ਨਵੀਂ ਦਿੱਲੀ : ਸੋਨੀਆ ਗਾਂਧੀ ਦੀ ਕਿਤਾਬ ‘ਬਿਲੌਂਗਿੰਗ : ਏ ਜਰਨੀ ਆਫ਼ ਲਵ’ ਸੋਮਵਾਰ ਨੂੰ ਦਿੱਲੀ ਵਿਚ ਲਾਂਚ ਕੀਤੀ ਗਈ। ਪ੍ਰੋਗਰਾਮ ਦੀ ਸ਼ੁਰੂਆਤ ਵਿਚ ਸੋਨੀਆ ਦੇ ਜੀਵਨ ’ਤੇ ਇਕ ਸ਼ਾਰਟ ਫ਼ਿਲਮ ਦਿਖਾਈ ਗਈ, ਜਿਸ ਨੂੰ ਦੇਖ ਕੇ ਉਹ ਭਾਵੁਕ ਹੋ ਗਏ ਅਤੇ ਪ੍ਰਿਅੰਕਾ ਨੇ ਉਨ੍ਹਾਂ ਨੂੰ ਗਲੇ ਲਗਾ ਲਿਆ। ਇਸ ਦੌਰਾਨ ਸੋਨੀਆ ਨੇ ਕਿਹਾ— ‘ਬਿਲੌਂਗਿੰਗ’ ਦੂਜੇ ਦੇਸ਼ ਤੋਂ ਆ ਕੇ ਇੱਥੇ ਜੁੜਨ ਲਈ ਕੀਤੀ ਗਈ ਸਖ਼ਤ ਮਿਹਨਤ ਦਾ ਨਾਂ ਹੈ। ਪ੍ਰੋਗਰਾਮ ਵਿਚ ਰਾਹੁਲ-ਪ੍ਰਿਅੰਕਾ ਦੇ ਨਾਲ ਕਾਂਗਰਸ ਸ਼ਾਸਿਤ ਸੂਬਿਆਂ ਹਿਮਾਚਲ ਪ੍ਰਦੇਸ਼, ਤੇਲੰਗਾਨਾ, ਕੇਰਲਮ ਅਤੇ ਕਰਨਾਟਕ ਦੇ ਮੁੱਖ ਮੰਤਰੀ ਮੌਜੂਦ ਸਨ।
ਪਹਿਲੀ ਲਾਈਨ ਵਿਚ ਅਖਿਲੇਸ਼-ਡਿੰਪਲ, ਰਾਹੁਲ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਵਿਜੇ ਦੇ ਨਾਲ ਬੈਠੇ ਸਨ। ਇਸ ਪ੍ਰੋਗਰਾਮ ਵਿਚ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੀ ਮੌਜੂਦਗੀ ਵੀ ਅਹਿਮ ਰਹੀ, ਜੋ ਹੁਣ ਭਾਰਤੀ ਜਨਤਾ ਪਾਰਟੀ ਦੇ ਮੈਂਬਰ ਹਨ। ਸੋਨੀਆ ਦੀ ਕਿਤਾਬ 10 ਨਵੰਬਰ ਨੂੰ ਹੀ ਬਾਜ਼ਾਰ ਵਿਚ ਆ ਚੁੱਕੀ ਹੈ। ਇਸ ਵਿਚ ਉਨ੍ਹਾਂ ਨੇ ਆਪਣੇ ਜੀਵਨ ਦੇ ਨਿੱਜੀ ਅਤੇ ਸਿਆਸੀ ਤਜ਼ਰਬਿਆਂ ਦਾ ਵਰਣਨ ਕੀਤਾ ਹੈ। ਇਸ ਵਿਚ ਇਟਲੀ ਵਿਚ ਬਿਤਾਏ ਬਚਪਨ, ਭਾਰਤ ਆਉਣ, ਰਾਜੀਵ ਗਾਂਧੀ ਨਾਲ ਵਿਆਹ ਅਤੇ ਭਾਰਤੀ ਸੱਭਿਆਚਾਰ ਨੂੰ ਅਪਣਾਉਣ ਦੀ ਯਾਤਰਾ ਦਾ ਜ਼ਿਕਰ ਹੈ। ਪੁਸਤਕ ਵਿਚ ਗਾਂਧੀ ਪਰਿਵਾਰ ਦੇ ਜੀਵਨ, ਔਖੇ ਹਾਲਾਤ, ਸੰਘਰਸ਼ਾਂ ਅਤੇ ਭਾਵਨਾਤਮਕ ਤਜ਼ਰਬਿਆਂ ਨੂੰ ਵੀ ਪੇਸ਼ ਕੀਤਾ ਗਿਆ ਹੈ।
ਮੈਨੂੰ ਵੀ ਆਪਣੀ ਸੱਸ ਤੋਂ ਲੱਗਦਾ ਸੀ ਡਰ
ਸੋਨੀਆ ਨੇ ਕਿਹਾ ਕਿ ਜਿਵੇਂ ਹਰ ਨੂੰਹ ਨੂੰ ਸੱਸ ਤੋਂ ਡਰ ਲੱਗਦਾ ਹੈ, ਮੈਨੂੰ ਵੀ ਆਪਣੀ ਸੱਸ ਇੰਦਰਾ ਜੀ ਤੋਂ ਡਰ ਲੱਗਦਾ ਸੀ। ਉਨ੍ਹਾਂ ਦੇ ਗੁੱਸੇ ਤੋਂ ਬਾਅਦ ਰਾਜੀਵ ਅਤੇ ਸੰਜੇ ਕਹਿੰਦੇ ਸਨ, ਚਲੋ ਤੂਫ਼ਾਨ ਲੰਘ ਗਿਆ। ਰਾਹੁਲ ਅਤੇ ਪ੍ਰਿਅੰਕਾ ਦੇ ਜਨਮ ਤੋਂ ਬਾਅਦ ਉਹ ਬਦਲ ਗਏ। ਸੋਨੀਆ ਨੇ ਦੱਸਿਆ ਕਿ ਰਾਜੀਵ ਜਦੋਂ ਪਾਇਲਟ ਸਨ ਤਾਂ ਉਨ੍ਹਾਂ ਦੀਆਂ ਹਫ਼ਤੇ ਵਿਚ ਦੋ ਫਲਾਈਟਾਂ ਹੁੰਦੀਆਂ ਸਨ। ਉਹ ਇੰਡੀਆ ਗੇਟ ’ਤੇ ਆਈਸਕ੍ਰੀਮ ਖੁਆਉਣ ਲੈ ਜਾਂਦੇ ਸਨ।