ਨੇਮਾਰ ਦੀ ਢਾਈ ਸਾਲਾਂ ਬਾਅਦ ਬ੍ਰਾਜ਼ੀਲ ਟੀਮ ਵਿੱਚ ਵਾਪਸੀ; ਫੀਫਾ ਵਿਸ਼ਵ ਕੱਪ ਟੀਮ 'ਚ ਮਿਲੀ ਜਗ੍ਹਾ

ਬ੍ਰਾਜ਼ੀਲ ਦੇ ਸਟਾਰ ਫੁੱਟਬਾਲਰ ਨੇਮਾਰ ਦੀ ਅੰਤਰਰਾਸ਼ਟਰੀ ਫੁੱਟਬਾਲ ਵਿੱਚ ਆਖਰਕਾਰ ਵਾਪਸੀ ਹੋ ਗਈ ਹੈ। ਬ੍ਰਾਜ਼ੀਲ ਦੇ ਮੁੱਖ ਕੋਚ ਕਾਰਲੋ ਐਂਸੇਲੋਟੀ ਨੇ ਅਗਲੇ ਮਹੀਨੇ ਹੋਣ ਵਾਲੇ ਫੀਫਾ (FIFA) ਵਿਸ਼ਵ ਕੱਪ ਲਈ 26 ਮੈਂਬਰੀ ਟੀਮ ਦਾ ਐਲਾਨ ਕੀਤਾ ਹੈ, ਜਿਸ ਵਿੱਚ ਨੇਮਾਰ ਦਾ ਨਾਮ ਵੀ ਸ਼ਾਮਲ ਹੈ। ਨੇਮਾਰ ਲਗਭਗ ਢਾਈ ਸਾਲਾਂ ਬਾਅਦ ਰਾਸ਼ਟਰੀ ਟੀਮ ਵਿੱਚ ਪਰਤੇ ਹਨ।

ਸੱਟ ਤੋਂ ਬਾਅਦ ਲੰਬਾ ਸੰਘਰਸ਼ 
34 ਸਾਲਾ ਨੇਮਾਰ ਨੇ ਆਖਰੀ ਵਾਰ ਅਕਤੂਬਰ 2023 ਵਿੱਚ ਉਰੂਗਵੇ ਵਿਰੁੱਧ ਵਿਸ਼ਵ ਕੱਪ ਕੁਆਲੀਫਾਇਰ ਮੈਚ ਖੇਡਿਆ ਸੀ। ਉਸ ਮੈਚ ਦੌਰਾਨ ਉਨ੍ਹਾਂ ਨੂੰ ਗੰਭੀਰ ACL ਸੱਟ ਲੱਗੀ ਸੀ, ਜਿਸ ਕਾਰਨ ਉਹ ਲੰਬੇ ਸਮੇਂ ਤੱਕ ਮੈਦਾਨ ਤੋਂ ਬਾਹਰ ਰਹੇ। ਨੇਮਾਰ ਫਿਲਹਾਲ ਸੈਂਟੋਸ ਐਫਸੀ (Santos FC) ਲਈ ਖੇਡ ਰਹੇ ਹਨ, ਜਿੱਥੇ ਜਨਵਰੀ 2025 ਵਿੱਚ ਵਾਪਸੀ ਤੋਂ ਬਾਅਦ ਉਨ੍ਹਾਂ ਨੇ 38 ਮੈਚਾਂ ਵਿੱਚ 17 ਗੋਲ ਕੀਤੇ ਹਨ।

ਕੋਚ ਦਾ ਭਰੋਸਾ : ਤਜ਼ਰਬਾ ਅਤੇ ਗੁਣਵੱਤਾ 
ਕੋਚ ਕਾਰਲੋ ਐਂਸੇਲੋਟੀ ਨੇ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਨੇਮਾਰ ਨੂੰ ਕਿਸੇ ਬੈਕਅੱਪ ਖਿਡਾਰੀ ਵਜੋਂ ਨਹੀਂ ਚੁਣਿਆ ਗਿਆ ਹੈ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਟੀਮ ਨੂੰ ਨੇਮਾਰ ਦੀ ਗੁਣਵੱਤਾ ਅਤੇ ਤਜ਼ਰਬੇ ਦੀ ਲੋੜ ਹੈ। ਨੇਮਾਰ ਦੀ ਫਿਟਨੈੱਸ 'ਤੇ ਪੂਰਾ ਸਾਲ ਨਜ਼ਰ ਰੱਖੀ ਗਈ ਹੈ ਅਤੇ ਉਹ ਹੁਣ ਬਿਹਤਰ ਸਥਿਤੀ ਵਿੱਚ ਹਨ। ਉਹ ਉਦੋਂ ਹੀ ਖੇਡਣਗੇ ਜਦੋਂ ਟ੍ਰੇਨਿੰਗ ਅਤੇ ਫਿਟਨੈੱਸ ਦੇ ਆਧਾਰ 'ਤੇ ਇਸ ਦੇ ਹੱਕਦਾਰ ਹੋਣਗੇ।

ਟੀਮ ਵਿੱਚ ਵੱਡੇ ਬਦਲਾਅ 
ਨੇਮਾਰ ਦੀ ਵਾਪਸੀ ਦੇ ਨਾਲ ਹੀ ਟੀਮ ਵਿੱਚੋਂ ਕੁਝ ਵੱਡੇ ਨਾਮ ਗਾਇਬ ਹਨ। ਥਿਆਗੋ ਸਿਲਵਾ, ਜੋਆਓ ਪੇਡਰੋ ਅਤੇ ਐਂਡਰੇ ਸੈਂਟੋਸ ਨੂੰ ਸਕੁਐਡ ਵਿੱਚ ਜਗ੍ਹਾ ਨਹੀਂ ਮਿਲੀ। ਇਸ ਤੋਂ ਇਲਾਵਾ, ਰੋਡਰੀਗੋ ਅਤੇ ਐਸਟੇਵਾਓ ਸੱਟ ਕਾਰਨ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ ਹਨ।

ਵਿਸ਼ਵ ਕੱਪ ਮੁਹਿੰਮ ਦੀ ਸ਼ੁਰੂਆਤ 
ਬ੍ਰਾਜ਼ੀਲ ਆਪਣੇ ਵਿਸ਼ਵ ਕੱਪ ਅਭਿਆਨ ਦੀ ਸ਼ੁਰੂਆਤ 13 ਜੂਨ ਨੂੰ ਨਿਊ ਜਰਸੀ ਵਿੱਚ ਮੋਰੱਕੋ ਵਿਰੁੱਧ ਮੁਕਾਬਲੇ ਨਾਲ ਕਰੇਗਾ। ਇਸ ਤੋਂ ਬਾਅਦ ਗਰੁੱਪ-ਸੀ ਵਿੱਚ ਬ੍ਰਾਜ਼ੀਲ ਦਾ ਮੁਕਾਬਲਾ ਹੈਤੀ ਅਤੇ ਸਕਾਟਲੈਂਡ ਨਾਲ ਹੋਵੇਗਾ।