ਹਲਕਾ ਰਾਮਪੁਰਾ ਫੂਲ ਵਿਚ ਆਪ ਦੇ ਬੇੜੇ 'ਚੋਂ ਉਤਰੇ ਸਵਾਰ ਕੀ ਮਲਾਹ ਨੂੰ ਵੀ ਲੈ ਡੁੱਬਣਗੇ

ਭਗਤਾ ਭਾਈ 3 ਅਕਤੂਬਰ (ਸਿਕੰਦਰ ਸਿੰਘ ਕੋਇਰ ਸਿੰਘ ਵਾਲਾ)-ਸੂਬੇ ਅੰਦਰ ਵਿਰੋਧੀ ਪਾਰਟੀਆਂ ਨੂੰ ਸਿਰ ਚੱਕਣ ਨਾ ਦੇ ਰਹੇ ਭਗਵੰਤ ਮਾਨ ਦੀ ਲੋਕਪ੍ਰੀਅਤਾ ਸਿਖਰਾਂ 'ਤੇ ਹੈ ਪਰ ਦੂਸਰੇ ਪਾਸੇ ਕਈ ਹਲਕਿਆਂ ਵਿਚ ਉਥੋਂ ਦੇ ਆਗੂਆਂ ਦੀ ਕਾਰਜਸ਼ੈਲੀ ਤੋਂ ਨਾਖ਼ੁਸ਼ ਲੋਕ ਹਨ। ਇਸੇ ਤਰ੍ਹਾਂ ਹਲਕਾ ਰਾਮਪੁਰਾ ਫੂਲ ਵਿਚ ਜਿੱਥੇ ਸਰਕਾਰ ਦੇ ਪੰਜ ਸਾਲਾਂ ਦੌਰਾਨ ਹਲਕੇ ਅੰਦਰ ਕੋਈ ਵੱਡਾ ਪ੍ਰਾਜੈਕਟ ਨਹੀ ਲਗਾਇਆ ਗਿਆ । ਲੋਕਾਂ ਨੂੰ ਅਫਸੋਸ ਹੈ ਉਥੇ ਹਲਕਾ ਵਿਧਾਇਕ ਦੀ ਬੇਰੁਖੀ ਤੋਂ ਖਫਾ ਪਾਰਟੀ ਦਾ ਮੁੱਢ ਬੰਨਣ ਵਾਲੇ ਆਗੂਆਂ ਦਾ ਪਾਰਟੀ ਗਤੀਵਿਧੀਆਂ ਤੋਂ ਦੂਰ ਹੋਣਾ ਵੀ ਸ਼ੰਕੇ ਪੈਦਾ ਕਰ ਰਿਹਾ। ਪਾਰਟੀ ਦੀ ਹੋਂਦ ਸਮੇਂ ਜਿਨ੍ਹਾ ਵਰਕਰਾਂ ਨੇ ਮੋਢੀ ਬਣ ਕੇ ਪਾਰਟੀ ਦੀ ਕਾਮਯਾਬੀ ਲਈ ਸਿਰਤੋੜ ਯਤਨ ਕੀਤੇ ਉਨ੍ਹਾਂ 'ਚੋਂ ਕੋਈ ਇਕ ਵੀ ਹਲਕਾ ਰਾਮਪੁਰਾਫੂਲ ਦੇ ਲੋਕਾਂ ਵਿਚ ਵਿਚਰਦਾ ਨਜ਼ਰ ਨਹੀਂ ਆ ਰਿਹਾ।
ਪਿੰਡਾ ਦੇ ਕੁਝ ਘੜੰਮ ਚੌਧਰੀ ਆਪਣੇ ਪਿੰਡਾ ਵਿੱਚ ਆਮ ਲੋਕਾ ਨੂੰ ਤੰਗ ਪ੍ਰੇਸ਼ਾਨ ਕਰ ਰਹੇ ਹਨ ਜਿਸ ਦਾ ਜਵਾਬ ਲੋਕ ਆਉਂਦੀਆ ਵਿਧਾਨ ਸਭਾ ਦੀਆ ਚੌਣਾ ਦੌਰਨ ਦੇਣਗੇ
ਪਾਰਟੀ ਵਿਚ ਸ਼ਾਮਲ ਨਵੇਂ ਜੁਗਾੜੂ ਆਗੂ ਅੱਗੇ ਹੋ ਕੇ ਲੀਡਰੀ ਚਮਕਾ ਰਹੇ ਹਨ। ਜਿਸ ਤੋਂ ਸਾਫ ਨਜ਼ਰ ਆਉਂਦਾ ਹੈ ਪਾਰਟੀ ਨੂੰ ਖੜ੍ਹੇ ਕਰਨ ਵਾਲੇ ਪੁਰਾਣੇ ਆਗੂਆਂ ਨੂੰ ਹਾਸ਼ੀਏ 'ਤੇ ਧੱਕ ਦਿੱਤਾ ਗਿਆ ਹੈ। ਲੱਗਦਾ ਹਲਕਾ ਰਾਮਪੁਰਾ ਫੂਲ ਦੇ ਪੁਰਾਣੇ ਆਗੂ ਪਾਰਟੀ ਦੀ ਹਾਈਕਮਾਂਡ ਨਾਲੋਂ ਜਾਂ ਤਾਂ ਸੰਪਰਕ ਤੋੜੀ ਬੈਠੇ ਹਨ ਜਾਂ ਫਿਰ ਉਨ੍ਹਾਂ ਦੇ ਨਾਰਾਜ਼ ਹੋਣ ਦੀ ਭਿਣਕ ਹਾਈਕਮਾਂਡ ਨੂੰ ਲੱਗਣ ਨਹੀਂ ਦਿੱਤੀ ਜਾ ਰਹੀ। ਪਿਛਲੇ ਸਮੇਂ ਦੌਰਾਨ ਹਲਕੇ ਅੰਦਰ ਕਈ ਅਜਿਹੀਆਂ ਘਟਨਾਵਾਂ ਤੇ ਗਤੀਵਿਧੀਆਂ ਹੋਂਦ 'ਚ ਆਈਆਂ ਜਿਨ੍ਹਾਂ ਨੇ ਪਾਰਟੀ ਦੇ ਅਕਸ ਨੂੰ ਢਾਹ ਵੀ ਲਾਈ ਹੈ। ਪਿੰਡਾਂ ਦੀਆਂ ਸੱਥਾਂ ਵਿਚ ਇਹ ਵੀ ਚਰਚਾ ਹੈ ਕਿ ਹਲਕਾ ਵਿਧਾਇਕ ਨੂੰ ਇਸ ਗੱਲ ਦਾ ਗੁਮਾਨ ਜਾਂ ਹੰਕਾਰ ਹੈ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਕਾਰਜਸ਼ੈਲੀ ਹੀ ਉਨ੍ਹਾਂ ਨੂੰ ਹਲਕੇ ਵਿਚ ਦੁਬਾਰਾ ਜੇਤੂ ਬਣਾ ਕੇ ਕੱਢੇਗੀ। ਦੂਸਰੇ ਪਾਸੇ ਹਲਕਾ ਵਿਧਾਇਕ ਦਾ ਖੇਮਾ ਕਿਸੇ ਵੀ ਪੁਰਾਣੇ ਸੀਨੀਅਰ ਆਗੂਆਂ ਨੂੰ ਪੈਰ ਜਮਾਉਣ ਨਹੀਂ ਦੇ ਰਿਹਾ, ਸ਼ਾਇਦ ਇਸੇ ਕਰਕੇ ਹਲਕਾ ਵਿਧਾਇਕ ਦੇ ਖਿਲਾਫ ਅੰਦਰੂਨੀ ਜੰਗ ਚੋਣਾਂ ਦੇ ਨੇੜੇ ਜੱਗ ਜਾਹਰ ਹੋ ਸਕਦੀ ਹੈ।ਦੂਜੇ ਪਾਸੇ ਇਸ ਪਾਰਟੀ ਦੇ ਇੰਦਰਜੀਤ ਸਿੰਘ ਮਾਨ ਮਾਰਕਫੈੱਡ ਪੰਜਾਬ ਦੇ ਚੇਅਰਮੈਨ ਵੀ ਹਲਕੇ ਵਿੱਚ ਸਰਗਰਮ ਨਗਰ ਆ ਰਹੇ ਹਨ ਅਤੇ ਟਿਕਟ ਦੀ ਵੀ ਦਾਅਵੇਦਾਰੀ ਵਿੱਚ ਹਿੱਕ ਠੋਕ ਰਹੇ ਹਨ। ਹਲਕਾ ਵਿਧਾਇਕ ਦੇ ਕਰੀਬੀ ਵੀ ਚੇਅਰਮੈਨ ਮਾਨ ਨਾਲ ਰਾਬਤਾ ਕਾਇਮ ਕਰਦੇ ਦਿਖਾਈ ਦੇ ਰਹੇ ਹਨ।