ਮੁੰਬਈ : ਮੁੰਬਈ ਹਾਈ ਕੋਰਟ ਨੇ ਬੁੱਧਵਾਰ ਨੂੰ ਅਨਿਲ ਅੰਬਾਨੀ ਨੂੰ ਧੋਖਾਦੇਹੀ ਮਾਮਲੇ ’ਚ ਰਾਹਤ ਦੇ ਦਿੱਤੀ ਹੈ। ਅਦਾਲਤ ਨੇ ਅਨਿਲ ਅੰਬਾਨੀ ਅਤੇ ਉਨ੍ਹਾਂ ਦੀ ਕੰਪਨੀ ਰਿਲਾਇੰਸ ਕਮਿਊਨੀਕੇਸ਼ਨਜ਼ ਲਿਮਟਿਡ ਦੇ ਖਾਤਿਆਂ ਨੂੰ ‘ਧੋਖਾਦੇਹੀ’ ਖਾਤੇ ਐਲਾਨਣ ਦੀ ਮੰਗ ਕਰ ਰਹੇ 3 ਬੈਂਕਾਂ ਦੀਆਂ ਸਾਰੀਆਂ ਕਾਰਵਾਈਆਂ ’ਤੇ ਰੋਕ ਲਾ ਦਿੱਤੀ।
ਜਸਟਿਸ ਮਿਲਿੰਦ ਜਾਧਵ ਨੇ ਗੌਰ ਕੀਤਾ ਕਿ ਇਹ ਕਾਰਵਾਈ ਬਾਹਰੀ ਆਡੀਟਰ ‘ਬੀ. ਡੀ. ਓ. ਐੱਲ. ਐੱਲ. ਪੀ.’ ਵੱਲੋਂ ਤਿਆਰ ਕੀਤੀ ਗਈ ਫਾਰੈਂਸਿਕ ਆਡਿਟ ਰਿਪੋਰਟ ’ਤੇ ਆਧਾਰਿਤ ਹੈ। ਜੱਜ ਨੇ ਕਿਹਾ ਕਿ ਇਸ ਰਿਪੋਰਟ ’ਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ ਕਿਉਂਕਿ ਇਹ ਭਾਰਤੀ ਰਿਜ਼ਰਵ ਬੈਂਕ ਦੇ ਧੋਖਾਦੇਹੀ ਸਬੰਧੀ 2024 ਦੇ ਮਾਸਟਰ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਜ਼ਰੂਰੀ ਤੌਰ ’ਤੇ ਚਾਰਟਰਡ ਅਕਾਊਂਟੈਂਟ (ਸੀ. ਏ.) ਵੱਲੋਂ ਦਸਖ਼ਤ ਕੀਤੀ ਹੋਈ ਨਹੀਂ ਸੀ। ਅਨਿਲ ਅੰਬਾਨੀ ਨੇ ਇੰਡੀਅਨ ਓਵਰਸੀਜ਼ ਬੈਂਕ, ਆਈ. ਡੀ. ਬੀ. ਆਈ. ਅਤੇ ਬੈਂਕ ਆਫ ਬੜੌਦਾ ਵੱਲੋਂ ਜਾਰੀ ਕੀਤੇ ਗਏ ਕਾਰਨ ਦੱਸੋ ਨੋਟਿਸ ਨੂੰ ਚੁਣੌਤੀ ਦਿੱਤੀ ਸੀ।