ਸਟਟਗਾਰਟ (ਜਰਮਨੀ) : ਸਟਾਰ ਟੈਨਿਸ ਖਿਡਾਰੀ ਏਲੀਨਾ ਰਿਬਾਕਿਨਾ ਨੇ ਐਤਵਾਰ ਨੂੰ ਆਪਣੀ ਸ਼ਾਨਦਾਰ ਫਾਰਮ ਜਾਰੀ ਰੱਖਦੇ ਹੋਏ ਪੋਰਸ਼ ਟੈਨਿਸ ਗ੍ਰੈਂਡ ਪ੍ਰੀ ਦਾ ਖ਼ਿਤਾਬ ਦੂਜੀ ਵਾਰ ਆਪਣੇ ਨਾਮ ਕਰ ਲਿਆ ਹੈ। ਜਰਮਨੀ ਦੇ ਸਟਟਗਾਰਟ ਵਿੱਚ ਖੇਡੇ ਗਏ ਫਾਈਨਲ ਮੁਕਾਬਲੇ ਵਿੱਚ ਦੁਨੀਆ ਦੀ ਦੂਜੀ ਰੈਂਕਿੰਗ ਵਾਲੀ ਰਿਬਾਕਿਨਾ ਨੇ ਕੈਰੋਲੀਨਾ ਮੁਚੋਵਾ ਨੂੰ ਸਿੱਧੇ ਸੈੱਟਾਂ ਵਿੱਚ 7-5, 6-1 ਨਾਲ ਹਰਾ ਕੇ ਟਰਾਫੀ 'ਤੇ ਕਬਜ਼ਾ ਕੀਤਾ।
ਕਰੀਅਰ ਵਿੱਚ ਪਹਿਲੀ ਵਾਰ ਦੁਹਰਾਇਆ ਖ਼ਿਤਾਬ
26 ਸਾਲਾ ਰਿਬਾਕਿਨਾ ਲਈ ਇਹ ਜਿੱਤ ਬੇਹੱਦ ਖਾਸ ਹੈ ਕਿਉਂਕਿ ਇਹ ਪਹਿਲੀ ਵਾਰ ਹੈ ਜਦੋਂ ਉਸਨੇ ਕਿਸੇ ਖ਼ਿਤਾਬ ਨੂੰ ਦੁਬਾਰਾ ਜਿੱਤਿਆ ਹੈ। ਇਸ ਤੋਂ ਪਹਿਲਾਂ ਰਿਬਾਕਿਨਾ ਨੇ ਵੱਖ-ਵੱਖ ਟੂਰਨਾਮੈਂਟਾਂ ਵਿੱਚ 12 ਖ਼ਿਤਾਬ ਜਿੱਤੇ ਸਨ, ਪਰ ਕਦੇ ਵੀ ਕਿਸੇ ਇੱਕ ਟੂਰਨਾਮੈਂਟ ਵਿੱਚ ਦੂਜੀ ਵਾਰ ਜੇਤੂ ਨਹੀਂ ਬਣੀ ਸੀ। ਉਸਨੇ ਇਹ ਫਾਈਨਲ ਮੁਕਾਬਲਾ ਮਹਿਜ਼ ਇੱਕ ਘੰਟੇ 18 ਮਿੰਟ ਵਿੱਚ ਜਿੱਤ ਕੇ ਆਪਣੀ ਮਜ਼ਬੂਤ ਦਾਅਵੇਦਾਰੀ ਪੇਸ਼ ਕੀਤੀ।
ਮੁਚੋਵਾ ਦੀਆਂ ਉਮੀਦਾਂ 'ਤੇ ਫਿਰਿਆ ਪਾਣੀ
ਕੈਰੋਲੀਨਾ ਮੁਚੋਵਾ ਇਸ ਸਾਲ ਆਪਣਾ ਦੂਜਾ ਫਾਈਨਲ ਖੇਡ ਰਹੀ ਸੀ। ਇਸ ਤੋਂ ਪਹਿਲਾਂ ਉਹ ਕਤਰ ਵਿੱਚ ਖ਼ਿਤਾਬ ਜਿੱਤ ਚੁੱਕੀ ਸੀ ਅਤੇ ਇੱਥੇ ਆਪਣੇ ਕਰੀਅਰ ਦਾ ਤੀਜਾ ਖ਼ਿਤਾਬ ਜਿੱਤਣ ਦੀ ਕੋਸ਼ਿਸ਼ ਵਿੱਚ ਸੀ, ਪਰ ਰਿਬਾਕਿਨਾ ਦੇ ਤੇਜ਼-ਤਰਾਰ ਖੇਡ ਅੱਗੇ ਉਹ ਟਿਕ ਨਹੀਂ ਸਕੀ।