ਸੈਂਟਾ ਕਲਾਰਾ (ਅਮਰੀਕਾ) : ਫੋਲੇਰਿਨ ਬੇਲੋਗਨ ਨੇ ਬੁੱਧਵਾਰ ਰਾਤ ਵਿਸ਼ਵ ਕੱਪ ਦੇ ਰਾਊਂਡ ਆਫ਼ 32 ਮੈਚ ’ਚ ਬੋਸਨੀਆ-ਹਰਜ਼ੇਗੋਵਿਨਾ ਵਿਰੁੱਧ ਟੂਰਨਾਮੈਂਟ ਦਾ ਆਪਣਾ ਤੀਜਾ ਗੋਲ ਕਰ ਕੇ ਅਮਰੀਕਾ ਨੂੰ ਬੜ੍ਹਤ ਦਿਵਾਈ ਪਰ ਦੂਜੇ ਹਾਫ਼ ਦੀ ਸ਼ੁਰੂਆਤ ’ਚ ਉਸ ਨੂੰ ਲਾਲ ਕਾਰਡ ਮਿਲਿਆ, ਜਿਸ ਕਾਰਨ ਮੇਜ਼ਬਾਨ ਟੀਮ ਨੂੰ 2-0 ਦੀ ਜਿੱਤ ਦੌਰਾਨ ਬਾਕੀ ਮੈਚ 10 ਖਿਡਾਰੀਆਂ ਨਾਲ ਖੇਡਣਾ ਪਿਆ। ਅਮਰੀਕਾ ਨੇ ਇਤਿਹਾਸ ’ਚ ਸਿਰਫ ਦੂਸਰਾ ਅਤੇ 2002 ਤੋਂ ਬਾਅਦ ਪਹਿਲਾ ਵਿਸ਼ਵ ਕੱਪ ਨਾਕਆਊਟ ਮੈਚ ਜਿੱਤਿਆ।
ਬੇਲੋਗਨ ਨੇ ਐੱਨ. ਬੀ. ਏ. ਦੇ ਲੇਬਰੋਨ ਜੇਮਜ਼ ਦੇ ‘ਦਿ ਸਾਈਲੈਂਸਰ’ ਮੂਵ ਨਾਲ 2 ਵਾਰ ਗੋਲ ਦਾ ਜਸ਼ਨ ਮਨਾਇਆ। ਉਸ ਨੇ ਪਹਿਲੀ ਵਾਰ ਜਦੋਂ ਗੋਲ ਕੀਤਾ ਸੀ ਤਾਂ ਆਫ਼ ਸਾਈਡ ਕਾਰਨ ਗੋਲ ਨੂੰ ਰੱਦ ਕਰ ਦਿੱਤਾ ਗਿਆ। ਤਾਰਿਕ ਮੁਹਰੇਮੋਵਿਚ ਦੇ ਸੱਜੇ ਗਿੱਟੇ ’ਤੇ ਪੈਰ ਰੱਖਣ ਕਾਰਨ ਉਸ ਨੂੰ ਬ੍ਰਾਜ਼ੀਲ ਦੇ ਰੈਫਰੀ ਰਾਫੇਲ ਕਲੌਸ ਨੇ 64ਵੇਂ ਮਿੰਟ ’ਚ ਲਾਲ ਕਾਰਡ ਦਿਖਾਇਆ। ਕਲੌਸ ਨੇ ਸ਼ੁਰੂ ’ਚ ਕਾਰਡ ਦਾ ਇਸ਼ਾਰਾ ਨਹੀਂ ਕੀਤਾ ਪਰ ਵੀਡੀਓ ਰਿਵਿਊ ਤੋਂ ਬਾਅਡ ਬੇਲੋਗਨ ਨੂੰ ਲਾਲ ਕਾਰਡ ਦਿਖਾਇਆ।
ਅਮਰੀਕਾ ਦੇ ਕੋਚ ਮੌਰਿਸਿਓ ਪੋਚੇਤੀਨੋ ਨੇ ਕਿਹਾ, ‘‘ਇਹ ਕਦੇ ਵੀ ਜਾਣਬੁਝ ਕੇ ਨਹੀਂ ਕੀਤਾ ਗਿਆ ਸੀ। ਇਹ ਕਦੇ ਵੀ ਲਾਲ ਕਾਰਡ ਨਹੀਂ ਹੁੰਦਾ। ਕਦੇ ਨਹੀਂ।’’ ਬੇਲੋਗਨ ਹੁਣ ਸੋਮਵਾਰ ਨੂੰ ਬੈਲਜੀਅਮ ਵਿਰੁੱਧ ਹੋਣ ਵਾਲੇ ਪ੍ਰੀ-ਕੁਆਰਟਰ ਫਾਈਨਲ ਮੈਚ ਤੋਂ ਮੁਅੱਤਲ ਰਹਿਣਗੇ। ਡਿਫੈਂਡਰ ਕ੍ਰਿਸ ਰਿਚਰਡਜ਼ ਨੇ ਕਿਹਾ, ‘‘ਅਸੀਂ ਉਸ ਨੂੰ ਕਿਹਾ ਕਿ ਅਸੀਂ ਉਸ ਦੇ ਨਾਲ ਹਾਂ। ਅਸੀਂ 26 ਲੋਕਾਂ ਦੀ ਟੀਮ ਹਾਂ, ਸਿਰਫ਼ ਇਕ ਦੀ ਨਹੀਂ। ਜੇਕਰ ਇਕ ਖਿਡਾਰੀ ਬਾਹਰ ਹੋ ਜਾਂਦਾ ਹੈ ਤਾਂ ਦੂਜਾ ਖਿਡਾਰੀ ਅੱਗੇ ਆਉਂਦਾ ਹੈ।’’
ਇਸ ਤੋਂ ਪਹਿਲਾਂ 31ਵੇਂ ਮਿੰਟ ’ਚ ਆਫ਼ ਸਾਈਡ ਕਾਰਨ ਬੇਲੋਗਨ ਦਾ ਗੋਲ ਰੱਦ ਹੋਣ ਤੋਂ ਬਾਅਦ ਉਸ ਨੇ 45ਵੇਂ ਮਿੰਟ ’ਚ ਅਮਰੀਕਾ ਨੂੰ ਬੜ੍ਹਤ ਦਿਵਾਈ। ਮਲਿਕ ਟਿਲਮੈਨ ਦੇ ਪਾਸ ਨੂੰ ਬੋਸਨੀਆ ਦੇ ਸਟਜੇਪਨ ਰਾਡੈਲਜਿਕ ਨੇ ਸਲਾਈਡਿੰਗ ਕਰ ਕੇ ਕਲੀਅਰ ਕਰਨ ਦੀ ਕੋਸ਼ਿਸ਼ ’ਚ ਬੇਲੋਗਨ ਵੱਲ ਮੋੜ ਦਿੱਤਾ ਸੀ। ਗੇਂਦ ਮੁਹਰੇਮੋਵਿਕ ਦੇ ਪੈਰ ਨਾਲ ਟਕਰਾ ਕੇ ਬੇਲੋਗਨ ਦੇ ਸਾਹਮਣੇ ਆਈ। ਉਸ ਨੇ ਆਪਣੇ ਖੱਬੇ ਪੈਰ ਨਾਲ ਸ਼ਾਨਦਾਰ ਸ਼ਾਟ ਲਾ ਕੇ ਗੋਲਕੀਪਰ ਨਿਕੋਲਾ ਵਾਸਿਲਜ ਨੂੰ ਚਕਮਾ ਦੇ ਕੇ ਗੋਲ ਕਰ ਦਿੱਤਾ। ਇਹ ਟੂਰਨਾਮੈਂਟ ’ਚ ਉਸ ਦਾ ਤੀਜਾ ਅਤੇ ਕੁੱਲ ਮਿਲਾ ਕੇ 12ਵਾਂ ਕੌਮਾਂਤਰੀ ਗੋਲ ਸੀ। ਟਿਲਮੈਨ ਨੇ ਇਸ ਤੋਂ ਬਾਅਦ ਦੂਜੇ ਹਾਫ਼ ’ਚ 82ਵੇਂ ਮਿੰਟ ’ਚ ਇਕ ਹੋਰ ਗੋਲ ਦਾਗ ਕੇ ਅਮਰੀਕਾ ਦੀ ਜਿੱਤ ਯਕੀਨੀ ਕੀਤੀ। ਬੇਲੋਗਨ ਵਿਸ਼ਵ ਕੱਪ ਨਾਕਆਊਟ ਮੈਚ ’ਚ ਗੋਲ ਕਰਨ ਅਤੇ ਫਿਰ ਬਾਹਰ ਭੇਜੇ ਜਾਣ ਵਾਲਾ ਤੀਜਾ ਖਿਡਾਰੀ ਬਣ ਗਿਆ। ਉਸ ਤੋਂ ਪਹਿਲਾਂ 2002 ’ਚ ਇੰਗਲੈਂਡ ਵਿਰੁੱਧ ਕੁਆਰਟਰ ਫਾਈਨਲ ’ਚ ਬ੍ਰਾਜ਼ੀਲ ਦੇ ਰੋਨਾਲਡੀਨਹੋ ਅਤੇ 2006 ’ਚ ਇਟਲੀ ਵਿਰੁੱਧ ਫਾਈਨਲ ’ਚ ਫਰਾਂਸ ਦੇ ਜਿਨੇਦਿਨ ਜਿਦਾਨ ਨਾਲ ਅਜਿਹਾ ਹੋ ਚੁੱਕਾ ਹੈ।
-ਬੇਲੋਗਨ ਲਾਲ ਕਾਰਡ ਪਾਉਣ ਵਾਲਾ ਅਮਰੀਕਾ ਦਾ 5ਵਾਂ ਖਿਡਾਰੀ
ਫੋਲਾਰਿਨ ਬੇਲੋਗਨ ਵਿਸ਼ਵ ਕੱਪ ’ਚ ਅਮਰੀਕਾ ਦੇ ਇਤਿਹਾਸ ’ਚ ਲਾਲ ਕਾਰਡ ਪਾਉਣ ਵਾਲਾ 5ਵਾਂ ਖਿਡਾਰੀ ਬਣਾ ਗਿਆ ਹੈ। ਉਸ ਤੋਂ ਪਹਿਲਾਂ 1990 ’ਚ ਚੈਕੋਸਲੋਵਾਕੀਆ ਵਿਰੁੱਧ ਐਰਿਕ ਵਿਨਾਲਡਾ, 1994 ’ਚ ਬ੍ਰਾਜ਼ੀਲ ਵਿਰੁੱਧ ਫਰਨਾਂਡੋ ਕਲੇਵਿਜੋ ਤੇ 2006 ’ਚ ਇਟਲੀ ਵਿਰੁੱਧ ਪਾਬਲੋ ਮਾਸਟ੍ਰੋਨੀ ਤੇ ਐਡੀ ਪੋਪ ਨੂੰ ਲਾਲ ਕਾਰਡ ਮਿਲਿਆ ਸੀ।