ਚੀਨ ਨਾਲ ਵਧਦੇ ਤਣਾਅ ਵਿਚਾਲੇ ਆਪਣੀ ਫ਼ੌਜੀ ਆਧੁਨਿਕੀਕਰਨ ਮੁਹਿੰਮ ਨੂੰ ਤੇਜ਼ ਕਰਦਿਆਂ ਫਿਲੀਪੀਨਜ਼ ਭਾਰਤ ਨਾਲ ਆਪਣੇ ਰੱਖਿਆ ਸਹਿਯੋਗ ਦਾ ਵੱਡਾ ਵਿਸਥਾਰ ਕਰਨ ਜਾ ਰਿਹਾ ਹੈ। ਸੂਤਰਾਂ ਅਨੁਸਾਰ, ਮਨੀਲਾ ਵੱਲੋਂ ਭਾਰਤ ਤੋਂ ਬ੍ਰਹਮੋਸ ਸੁਪਰਸੋਨਿਕ ਕਰੂਜ਼ ਮਿਜ਼ਾਈਲ ਦੀਆਂ ਵਾਧੂ ਬੈਟਰੀਆਂ, ਆਕਾਸ਼ ਏਅਰ ਡਿਫੈਂਸ ਸਿਸਟਮ, ਪਿਨਾਕਾ ਰਾਕੇਟ ਲਾਂਚਰ, ਹੈਲੀਕਾਪਟਰ ਅਤੇ ਸਪੇਸ ਸੈਕਟਰ 'ਚ ਸਹਿਯੋਗ ਸਣੇ ਕਈ ਵੱਡੇ ਰੱਖਿਆ ਸੌਦਿਆਂ 'ਤੇ ਗੱਲਬਾਤ ਆਖ਼ਰੀ ਪੜਾਅ 'ਤੇ ਪਹੁੰਚ ਗਈ ਹੈ।
ਰੱਖਿਆ ਸੂਤਰਾਂ ਮੁਤਾਬਕ, ਫਿਲੀਪੀਨਜ਼ ਆਪਣੀਆਂ ਹਥਿਆਰਬੰਦ ਫ਼ੌਜਾਂ ਲਈ ਘੱਟੋ-ਘੱਟ 6 ਵਾਧੂ ਬ੍ਰਹਮੋਸ ਮਿਜ਼ਾਈਲ ਬੈਟਰੀਆਂ, 5 ਤੋਂ ਵੱਧ ਆਕਾਸ਼ ਏਅਰ ਡਿਫੈਂਸ ਰੈਜੀਮੈਂਟਾਂ ਅਤੇ ਪਿਨਾਕਾ ਮਲਟੀ-ਬੈਰਲ ਰਾਕੇਟ ਲਾਂਚਰਾਂ ਦੀਆਂ ਕਈ ਬੈਟਰੀਆਂ ਹਾਸਲ ਕਰਨ ਦੀਆਂ ਸੰਭਾਵਨਾਵਾਂ ਤਲਾਸ਼ ਰਿਹਾ ਹੈ।
ਜ਼ਿਕਰਯੋਗ ਹੈ ਕਿ ਬ੍ਰਹਮੋਸ ਮਿਜ਼ਾਈਲ ਸਿਸਟਮ ਦਾ ਪਹਿਲਾ ਅੰਤਰਰਾਸ਼ਟਰੀ ਗਾਹਕ ਬਣਿਆ ਫਿਲੀਪੀਨਜ਼ ਪਿਛਲੇ ਆਰਡਰ ਤਹਿਤ ਮਿਲੀਆਂ ਤਿੰਨ ਬੈਟਰੀਆਂ ਦੀ ਕਾਰਗੁਜ਼ਾਰੀ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਹੈ। ਸੂਤਰਾਂ ਅਨੁਸਾਰ, 'ਆਪ੍ਰੇਸ਼ਨ ਸਿੰਦੂਰ' ਦੌਰਾਨ ਪਾਕਿਸਤਾਨ 'ਚ ਅੱਤਵਾਦੀ ਟਿਕਾਣਿਆਂ ਖ਼ਿਲਾਫ਼ ਬ੍ਰਹਮੋਸ ਦੀ ਸਟੀਕ ਅਤੇ ਸਫ਼ਲ ਵਰਤੋਂ ਤੋਂ ਬਾਅਦ ਮਨੀਲਾ ਵੱਲੋਂ ਮੰਗੀ ਗਈ ਜਾਣਕਾਰੀ ਦਾ ਜਵਾਬ ਬ੍ਰਹਮੋਸ ਏਅਰੋਸਪੇਸ ਵੱਲੋਂ ਪਹਿਲਾਂ ਹੀ ਦਿੱਤਾ ਜਾ ਚੁੱਕਾ ਹੈ।