ਚਾਂਗਝੂ : ਜਾਪਾਨ ਓਪਨ ਦਾ ਖਿਤਾਬ ਜਿੱਤ ਕੇ ਸ਼ਾਨਦਾਰ ਲੈਅ ’ਚ ਪਰਤੀ ਭਾਰਤ ਦੀ ਸਟਾਰ ਸ਼ਟਲਰ ਪੀ. ਵੀ. ਸਿੰਧੂ ਮੰਗਲਵਾਰ ਤੋਂ ਸ਼ੁਰੂ ਹੋ ਰਹੇ ਚੀਨ ਓਪਨ ਸੁਪਰ 1000 ਬੈਡਮਿੰਟਨ ਟੂਰਨਾਮੈਂਟ ’ਚ ਭਾਰਤੀ ਚੁਣੌਤੀ ਦੀ ਅਗਵਾਈ ਕਰੇਗੀ ਪਰ ਪੁਰਸ਼ ਡਬਲਜ਼ ਦੀ ਚੋਟੀ ਦੀ ਜੋੜੀ ਸਾਤਵਿਕਸਾਈਰਾਜ ਰੰਕੀਰੈੱਡੀ ਅਤੇ ਚਿਰਾਗ ਸ਼ੈੱਟੀ ਮੋਢੇ ਦੀ ਸੱਟ ਤੋਂ ਉਭਰ ਰਹੇ ਸਾਤਵਿਕ ਕਾਰਨ ਇਸ ਪ੍ਰਤੀਯੋਗਿਤਾ ’ਚ ਹਿੱਸਾ ਨਹੀਂ ਲਵੇਗੀ। ਭਾਰਤੀ ਟੀਮ ਬੀ. ਡਬਲਯੂ. ਐੱਫ. ਵਿਸ਼ਵ ਟੂਰ ’ਤੇ ਪਿਛਲੇ ਹਫ਼ਤੇ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਲੈਅ ਨੂੰ ਬਰਕਰਾਰ ਰੱਖਣ ਦੀ ਕੋਸ਼ਿਸ਼ ਕਰੇਗੀ।
ਸਿੰਧੂ ਲਗਭਗ 2 ਸਾਲ ਬਾਅਦ ਜਾਪਾਨ ਓਪਨ ਦਾ ਖਿਤਾਬ ਜਿੱਤ ਕੇ ਬਿਹਤਰੀਨ ਲੈਅ ’ਚ ਚੀਨ ਪਹੁੰਚੀ ਹੈ। 2 ਵਾਰ ਦੀ ਓਲੰਪਿਕ ਤਗਮਾ ਜੇਤੂ ਸਿੰਧੂ ਨੇ ਜਾਪਾਨ ਓਪਨ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਫਾਈਨਲ ’ਚ 3 ਵਾਰ ਦੀ ਵਿਸ਼ਵ ਚੈਂਪੀਅਨ ਜਾਪਾਨ ਦੀ ਅਕਾਨੇ ਯਾਮਾਗੂਚੀ ਨੂੰ ਹਰਾਇਆ। ਉਸ ਨੇ ਪੂਰੇ ਟੂਰਨਾਮੈਂਟ ’ਚ ਆਪਣੇ ਸਾਰੇ ਮੁਕਾਬਲੇ ਸਿੱਧੇ ਗੇਮਾਂ ’ਚ ਜਿੱਤ ਕੇ ਖਿਤਾਬ ਆਪਣੇ ਨਾਂ ਕੀਤਾ। ਸਿੰਧੂ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਹਮਵਤਨ ਉੱਨਤੀ ਹੁੱਡਾ ਵਿਰੁੱਧ ਕਰੇਗੀ।
ਦੂਜੇ ਦੌਰ ’ਚ ਉਸ ਦਾ ਸਾਹਮਣਾ ਚੀਨ ਦੀ ਚੌਥੀ ਦਰਜਾ ਪ੍ਰਾਪਤ ਚੇਨ ਯੂ ਫੇਈ ਨਾਲ ਹੋ ਸਕਦਾ ਹੈ। ਮਹਿਲਾ ਸਿੰਗਲਜ਼ ’ਚ ਭਾਰਤ ਦੀ ਹੋਰ ਖਿਡਾਰਨ ਦੇਵਿਕਾ ਸਿਹਾਗ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਥਾਈਲੈਂਡ ਦੀ ਬੁਸਾਨਨ ਓਂਗਬਾਮਰੁੰਗਫਾਨ ਵਿਰੁੱਧ ਕਰੇਗੀ। ਪਿਛਲੇ ਮਹੀਨੇ ਸਿੰਗਾਪੁਰ ਓਪਨ ਸੁਪਰ 750 ਦਾ ਖਿਤਾਬ ਜਿੱਤਣ ਵਾਲੇ ਸਾਤਵਿਕ ਅਤੇ ਚਿਰਾਗ ਨੇ ਜਾਪਾਨ ਓਪਨ ਤੋਂ ਵੀ ਸਾਤਵਿਕ ਦੀ ਵਾਰ-ਵਾਰ ਉੱਭਰ ਰਹੀ ਮੋਢੇ ਦੀ ਸੱਟ ਦੇ ਕਾਰਨ ਨਾਂ ਵਾਪਸ ਲੈ ਲਿਆ ਸੀ।
ਹੁਣ ਦੋਵਾਂ ਨੇ ਵਿਸ਼ਵ ਚੈਂਪੀਅਨਸ਼ਿਪ ਤੋਂ ਪਹਿਲਾਂ ਪੂਰੀ ਤਰ੍ਹਾਂ ਫਿੱਟ ਹੋਣ ਦੇ ਉਦੇਸ਼ ਨਾਲ ਚੀਨ ਓਪਨ ਨਹੀਂ ਖੇਡਣ ਦਾ ਫੈਸਲਾ ਕੀਤਾ ਹੈ। ਵਿਸ਼ਵ ਚੈਂਪੀਅਨਸ਼ਿਪ 17 ਸਾਲ ਬਾਅਦ ਭਾਰਤ ’ਚ ਆਯੋਜਿਤ ਹੋਣ ਜਾ ਰਹੀ ਹੈ। ਪੁਰਸ਼ ਸਿੰਗਲਜ਼ ’ਚ ਭਾਰਤ ਦੀ ਚੁਣੌਤੀ ਦਾ ਜ਼ਿੰਮਾ ਪੈਰਿਸ ਓਲੰਪਿਕ ਦੇ ਸੈਮੀਫਾਈਨਲਿਸਟ ਲਕਸ਼ੈ ਸੇਨ, ਵਿਸ਼ਵ ਰੈਂਕਿੰਗ ’ਚ 24ਵੇਂ ਸਥਾਨ ’ਤੇ ਕਾਬਜ਼ ਆਯੂਸ਼ ਸ਼ੈੱਟੀ ਅਤੇ ਤਜ਼ਰੇਬਕਾਰ ਐੱਚ. ਐੱਸ. ਪ੍ਰਣੋਏ ਸੰਭਾਲੇਗਾ। ਮਿਕਸਡ ਡਬਲਜ਼ ’ਚ ਭਾਰਤ ਦੀਆਂ ਉਮੀਦਾਂ ਤਨੀਸ਼ਾ ਕ੍ਰਾਸਟੋ ਅਤੇ ਧਰੁਵ ਕਪਿਲਾ ਦੀ ਜੋੜੀ ’ਤੇ ਟਿਕੀਆਂ ਹੋਣਗੀਆਂ।