ਇਸਲਾਮਾਬਾਦ : ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਅਤੇ ਪਾਕਿਸਤਾਨ ਤਹਿਰੀਕ-ਏ-ਇੰਸਾਫ (PTI) ਦੇ ਮੁਖੀ ਇਮਰਾਨ ਖਾਨ, ਜੋ ਇਸ ਸਮੇਂ ਅਡਿਆਲਾ ਜੇਲ੍ਹ ਵਿੱਚ ਬੰਦ ਹਨ, ਨੂੰ ਮੰਗਲਵਾਰ ਸਵੇਰੇ ਅੱਖਾਂ ਦੇ ਇਲਾਜ ਲਈ ਇਸਲਾਮਾਬਾਦ ਦੇ ਇੱਕ ਹਸਪਤਾਲ ਲਿਜਾਇਆ ਗਿਆ। ਹਸਪਤਾਲ ਵਿੱਚ ਜ਼ਰੂਰੀ ਪ੍ਰਕਿਰਿਆ ਪੂਰੀ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਮੁੜ ਜੇਲ੍ਹ ਭੇਜ ਦਿੱਤਾ ਗਿਆ ਹੈ।
ਅੱਖਾਂ ਦੀ ਗੰਭੀਰ ਬੀਮਾਰੀ ਨਾਲ ਜੂਝ ਰਹੇ ਹਨ ਖਾਨ
ਸੂਤਰਾਂ ਅਨੁਸਾਰ, ਇਮਰਾਨ ਖਾਨ ਦੀ ਸੱਜੀ ਅੱਖ 'ਚ ਪਿਛਲੇ ਮਹੀਨੇ ਸੈਂਟਰਲ ਰੀਟਿਨਲ ਵੇਨ ਓਕਲੂਜ਼ਨ (CRVO) ਨਾਮ ਦੀ ਬੀਮਾਰੀ ਦਾ ਪਤਾ ਲੱਗਾ ਸੀ, ਜਿਸ ਨੇ ਉਨ੍ਹਾਂ ਦੀ ਦੇਖਣ ਦੀ ਸ਼ਕਤੀ ਨੂੰ ਪ੍ਰਭਾਵਿਤ ਕੀਤਾ ਹੈ। ਡਾਕਟਰਾਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪਾਕਿਸਤਾਨ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸਿਜ਼ (PIMS) ਵਿਖੇ 'ਐਂਟੀ-ਵੀਈਜੀਐਫ' (anti-VEGF) ਇੰਟਰਾਵਿਟਰੀਅਲ ਇੰਜੈਕਸ਼ਨ ਦੀ ਦੂਜੀ ਖੁਰਾਕ ਦਿੱਤੀ ਗਈ। ਇਸ ਤੋਂ ਪਹਿਲਾਂ 24 ਜਨਵਰੀ ਨੂੰ ਉਨ੍ਹਾਂ ਦਾ ਪਹਿਲਾ ਇਲਾਜ ਕੀਤਾ ਗਿਆ ਸੀ।
ਮਾਹਿਰ ਡਾਕਟਰਾਂ ਦੀ ਨਿਗਰਾਨੀ ਹੇਠ ਹੋਇਆ ਇਲਾਜ
ਇਲਾਜ ਤੋਂ ਪਹਿਲਾਂ ਮਾਹਿਰ ਡਾਕਟਰਾਂ ਦੇ ਇੱਕ ਵਿਸ਼ੇਸ਼ ਬੋਰਡ ਨੇ ਖਾਨ ਦੀ ਸਿਹਤ ਦੀ ਜਾਂਚ ਕੀਤੀ। ਇਸ ਬੋਰਡ ਵਿੱਚ ਦਿਲ ਦੇ ਰੋਗਾਂ ਦੇ ਮਾਹਿਰ ਵੀ ਸ਼ਾਮਲ ਸਨ, ਜਿਨ੍ਹਾਂ ਨੇ ਉਨ੍ਹਾਂ ਦੀ ਈਸੀਜੀ (ECG) ਅਤੇ ਈਕੋਕਾਰਡੀਓਗ੍ਰਾਫੀ ਕੀਤੀ, ਜਿਸ ਦੀਆਂ ਰਿਪੋਰਟਾਂ ਆਮ ਪਾਈਆਂ ਗਈਆਂ। ਇਹ ਪੂਰੀ ਪ੍ਰਕਿਰਿਆ ਇੱਕ 'ਡੇ-ਕੇਅਰ' ਸਰਜਰੀ ਵਜੋਂ ਕੀਤੀ ਗਈ, ਜਿਸ ਦੌਰਾਨ ਇਮਰਾਨ ਖਾਨ ਦੀ ਹਾਲਤ ਸਥਿਰ ਰਹੀ।
ਨਿੱਜੀ ਹਸਪਤਾਲ 'ਚ ਇਲਾਜ ਦੀ ਸੀ ਮੰਗ
ਜ਼ਿਕਰਯੋਗ ਹੈ ਕਿ ਇਮਰਾਨ ਖਾਨ ਦੇ ਪਰਿਵਾਰ ਅਤੇ ਪੀਟੀਆਈ (PTI) ਪਾਰਟੀ ਨੇ ਮੰਗ ਕੀਤੀ ਸੀ ਕਿ ਸਾਬਕਾ ਪ੍ਰਧਾਨ ਮੰਤਰੀ ਦਾ ਇਲਾਜ ਇਸਲਾਮਾਬਾਦ ਦੇ ਨਿੱਜੀ 'ਸ਼ਿਫਾ ਇੰਟਰਨੈਸ਼ਨਲ ਹਸਪਤਾਲ' ਵਿੱਚ ਕਰਵਾਇਆ ਜਾਵੇ। ਹਾਲਾਂਕਿ, ਪ੍ਰਸ਼ਾਸਨ ਵੱਲੋਂ ਉਨ੍ਹਾਂ ਨੂੰ ਸਰਕਾਰੀ ਹਸਪਤਾਲ (PIMS) ਵਿੱਚ ਹੀ ਇਲਾਜ ਮੁਹੱਈਆ ਕਰਵਾਇਆ ਗਿਆ, ਜਿੱਥੇ ਅਲ-ਸ਼ਿਫਾ ਆਈ ਹਸਪਤਾਲ ਦੇ ਮਾਹਿਰਾਂ ਨੇ ਵੀ ਆਪਣੀ ਸੇਵਾਵਾਂ ਦਿੱਤੀਆਂ।