ਨਵੀਂ ਦਿੱਲੀ : ਨੈਸ਼ਨਲ ਹਾਈਵੇ ਅਥਾਰਟੀ ਆਫ ਇੰਡੀਆ (NHAI) ਨੇ ਹਾਈਵੇਅ 'ਤੇ ਸਫ਼ਾਈ ਵਿਵਸਥਾ ਨੂੰ ਸੁਧਾਰਨ ਅਤੇ ਯਾਤਰੀਆਂ ਦੀ ਸਹੂਲਤ ਲਈ ਇੱਕ ਵਿਲੱਖਣ ਪਹਿਲਕਦਮੀ ਕੀਤੀ ਹੈ। ਹੁਣ ਜੇਕਰ ਤੁਹਾਨੂੰ ਕਿਸੇ ਟੋਲ ਪਲਾਜ਼ਾ 'ਤੇ ਗੰਦਾ ਟਾਇਲਟ ਮਿਲਦਾ ਹੈ, ਤਾਂ ਤੁਸੀਂ ਉਸ ਦੀ ਜਾਣਕਾਰੀ ਦੇ ਕੇ 1,000 ਰੁਪਏ ਕਮਾ ਸਕਦੇ ਹੋ। ਇਹ ਇਨਾਮੀ ਰਾਸ਼ੀ ਯਾਤਰੀ ਦੇ FASTag ਖਾਤੇ ਵਿੱਚ ਰੀਚਾਰਜ ਵਜੋਂ ਪਾਈ ਜਾਵੇਗੀ।
ਕਿਵੇਂ ਲੈ ਸਕਦੇ ਹੋ ਇਸ ਚੈਲੇਂਜ ਵਿੱਚ ਹਿੱਸਾ?
NHAI ਦੇ ਇਸ 'ਕਲੀਨ ਟਾਇਲਟ ਪਿਕਚਰ ਚੈਲੇਂਜ' ਵਿੱਚ ਹਿੱਸਾ ਲੈਣ ਲਈ ਯਾਤਰੀਆਂ ਨੂੰ ਕੁਝ ਜ਼ਰੂਰੀ ਕਦਮ ਚੁੱਕਣੇ ਪੈਣਗੇ:
• ਸਭ ਤੋਂ ਪਹਿਲਾਂ ਆਪਣੇ ਫ਼ੋਨ ਵਿੱਚ 'Rajmargyatra' ਐਪ ਦਾ ਲੇਟੈਸਟ ਵਰਜ਼ਨ ਡਾਊਨਲੋਡ ਕਰੋ।
• ਟੋਲ ਪਲਾਜ਼ਾ 'ਤੇ ਮੌਜੂਦ ਗੰਦੇ ਟਾਇਲਟ ਦੀ ਸਾਫ਼ ਫ਼ੋਟੋ ਖਿੱਚ ਕੇ ਇਸ ਐਪ 'ਤੇ ਅਪਲੋਡ ਕਰੋ।
• ਫ਼ੋਟੋ ਦੇ ਨਾਲ ਆਪਣਾ ਨਾਮ, ਥਾਂ ਦਾ ਵੇਰਵਾ, ਗੱਡੀ ਦਾ ਨੰਬਰ (VRN) ਅਤੇ ਮੋਬਾਈਲ ਨੰਬਰ ਦਰਜ ਕਰਨਾ ਲਾਜ਼ਮੀ ਹੈ।
ਜ਼ਰੂਰੀ ਸ਼ਰਤਾਂ ਅਤੇ ਨਿਯਮ:
• ਸਮਾਂ ਸੀਮਾ: ਇਹ ਸਕੀਮ 30 ਜੂਨ 2026 ਤੱਕ ਲਾਗੂ ਹੈ।
• ਸਿਰਫ਼ NHAI ਟਾਇਲਟ: ਇਹ ਇਨਾਮ ਸਿਰਫ਼ ਉਨ੍ਹਾਂ ਟਾਇਲਟਾਂ ਲਈ ਹੈ ਜੋ NHAI ਵੱਲੋਂ ਚਲਾਏ ਜਾਂਦੇ ਹਨ। ਪੈਟਰੋਲ ਪੰਪਾਂ, ਢਾਬਿਆਂ ਜਾਂ ਰੈਸਟੋਰੈਂਟਾਂ ਦੇ ਟਾਇਲਟ ਇਸ ਸਕੀਮ ਵਿੱਚ ਸ਼ਾਮਲ ਨਹੀਂ ਹਨ।
• ਪਹਿਲ ਦੇ ਅਧਾਰ 'ਤੇ ਇਨਾਮ: ਇੱਕ ਟਾਇਲਟ ਲਈ ਦਿਨ ਵਿੱਚ ਸਿਰਫ਼ ਇੱਕ ਵਾਰ ਹੀ ਇਨਾਮ ਦਿੱਤਾ ਜਾਵੇਗਾ। ਜੇਕਰ ਕਈ ਲੋਕ ਇੱਕੋ ਟਾਇਲਟ ਦੀ ਫ਼ੋਟੋ ਭੇਜਦੇ ਹਨ, ਤਾਂ ਇਨਾਮ ਸਭ ਤੋਂ ਪਹਿਲਾਂ ਰਿਪੋਰਟ ਕਰਨ ਵਾਲੇ ਨੂੰ ਮਿਲੇਗਾ।
• ਤਕਨੀਕੀ ਜਾਂਚ: ਫ਼ੋਟੋ ਵਿੱਚ ਲੋਕੇਸ਼ਨ (Geo-tag) ਅਤੇ ਸਮਾਂ ਦਰਜ ਹੋਣਾ ਜ਼ਰੂਰੀ ਹੈ। ਸਾਰੀਆਂ ਫ਼ੋਟੋਆਂ ਦੀ ਜਾਂਚ AI (Artificial Intelligence) ਅਤੇ ਅਧਿਕਾਰੀਆਂ ਵੱਲੋਂ ਕੀਤੀ ਜਾਵੇਗੀ ਤਾਂ ਜੋ ਪਤਾ ਲੱਗ ਸਕੇ ਕਿ ਫ਼ੋਟੋ ਅਸਲੀ ਹੈ ਜਾਂ ਨਹੀਂ।
ਨਕਦ ਨਹੀਂ ਮਿਲੇਗਾ ਪੈਸਾ: ਇਹ ਗੱਲ ਧਿਆਨ ਵਿੱਚ ਰੱਖਣ ਯੋਗ ਹੈ ਕਿ 1,000 ਰੁਪਏ ਦੀ ਇਹ ਰਾਸ਼ੀ ਨਕਦ ਨਹੀਂ ਕਢਵਾਈ ਜਾ ਸਕਦੀ, ਇਹ ਸਿਰਫ਼ ਤੁਹਾਡੇ FASTag ਰੀਚਾਰਜ ਦੇ ਰੂਪ ਵਿੱਚ ਹੀ ਕੰਮ ਆਵੇਗੀ। NHAI ਦੀ ਇਸ ਮੁਹਿੰਮ ਦਾ ਮੁੱਖ ਮਨੋਰਥ ਰਾਸ਼ਟਰੀ ਰਾਜਮਾਰਗਾਂ 'ਤੇ ਸਫਾਈ ਦੇ ਮਿਆਰਾਂ ਨੂੰ ਉੱਚਾ ਚੁੱਕਣਾ ਹੈ।