ਲਾਸ ਐਂਜਲੇਸ : ਦੁਨੀਆ ਦੇ ਸਭ ਤੋਂ ਵੱਕਾਰੀ ਸੰਗੀਤ ਪੁਰਸਕਾਰ '68ਵੇਂ ਗ੍ਰੈਮੀ ਐਵਾਰਡਜ਼' ਵਿੱਚ ਇਸ ਵਾਰ ਅਧਿਆਤਮਕ ਗੁਰੂ ਦਲਾਈ ਲਾਮਾ ਨੇ ਇਤਿਹਾਸ ਰਚ ਦਿੱਤਾ ਹੈ। ਐਤਵਾਰ ਨੂੰ ਲਾਸ ਐਂਜਲੇਸ ਵਿੱਚ ਹੋਏ ਸ਼ਾਨਦਾਰ ਸਮਾਗਮ ਦੌਰਾਨ ਦਲਾਈ ਲਾਮਾ ਨੇ 'ਆਡੀਓ ਬੁੱਕ, ਕਥਾਵਾਚਨ ਅਤੇ ਸਟੋਰੀਟੇਲਿੰਗ ਰਿਕਾਰਡਿੰਗ' ਸ਼੍ਰੇਣੀ ਵਿੱਚ ਆਪਣਾ ਪਹਿਲਾ ਗ੍ਰੈਮੀ ਪੁਰਸਕਾਰ ਜਿੱਤਿਆ। ਉਨ੍ਹਾਂ ਨੇ ਇਸ ਦੌੜ ਵਿੱਚ ਅਮਰੀਕੀ ਸੁਪਰੀਮ ਕੋਰਟ ਦੀ ਜੱਜ ਕੇਤਨਜੀ ਬ੍ਰਾਊਨ ਜੈਕਸਨ ਨੂੰ ਪਿੱਛੇ ਛੱਡਦਿਆਂ ਇਹ ਮਾਣ ਹਾਸਲ ਕੀਤਾ।
ਸਟੀਵਨ ਸਪੀਲਬਰਗ ਬਣੇ 'EGOT' ਜੇਤੂ
ਇਸ ਵਾਰ ਦਾ ਗ੍ਰੈਮੀ ਸਮਾਗਮ ਦਿੱਗਜ ਫ਼ਿਲਮ ਨਿਰਦੇਸ਼ਕ ਸਟੀਵਨ ਸਪੀਲਬਰਗ ਲਈ ਵੀ ਬੇਹੱਦ ਖ਼ਾਸ ਰਿਹਾ। ਉਨ੍ਹਾਂ ਦੀ ਸੰਗੀਤ ਫ਼ਿਲਮ 'ਮਿਊਜ਼ਿਕ ਫਾਰ ਜੌਨ ਵਿਲੀਅਮਜ਼' ਨੇ ਸਰਵੋਤਮ ਸੰਗੀਤ ਫ਼ਿਲਮ ਦਾ ਪੁਰਸਕਾਰ ਜਿੱਤਿਆ। ਇਸ ਜਿੱਤ ਨਾਲ ਸਪੀਲਬਰਗ ਹੁਣ ਅਧਿਕਾਰਤ ਤੌਰ 'ਤੇ 'EGOT' (ਐਮੀ, ਗ੍ਰੈਮੀ, ਆਸਕਰ ਅਤੇ ਟੋਨੀ ਐਵਾਰਡ ਜੇਤੂ) ਕਲੱਬ ਵਿੱਚ ਸ਼ਾਮਲ ਹੋ ਗਏ ਹਨ।
K-Pop ਦਾ ਵੀ ਬੋਲਬਾਲਾ
ਸੰਗੀਤ ਜਗਤ ਵਿੱਚ ਤੇਜ਼ੀ ਨਾਲ ਉੱਭਰ ਰਹੇ ਕੇ-ਪੌਪ (K-Pop) ਨੇ ਵੀ ਇਸ ਵਾਰ ਗ੍ਰੈਮੀ ਵਿੱਚ ਆਪਣੀ ਮੌਜੂਦਗੀ ਦਰਜ ਕਰਵਾਈ। ਫ਼ਿਲਮ 'ਕੇ-ਪੌਪ ਡੈਮਨ ਹੰਟਰਸ' ਦੇ ਗੀਤ 'ਗੋਲਡਨ' ਨੇ ਵਿਜ਼ੂਅਲ ਮੀਡੀਆ ਲਈ ਸਰਵੋਤਮ ਗੀਤ ਦਾ ਪੁਰਸਕਾਰ ਜਿੱਤਿਆ। ਇਹ ਪਹਿਲਾ ਮੌਕਾ ਹੈ ਜਦੋਂ ਕਿਸੇ ਕੇ-ਪੌਪ ਕਲਾਕਾਰ ਜਾਂ ਗਰੁੱਪ ਨੇ ਗ੍ਰੈਮੀ ਆਪਣੇ ਨਾਮ ਕੀਤਾ ਹੈ।
ਟਰੰਪ ਪ੍ਰਸ਼ਾਸਨ ਖ਼ਿਲਾਫ਼ ਉੱਠੀ ਆਵਾਜ਼
ਪੀਕਾਕ ਥੀਏਟਰ ਵਿੱਚ ਹੋਏ ਇਸ ਸਮਾਗਮ ਦੌਰਾਨ ਸਿਆਸੀ ਰੰਗ ਵੀ ਦੇਖਣ ਨੂੰ ਮਿਲਿਆ। ਕਈ ਕਲਾਕਾਰਾਂ ਨੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਇਮੀਗ੍ਰੇਸ਼ਨ ਨੀਤੀ (ਪ੍ਰਵਾਸ ਨੀਤੀ) ਦੀ ਖੁੱਲ੍ਹ ਕੇ ਨਿਖੇਧੀ ਕੀਤੀ। ਗਾਇਕ ਸ਼ਾਬੂਜੀ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ "ਪ੍ਰਵਾਸੀਆਂ ਨੇ ਹੀ ਇਸ ਦੇਸ਼ (ਅਮਰੀਕਾ) ਨੂੰ ਬਣਾਇਆ ਹੈ।" ਗਾਇਕਾ ਗਲੋਰੀਆ ਐਸਟੇਫਨ ਨੇ ਵੀ ਮੌਜੂਦਾ ਸਿਆਸੀ ਹਾਲਾਤ 'ਤੇ ਚਿੰਤਾ ਪ੍ਰਗਟਾਈ।