ਦਰਸ਼ਕਾਂ ਦੀ ਪਸੰਦੀਦਾ ਵੈੱਬ ਸੀਰੀਜ਼ ‘ਪੰਚਾਇਤ’ ਆਪਣੇ ਪੰਜਵੇਂ ਸੀਜ਼ਨ ਨਾਲ ਵਾਪਸੀ ਕਰ ਰਹੀ ਹੈ। ਦਿ ਵਾਇਰਲ ਫੀਵਰ (ਟੀ.ਵੀ.ਐੱਫ.) ਵੱਲੋਂ ਨਿਰਮਿਤ ‘ਪੰਚਾਇਤ-5’ ਦਾ ਪ੍ਰੀਮੀਅਰ 3 ਦਸੰਬਰ, 2026 ਨੂੰ ਪ੍ਰਾਈਮ ਵੀਡੀਓ ’ਤੇ ਹੋਵੇਗਾ। ਇਸ ਵਾਰ ਫੁਲੇਰਾ ਪਿੰਡ ’ਚ ਸੱਤਾ ਤਬਦੀਲੀ ਤੋਂ ਬਾਅਦ ਨਵੀਂ ਸਿਆਸੀ ਖਿੱਚੋਤਾਣ ਅਤੇ ਦਿਲਚਸਪ ਘਟਨਾਕ੍ਰਮ ਦੇਖਣ ਨੂੰ ਮਿਲਣਗੇ। ਨਵੇਂ ਸੀਜ਼ਨ ’ਚ ਫੁਲੇਰਾ ਨੂੰ ਨਵਾਂ ਮੁਖੀਆ ਮਿਲ ਗਿਆ ਹੈ ਅਤੇ ਬਨਰਾਕਸ ਨਵੇਂ ਪ੍ਰਧਾਨਪਤੀ ਦੇ ਰੂਪ ’ਚ ਨਜ਼ਰ ਆਉਣਗੇ। ਹੁਣ ਸਵਾਲ ਇਹ ਹੈ ਕਿ ਕੀ ਉਹ ਆਪਣੇ ਵਾਅਦਿਆਂ ਨੂੰ ਪੂਰਾ ਕਰ ਕੇ ਪਿੰਡ ਦੀ ਤਸਵੀਰ ਬਦਲ ਸਕਣਗੇ ਜਾਂ ਉਨ੍ਹਾਂ ਦੀਆਂ ਯੋਜਨਾਵਾਂ ਵੀ ਸਿਰਫ਼ ਦਿਖਾਵਾ ਸਾਬਤ ਹੋਣਗੀਆਂ? ਸੱਤਾ ਦੇ ਨਵੇਂ ਸਮੀਕਰਨਾਂ ਵਿਚਕਾਰ ਪਿੰਡ ’ਚ ਵਿਰੋਧ, ਹਾਸਾ-ਮਜ਼ਾਕ ਅਤੇ ਭਾਵੁਕ ਘਟਨਾਵਾਂ ਦਾ ਸਿਲਸਿਲਾ ਜਾਰੀ ਰਹੇਗਾ।
ਸੀਰੀਜ਼ ’ਚ ਜਤਿੰਦਰ ਕੁਮਾਰ ਇਕ ਵਾਰ ਫਿਰ ਸਕੱਤਰ ਜੀ ਦੀ ਭੂਮਿਕਾ ਨਿਭਾਉਣਗੇ। ਉਨ੍ਹਾਂ ਦੇ ਨਾਲ ਰਘੁਬੀਰ ਯਾਦਵ, ਨੀਨਾ ਗੁਪਤਾ, ਸੁਨੀਤਾ ਰਾਜਵਰ, ਫ਼ੈਸਲ ਮਲਿਕ, ਚੰਦਨ ਰਾਏ, ਸਾਨਵਿਕਾ, ਦੁਰਗੇਸ਼ ਕੁਮਾਰ ਅਤੇ ਅਸ਼ੋਕ ਪਾਠਕ ਵੀ ਆਪਣੇ ਹਰਮਨਪਿਆਰੇ ਕਿਰਦਾਰਾਂ ’ਚ ਨਜ਼ਰ ਆਉਣਗੇ।
ਸੀਰੀਜ਼ ਦਾ ਨਿਰਦੇਸ਼ਨ ਦੀਪਕ ਕੁਮਾਰ ਮਿਸ਼ਰਾ ਨੇ ਕੀਤਾ ਹੈ, ਜਦੋਂ ਕਿ ਇਸ ਦੀ ਸਿਰਜਣਾ ਦੀਪਕ ਕੁਮਾਰ ਮਿਸ਼ਰਾ, ਚੰਦਨ ਕੁਮਾਰ ਤੇ ਅਰੁਣਾਭ ਕੁਮਾਰ ਵੱਲੋਂ ਕੀਤੀ ਗਈ ਹੈ। ਇਸ ਦਾ ਪ੍ਰਸਾਰਣ ਭਾਰਤ ਸਣੇ ਦੁਨੀਆ ਦੇ 240 ਤੋਂ ਵੱਧ ਦੇਸ਼ਾਂ ਅਤੇ ਖੇਤਰਾਂ ’ਚ ਹੋਵੇਗਾ। ਪ੍ਰਾਈਮ ਵੀਡੀਓ ਦੇ ਮਨੀਸ਼ ਮੇਂਘਾਨੀ ਤੇ ਟੀ.ਵੀ.ਐੱਫ. ਦੇ ਪ੍ਰਧਾਨ ਵਿਜੇ ਕੋਸ਼ੀ ਨੇ ਨਵੇਂ ਸੀਜ਼ਨ ਨੂੰ ਲੈ ਕੇ ਆਪਣਾ ਉਤਸ਼ਾਹ ਜ਼ਾਹਿਰ ਕੀਤਾ ਹੈ।