ਬੈਂਕਾਕ : ਕੰਬੋਡੀਆ ਦੇ ਨਾਲ ਚੱਲ ਰਹੇ ਭਿਆਨਕ ਸੰਘਰਸ਼ ਦੇ ਵਿਚਕਾਰ, ਥਾਈਲੈਂਡ ਵਿੱਚ ਅਗਲੇ ਸਾਲ ਦੀ ਸ਼ੁਰੂਆਤ ਵਿੱਚ ਨਵੀਆਂ ਚੋਣਾਂ ਕਰਵਾਉਣ ਲਈ ਸ਼ੁੱਕਰਵਾਰ ਨੂੰ ਸੰਸਦ ਭੰਗ ਕਰ ਦਿੱਤੀ ਗਈ। ਪ੍ਰਧਾਨ ਮੰਤਰੀ ਅਨੁਤਿਨ ਚਾਰਨਵਿਰਾਕੁਲ ਨੇ ਥਾਈਲੈਂਡ ਦੇ ਰਾਜਾ ਮਹਾ ਵਜੀਰਾਲੋਂਗਕੋਰਨ ਤੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਪ੍ਰਤੀਨਿਧੀ ਸਭਾ ਨੂੰ ਭੰਗ ਕਰ ਦਿੱਤਾ। ਇਹ ਮਨਜ਼ੂਰੀ ਸ਼ੁੱਕਰਵਾਰ ਨੂੰ ਰਾਜਕੀ ਰਾਜਪੱਤਰ 'ਚ ਪ੍ਰਕਾਸ਼ਤ ਹੋਣ ਦੇ ਨਾਲ ਹੀ ਲਾਗੂ ਹੋ ਗਈ।
ਚੋਣਾਂ ਅਤੇ ਕਾਰਜਕਾਰੀ ਸਰਕਾਰ
ਰਾਜ ਪਰਿਵਾਰ ਦੀ ਮਨਜ਼ੂਰੀ ਮਿਲਣ ਤੋਂ ਬਾਅਦ, ਥਾਈਲੈਂਡ 'ਚ 45 ਤੋਂ 60 ਦਿਨਾਂ ਦੇ ਅੰਦਰ ਚੋਣਾਂ ਕਰਵਾਉਣੀਆਂ ਜ਼ਰੂਰੀ ਹਨ। ਇਸ ਸਮੇਂ ਦੌਰਾਨ, ਅਨੁਤਿਨ ਇੱਕ ਕਾਰਜਕਾਰੀ ਸਰਕਾਰ ਦੀ ਅਗਵਾਈ ਕਰਨਗੇ ਜਿਸ ਕੋਲ ਸੀਮਤ ਸ਼ਕਤੀਆਂ ਹੋਣਗੀਆਂ ਅਤੇ ਉਹ ਨਵਾਂ ਬਜਟ ਮਨਜ਼ੂਰ ਨਹੀਂ ਕਰ ਸਕਦੀ। ਅਨੁਤਿਨ, ਜੋ ਸਿਰਫ਼ ਤਿੰਨ ਮਹੀਨੇ ਪਹਿਲਾਂ ਪ੍ਰਧਾਨ ਮੰਤਰੀ ਬਣੇ ਸਨ, ਨੇ ਵੀਰਵਾਰ ਦੇਰ ਰਾਤ ਫੇਸਬੁੱਕ 'ਤੇ ਇਸ ਕਦਮ ਦਾ ਸੰਕੇਤ ਦਿੰਦੇ ਹੋਏ ਕਿਹਾ ਸੀ ਕਿ ਉਹ "ਸੱਤਾ ਜਨਤਾ ਨੂੰ ਮੋੜਨਾ ਚਾਹੁੰਦੇ ਹਨ।"
ਸੰਵਿਧਾਨਕ ਬਦਲਾਅ ਬਣਿਆ ਮੁੱਖ ਕਾਰਨ
ਇਹ ਕਦਮ ਅਜਿਹੇ ਸਮੇਂ ਚੁੱਕਿਆ ਗਿਆ ਹੈ ਜਦੋਂ ਥਾਈਲੈਂਡ, ਕੰਬੋਡੀਆ ਦੇ ਨਾਲ ਲੰਬੇ ਸਮੇਂ ਤੋਂ ਚੱਲੇ ਆ ਰਹੇ ਸਰਹੱਦੀ ਵਿਵਾਦ 'ਤੇ ਵੱਡੇ ਪੱਧਰ 'ਤੇ ਸੰਘਰਸ਼ 'ਚ ਉਲਝਿਆ ਹੋਇਆ ਹੈ। ਹਾਲਾਂਕਿ, ਸੰਵਿਧਾਨਕ ਬਦਲਾਅ ਦਾ ਮੁੱਦਾ ਸੰਸਦ ਭੰਗ ਕਰਨ ਦੀ ਮੁੱਖ ਵਜ੍ਹਾ ਜਾਪਦਾ ਹੈ। ਪ੍ਰਧਾਨ ਮੰਤਰੀ ਅਨੁਤਿਨ ਨੇ ਸਤੰਬਰ ਵਿੱਚ ਮੁੱਖ ਵਿਰੋਧੀ ਪੀਪਲਜ਼ ਪਾਰਟੀ ਦੇ ਸਮਰਥਨ ਨਾਲ ਸੱਤਾ ਹਾਸਲ ਕੀਤੀ ਸੀ। ਉਨ੍ਹਾਂ ਨੇ ਸਮਝੌਤੇ ਵਜੋਂ ਚਾਰ ਮਹੀਨਿਆਂ ਦੇ ਅੰਦਰ ਸੰਸਦ ਭੰਗ ਕਰਨ ਤੇ ਨਵੇਂ ਸੰਵਿਧਾਨ ਲਈ ਜਨਮਤ ਸੰਗ੍ਰਹਿ ਕਰਾਉਣ ਦਾ ਵਾਅਦਾ ਕੀਤਾ ਸੀ।
ਇਹ ਧਮਕੀ ਉਦੋਂ ਸਾਹਮਣੇ ਆਈ ਜਦੋਂ ਅਨੁਤਿਨ ਦੀ ਭੁਮਜੈਥਾਈ ਪਾਰਟੀ ਦੇ ਸੰਸਦ ਮੈਂਬਰਾਂ ਨੇ ਸੰਵਿਧਾਨ ਵਿੱਚ ਸੋਧ ਨਾਲ ਜੁੜੇ ਇੱਕ ਬਿੱਲ ਦੇ ਪੱਖ ਵਿੱਚ ਵੋਟ ਪਾਇਆ, ਜਿਸ ਨੂੰ ਵਿਰੋਧੀ ਪਾਰਟੀ ਨੇ ਸਤੰਬਰ ਵਿੱਚ ਹੋਏ ਸਮਝੌਤੇ ਦੀ ਭਾਵਨਾ ਦੇ ਵਿਰੁੱਧ ਮੰਨਿਆ। ਇਸੇ ਕਾਰਨ, ਪੀਪਲਜ਼ ਪਾਰਟੀ ਨੇ ਵੀਰਵਾਰ ਨੂੰ ਅਨੁਤਿਨ ਵਿਰੁੱਧ ਬੇਭਰੋਸਗੀ ਮਤਾ ਲਿਆਉਣ ਦੀ ਤਿਆਰੀ ਕਰ ਲਈ ਸੀ।
ਸਰਹੱਦ 'ਤੇ ਹਮਲਾਵਰ ਰੁਖ
ਇਸ ਰਾਜਨੀਤਿਕ ਅਸਥਿਰਤਾ ਦੇ ਨਾਲ ਹੀ, ਥਾਈਲੈਂਡ ਕੰਬੋਡੀਆ ਨਾਲ ਇੱਕ ਵਾਰ ਫਿਰ ਭਿਆਨਕ ਲੜਾਈ 'ਚ ਉਲਝਿਆ ਹੋਇਆ ਹੈ। ਪ੍ਰਧਾਨ ਮੰਤਰੀ ਅਨੁਤਿਨ ਨੇ ਰਾਸ਼ਟਰਵਾਦੀ ਜਨਭਾਵਨਾਵਾਂ ਨੂੰ ਸੰਤੁਸ਼ਟ ਕਰਨ ਲਈ ਇੱਕ ਹਮਲਾਵਰ ਫੌਜੀ ਰੁਖ ਅਪਣਾਇਆ ਹੈ। ਉਨ੍ਹਾਂ ਨੇ ਐਲਾਨ ਕੀਤਾ ਹੈ ਕਿ ਥਾਈਲੈਂਡ ਉਦੋਂ ਤੱਕ ਲੜਾਈ ਜਾਰੀ ਰੱਖੇਗਾ ਜਦੋਂ ਤੱਕ ਉਸਦੀ ਪ੍ਰਭੂਸੱਤਾ ਅਤੇ ਸੁਰੱਖਿਆ ਯਕੀਨੀ ਨਹੀਂ ਹੋ ਜਾਂਦੀ।
ਇਸ ਤੋਂ ਪਹਿਲਾਂ, ਜੁਲਾਈ 'ਚ ਸਰਹੱਦ 'ਤੇ ਪੰਜ ਦਿਨਾਂ ਦੀ ਲੜਾਈ ਤੋਂ ਬਾਅਦ, ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਦੋਵਾਂ ਦੇਸ਼ਾਂ ਨੂੰ ਇਹ ਧਮਕੀ ਦੇ ਕੇ ਸੰਘਰਸ਼ ਵਿਰਾਮ 'ਤੇ ਸਹਿਮਤ ਹੋਣ ਲਈ ਮਜਬੂਰ ਕੀਤਾ ਸੀ ਕਿ ਉਹ ਉਨ੍ਹਾਂ ਦੇ ਵਪਾਰਕ ਵਿਸ਼ੇਸ਼ ਅਧਿਕਾਰਾਂ ਨੂੰ ਵਾਪਸ ਲੈ ਲੈਣਗੇ। ਅਨੁਤਿਨ ਨੇ ਸ਼ੁੱਕਰਵਾਰ ਨੂੰ ਪੁਸ਼ਟੀ ਕੀਤੀ ਕਿ ਉਹ ਸ਼ੁੱਕਰਵਾਰ ਰਾਤ ਨੂੰ ਰਾਸ਼ਟਰਪਤੀ ਟਰੰਪ ਨਾਲ ਗੱਲ ਕਰਨ ਦੀ ਯੋਜਨਾ ਬਣਾ ਰਹੇ ਹਨ ਤਾਂ ਜੋ ਉਨ੍ਹਾਂ ਨੂੰ ਸਰਹੱਦ 'ਤੇ ਹਾਲਾਤ ਦੀ ਤਾਜ਼ਾ ਜਾਣਕਾਰੀ ਦਿੱਤੀ ਜਾ ਸਕੇ।
ਜ਼ਿਕਰਯੋਗ ਹੈ ਕਿ ਅਨੁਤਿਨ ਨੇ ਪੈਟੋਂਗਟਾਰਨ ਸ਼ਿਨਵਾਤਰਾ ਦਾ ਸਥਾਨ ਲਿਆ ਸੀ, ਜਿਨ੍ਹਾਂ ਨੂੰ ਕੰਬੋਡੀਆ ਦੇ ਸੀਨੇਟ ਪ੍ਰਧਾਨ ਹੁਨ ਸੇਨ ਨਾਲ ਇੱਕ ਸੰਵੇਦਨਸ਼ੀਲ ਫੋਨ ਕਾਲ ਨੂੰ ਲੈ ਕੇ ਨੈਤਿਕ ਉਲੰਘਣਾ ਦਾ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਅਹੁਦੇ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਸੀ।