ਨਵੀਂ ਦਿੱਲੀ : ਮਈ ’ਚ ਥੋਕ ਮੁੱਲ ਮਹਿੰਗਾਈ (ਡਬਲਿਊ. ਪੀ. ਆਈ.) ਘਟ ਕੇ 0.39 ਫ਼ੀਸਦੀ ਰਹਿ ਗਈ ਹੈ। ਅਪ੍ਰੈਲ ’ਚ ਥੋਕ ਮੁੱਲ ਮਹਿੰਗਾਈ ਆਧਾਰਿਤ ਮਹਿੰਗਾਈ ਦਰ 0.85 ਫ਼ੀਸਦੀ ਸੀ, ਜਦੋਂ ਕਿ ਪਿਛਲੇ ਸਾਲ ਮਈ ’ਚ ਇਹ 2.74 ਫ਼ੀਸਦੀ ਸੀ। ਅੱਜ ਜਾਰੀ ਸਰਕਾਰੀ ਅੰਕੜਿਆਂ ’ਚ ਇਹ ਗੱਲ ਸਾਹਮਣੇ ਆਈ।
ਉਦਯੋਗ ਮੰਤਰਾਲਾ ਨੇ ਇਕ ਬਿਆਨ ’ਚ ਕਿਹਾ ਕਿ ਮਈ 2025 ’ਚ ਮਹਿੰਗਾਈ ਦੀ ਸਕਾਰਾਤਮਕ ਦਰ ਮੁੱਖ ਤੌਰ ’ਤੇ ਖੁਰਾਕੀ ਉਤਪਾਦਾਂ, ਬਿਜਲੀ, ਹੋਰ ਵਿਨਿਰਮਾਣ, ਰਸਾਇਣ ਅਤੇ ਰਾਸਾਇਣਿਕ ਉਤਪਾਦਾਂ, ਹੋਰ ਟ੍ਰਾਂਸਪੋਰਟ ਉਪਕਰਣਾਂ ਦੇ ਨਿਰਮਾਣ ਅਤੇ ਗੈਰ-ਖੁਰਾਕੀ ਵਸਤਾਂ ਆਦਿ ਦੇ ਨਿਰਮਾਣ ਦੀਆਂ ਕੀਮਤਾਂ ’ਚ ਵਾਧੇ ਕਾਰਨ ਹੈ।
ਸੂਚਕ ਅੰਕ ਦੇ ਅੰਕੜਿਆਂ ਅਨੁਸਾਰ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ’ਚ ਮਈ ’ਚ 1.56 ਫ਼ੀਸਦੀ ਦੀ ਗਿਰਾਵਟ ਵੇਖੀ ਗਈ, ਜਦੋਂ ਕਿ ਅਪ੍ਰੈਲ ’ਚ ਇਨ੍ਹਾਂ ’ਚ 0.86 ਫ਼ੀਸਦੀ ਦੀ ਗਿਰਾਵਟ ਆਈ ਸੀ। ਸਬਜ਼ੀਆਂ ਦੇ ਮੁੱਲ ’ਚ ਭਾਰੀ ਗਿਰਾਵਟ ਆਈ। ਸਬਜ਼ੀਆਂ ਮਈ ’ਚ 21.62 ਫ਼ੀਸਦੀ ਸਸਤੀਆਂ ਹੋਈਆਂ, ਜਦੋਂ ਕਿ ਅਪ੍ਰੈਲ ’ਚ ਇਨ੍ਹਾਂ ਦੀਆਂ ਕੀਮਤਾਂ 18.26 ਫ਼ੀਸਦੀ ਘਟੀਆਂ ਸਨ। ਵਿਨਿਰਮਤ ਉਤਪਾਦਾਂ ’ਚ ਮਹਿੰਗਾਈ 2.04 ਫ਼ੀਸਦੀ ਰਹੀ, ਜਦੋਂ ਕਿ ਅਪ੍ਰੈਲ ’ਚ ਇਹ 2.62 ਫ਼ੀਸਦੀ ਸੀ। ਈਂਧਨ ਅਤੇ ਬਿਜਲੀ ’ਚ ਵੀ ਮਈ ’ਚ ਮਹਿੰਗਾਈ 2.27 ਫ਼ੀਸਦੀ ਰਹੀ, ਜਦੋਂ ਕਿ ਅਪ੍ਰੈਲ ’ਚ ਇਹ 2.18 ਫ਼ੀਸਦੀ ਸੀ।
ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਮਾਨੇਟਰੀ ਪਾਲਿਸੀ ਤਿਆਰ ਕਰਦੇ ਸਮੇਂ ਮੁੱਖ ਤੌਰ ’ਤੇ ਪ੍ਰਚੂਨ ਮਹਿੰਗਾਈ ਨੂੰ ਧਿਆਨ ’ਚ ਰੱਖਦਾ ਹੈ। ਪਿਛਲੇ ਹਫ਼ਤੇ ਜਾਰੀ ਅੰਕੜਿਆਂ ਤੋਂ ਪਤਾ ਲੱਗਦਾ ਹੈ ਕਿ ਪ੍ਰਚੂਨ ਮਹਿੰਗਾਈ ਮਈ ’ਚ 6 ਸਾਲਾਂ ਦੇ ਹੇਠਲੇ ਪੱਧਰ 2.82 ਫ਼ੀਸਦੀ ’ਤੇ ਆ ਗਈ। ਇਸ ਦੀ ਮੁੱਖ ਵਜ੍ਹਾ ਖਾਣ-ਪੀਣ ਦੀਆਂ ਵਸਤਾਂ ਦੀਆਂ ਕੀਮਤਾਂ ’ਚ ਨਰਮੀ ਹੈ।