81 ਅਰਬ ਡਾਲਰ ਤੋਂ ਵਧ ਕੇ 13.79 ਅਰਬ ਡਾਲਰ ਹੋ ਗਿਆ ਹੈ। ਇਸ ਨਾਲ ਕੁੱਲ ਇਲੈਕਟ੍ਰਾਨਿਕਸ ਨਿਰਯਾਤ ਵਿੱਚ ਇਸ ਸ਼੍ਰੇਣੀ ਦਾ ਹਿੱਸਾ 39.7% ਤੋਂ ਵਧ ਕੇ 43.2% ਤੱਕ ਪਹੁੰਚ ਗਿਆ ਹੈ।
ਇਸ ਸ਼ਾਨਦਾਰ ਵਾਧੇ ਵਿੱਚ ਵੱਖ-ਵੱਖ ਤਕਨੀਕੀ ਪੁਰਜ਼ਿਆਂ ਅਤੇ ਉਪਕਰਨਾਂ ਦਾ ਅਹਿਮ ਯੋਗਦਾਨ ਰਿਹਾ ਹੈ। ਮਾਊਂਟਿਡ ਪ੍ਰਿੰਟਿਡ ਸਰਕਟ ਬੋਰਡ (PCB) ਦਾ ਨਿਰਯਾਤ 3,219% ਦੇ ਹੈਰਾਨੀਜਨਕ ਵਾਧੇ ਨਾਲ 63.3 ਮਿਲੀਅਨ ਡਾਲਰ ਤੋਂ ਵਧ ਕੇ 2.10 ਅਰਬ ਡਾਲਰ ਹੋ ਗਿਆ, ਜਿਸ ਵਿੱਚ ਸਿੰਗਾਪੁਰ ਸਭ ਤੋਂ ਵੱਡਾ ਖਰੀਦਦਾਰ ਰਿਹਾ। ਇਸੇ ਤਰ੍ਹਾਂ ਮੈਮੋਰੀ ਇੰਟੀਗ੍ਰੇਟਿਡ ਸਰਕਟ (2,333% ਵਾਧਾ), ਸੌਲਿਡ-ਸਟੇਟ ਸਟੋਰੇਜ ਡਿਵਾਈਸ (1,680% ਵਾਧਾ), ਪੌਪੂਲੇਟਿਡ ਪੀਸੀਬੀ (304% ਵਾਧਾ) ਅਤੇ ਨੈੱਟਵਰਕ ਟਰਾਂਸਮਿਸ਼ਨ ਤੇ ਰਾਊਟਿੰਗ ਉਪਕਰਨਾਂ (98% ਵਾਧਾ) ਦੀ ਬਰਾਮਦ ਵਿੱਚ ਵੀ ਰਿਕਾਰਡ ਵਾਧਾ ਦਰਜ ਕੀਤਾ ਗਿਆ ਹੈ।
ਇਨ੍ਹਾਂ ਉਤਪਾਦਾਂ ਦੀ ਵਧਦੀ ਮੰਗ ਸਦਕਾ ਸਿੰਗਾਪੁਰ, ਚੀਨ, ਹਾਂਗਕਾਂਗ, ਮਲੇਸ਼ੀਆ, ਅਮਰੀਕਾ ਅਤੇ ਨੀਦਰਲੈਂਡ ਵਰਗੇ ਪ੍ਰਮੁੱਖ ਬਾਜ਼ਾਰਾਂ ਨੂੰ ਹੋਣ ਵਾਲੇ ਭਾਰਤੀ ਨਿਰਯਾਤ ਵਿੱਚ ਤੇਜ਼ੀ ਆਈ ਹੈ। ਮਾਹਿਰਾਂ ਅਨੁਸਾਰ, ਸਿਰਫ਼ ਸਮਾਰਟਫੋਨ 'ਤੇ ਨਿਰਭਰ ਰਹਿਣ ਦੀ ਬਜਾਏ ਕੰਪੋਨੈਂਟਸ, ਸਰਕਟ ਬੋਰਡ, ਸੰਚਾਰ ਉਪਕਰਨਾਂ ਅਤੇ ਮੈਮੋਰੀ ਉਤਪਾਦਾਂ ਦੇ ਖੇਤਰ ਵਿੱਚ ਹੋਇਆ ਇਹ ਵਿਸਤਾਰ ਭਾਰਤ ਨੂੰ ਵਿਸ਼ਵ ਪੱਧਰ 'ਤੇ ਇੱਕ ਮਜ਼ਬੂਤ ਇਲੈਕਟ੍ਰਾਨਿਕਸ ਨਿਰਮਾਣ ਹੱਬ ਵਜੋਂ ਸਥਾਪਿਤ ਕਰ ਰਿਹਾ ਹੈ।