ਪੇਸ਼ਾਵਰ : ਪਾਕਿਸਤਾਨੀ ਸੁਰੱਖਿਆ ਬਲਾਂ ਨੇ ਅਸ਼ਾਂਤ ਖੈਬਰ ਪਖਤੂਨਖਵਾ ਸੂਬੇ 'ਚ ਬੁੱਧਵਾਰ ਅਤੇ ਵੀਰਵਾਰ ਨੂੰ ਚਲਾਏ ਗਏ ਵੱਖ-ਵੱਖ ਅਭਿਆਨਾਂ ਦੌਰਾਨ 23 ਅੱਤਵਾਦੀਆਂ ਨੂੰ ਮਾਰ ਮੁਕਾਇਆ ਹੈ। ਫੌਜ ਦੀ ਮੀਡੀਆ ਸ਼ਾਖਾ, 'ਦ ਇੰਟਰ-ਸਰਵਿਸਿਜ਼ ਪਬਲਿਕ ਰਿਲੇਸ਼ਨਜ਼' (ISPR) ਨੇ ਸ਼ੁੱਕਰਵਾਰ ਨੂੰ ਇਸ ਸਬੰਧੀ ਜਾਣਕਾਰੀ ਦਿੱਤੀ।
ਖੁਫੀਆ ਜਾਣਕਾਰੀ ਦੇ ਆਧਾਰ 'ਤੇ ਕਾਰਵਾਈ
ISPR ਅਨੁਸਾਰ, ਸੁਰੱਖਿਆ ਬਲਾਂ ਨੇ ਦੱਤਾ ਖੇਲ, ਸਪਿਨਵਾਮ ਤੇ ਬੰਨੂ ਸਮੇਤ ਕਈ ਇਲਾਕਿਆਂ 'ਚ ਖੁਫੀਆ ਜਾਣਕਾਰੀ ਦੇ ਆਧਾਰ 'ਤੇ ਇਹ ਅਭਿਆਨ ਚਲਾਏ ਸਨ। ਇਸ ਦੌਰਾਨ ਸੁਰੱਖਿਆ ਬਲਾਂ ਤੇ ਅੱਤਵਾਦੀਆਂ ਵਿਚਕਾਰ ਭਿਆਨਕ ਗੋਲੀਬਾਰੀ ਹੋਈ, ਜਿਸ 'ਚ 23 ਅੱਤਵਾਦੀ ਮਾਰੇ ਗਏ।
ਮਾਰਿਆ ਗਿਆ ਨਾਮੀ ਅੱਤਵਾਦੀ 'ਤੂਰ ਸਾਕਿਬ'
ਇਸ ਕਾਰਵਾਈ 'ਚ ਸਭ ਤੋਂ ਵੱਡੀ ਸਫਲਤਾ ਖਤਰਨਾਕ ਤੇ ਲੋੜੀਂਦੇ ਅੱਤਵਾਦੀ ਜਾਨ ਮੀਰ ਉਰਫ 'ਤੂਰ ਸਾਕਿਬ' ਦਾ ਮਾਰਿਆ ਜਾਣਾ ਹੈ। ਸਾਕਿਬ ਸੁਰੱਖਿਆ ਕਰਮਚਾਰੀਆਂ ਤੇ ਆਮ ਨਾਗਰਿਕਾਂ ਦੀਆਂ ਹੱਤਿਆਵਾਂ ਸਮੇਤ ਕਈ ਅੱਤਵਾਦੀ ਗਤੀਵਿਧੀਆਂ 'ਚ ਸ਼ਾਮਲ ਸੀ। ਉਸ ਦੀ ਮੌਤ ਨਾਲ ਖੇਤਰ 'ਚ ਸਰਗਰਮ ਅੱਤਵਾਦੀ ਗਿਰੋਹ ਨੂੰ ਵੱਡਾ ਝਟਕਾ ਲੱਗਾ ਹੈ।
ਹਥਿਆਰ ਤੇ ਗੁਪਤ ਬੰਕਰ ਬਰਾਮਦ
ਅਭਿਆਨ ਦੌਰਾਨ ਫੌਜ ਨੇ ਮਾਰੇ ਗਏ ਅੱਤਵਾਦੀਆਂ ਕੋਲੋਂ ਭਾਰੀ ਮਾਤਰਾ 'ਚ ਹਥਿਆਰ, ਗੋਲਾ-ਬਾਰੂਦ, ਵਿਸਫੋਟਕ ਉਪਕਰਣ (IED) ਤੇ ਦੇਸੀ ਬੰਬ ਬਰਾਮਦ ਕੀਤੇ ਹਨ। ਇਸ ਤੋਂ ਇਲਾਵਾ, ਸੁਰੱਖਿਆ ਬਲਾਂ ਨੇ ਅੱਤਵਾਦੀਆਂ ਦੁਆਰਾ ਵਰਤੀਆਂ ਜਾ ਰਹੀਆਂ ਜ਼ਮੀਨਦੋਜ਼ ਸੁਰੰਗਾਂ ਤੇ ਬੰਕਰਾਂ ਦੇ ਜਾਲ ਦਾ ਪਤਾ ਲਗਾ ਕੇ ਉਨ੍ਹਾਂ ਨੂੰ ਤਬਾਹ ਕਰ ਦਿੱਤਾ ਹੈ।
ਸਰਚ ਆਪਰੇਸ਼ਨ ਜਾਰੀ
ਪਾਕਿਸਤਾਨ ਨੇ ਆਪਣੇ 'ਅਜ਼ਮ-ਏ-ਇਸਤੇਹਕਾਮ' ਅਭਿਆਨ ਤਹਿਤ ਅੱਤਵਾਦ ਵਿਰੋਧੀ ਕਾਰਵਾਈਆਂ ਨੂੰ ਤੇਜ਼ ਕਰ ਦਿੱਤਾ ਹੈ। ਪ੍ਰਭਾਵਿਤ ਇਲਾਕਿਆਂ 'ਚ ਬਾਕੀ ਬਚੇ ਅੱਤਵਾਦੀਆਂ ਦਾ ਪਤਾ ਲਗਾਉਣ ਤੇ ਉਨ੍ਹਾਂ ਨੂੰ ਖਤਮ ਕਰਨ ਲਈ ਫਿਲਹਾਲ ਤਲਾਸ਼ੀ ਅਭਿਆਨ ਜਾਰੀ ਹੈ।