ਨੇਵਾਤਿਮ : ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਵਾਤਾਵਰਣ ਪੱਖੀ ਮੁਹਿੰਮ 'ਇੱਕ ਪੇੜ ਮਾਂ ਕੇ ਨਾਮ' ਦਾ ਅਸਰ ਹੁਣ ਸੱਤ ਸਮੁੰਦਰੋਂ ਪਾਰ ਇਜ਼ਰਾਈਲ ਵਿੱਚ ਵੀ ਦੇਖਣ ਨੂੰ ਮਿਲ ਰਿਹਾ ਹੈ। ਇਜ਼ਰਾਈਲ ਦੇ ਮੋਸ਼ਾਵ ਨੇਵਾਤਿਮ ਵਿਖੇ ਇਸ ਮੁਹਿੰਮ ਤਹਿਤ 300 ਪੌਦੇ ਲਗਾਏ ਗਏ। ਖ਼ਾਸ ਗੱਲ ਇਹ ਰਹੀ ਕਿ ਇਸ ਮੌਕੇ ਯਹੂਦੀਆਂ ਦਾ ਪਵਿੱਤਰ ਵਾਤਾਵਰਣ ਉਤਸਵ 'ਤੂ ਬਿਸ਼ਵਾਤ' ਵੀ ਬੜੀ ਧੂਮ-ਧਾਮ ਨਾਲ ਮਨਾਇਆ ਗਿਆ।
ਭਾਰਤੀ ਦੂਤਘਰ ਦੀ ਵਿਸ਼ੇਸ਼ ਪਹਿਲ
ਇਸ ਪ੍ਰੋਗਰਾਮ ਦਾ ਆਯੋਜਨ ਭਾਰਤੀ ਦੂਤਘਰ ਵੱਲੋਂ ਇਜ਼ਰਾਈਲ ਦੀ ਗੈਰ-ਲਾਭਕਾਰੀ ਸੰਸਥਾ 'ਕੇਰੇਨ ਕਾਯਮੇਟ ਲੇਇਜ਼ਰਾਈਲ' ਅਤੇ ਖੇਤੀਬਾੜੀ ਬਸਤੀ ਮੋਸ਼ਾਵ ਨੇਵਾਤਿਮ ਦੇ ਸਹਿਯੋਗ ਨਾਲ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਸੈਂਕੜੇ ਲੋਕਾਂ ਨੇ ਸ਼ਮੂਲੀਅਤ ਕੀਤੀ, ਜੋ ਭਾਰਤ ਅਤੇ ਇਜ਼ਰਾਈਲ ਦੇ ਡੂੰਘੇ ਸੱਭਿਆਚਾਰਕ ਸਬੰਧਾਂ ਦੀ ਮਿਸਾਲ ਬਣਿਆ।
ਭਾਰਤ-ਇਜ਼ਰਾਈਲ ਦੋਸਤੀ ਦੇ ਪ੍ਰਤੀਕ ਬਣਨਗੇ ਇਹ ਪੌਦੇ
ਇਜ਼ਰਾਈਲ ਵਿੱਚ ਭਾਰਤ ਦੇ ਰਾਜਦੂਤ ਜੇ.ਪੀ. ਸਿੰਘ ਨੇ ਇਸ ਮੌਕੇ ਸੰਬੋਧਨ ਕਰਦਿਆਂ ਕਿਹਾ:,"'ਤੂ ਬਿਸ਼ਵਾਤ' ਅਤੇ 'ਇੱਕ ਪੇੜ ਮਾਂ ਕੇ ਨਾਮ' ਦੋਵੇਂ ਪਹਿਲਕਦਮੀਆਂ ਕੁਦਰਤ ਅਤੇ ਭਾਈਚਾਰਕ ਸਾਂਝ ਨੂੰ ਦਰਸਾਉਂਦੀਆਂ ਹਨ। ਇਹ 300 ਪੌਦੇ ਭਾਰਤ-ਇਜ਼ਰਾਈਲ ਦੋਸਤੀ ਦੇ ਸਦੀਵੀ ਪ੍ਰਤੀਕ ਬਣਨਗੇ ਅਤੇ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਪ੍ਰੇਰਨਾ ਦੇਣਗੇ।
ਕੋਚੀ ਦੇ ਯਹੂਦੀਆਂ ਨਾਲ ਜੁੜਿਆ ਹੈ ਇਸ ਥਾਂ ਦਾ ਇਤਿਹਾਸ
ਜਿਸ 'ਮੋਸ਼ਾਵ ਨੇਵਾਤਿਮ' ਖੇਤਰ ਵਿੱਚ ਇਹ ਪੌਦੇ ਲਗਾਏ ਗਏ ਹਨ, ਉਸ ਦਾ ਭਾਰਤ ਨਾਲ ਖ਼ਾਸ ਸਬੰਧ ਹੈ। ਇਸ ਬਸਤੀ ਦੀ ਸਥਾਪਨਾ ਕੇਰਲ (ਕੋਚੀ) ਤੋਂ ਆਏ ਭਾਰਤੀ ਯਹੂਦੀਆਂ ਨੇ ਕੀਤੀ ਸੀ। ਅੱਜ ਵੀ ਇੱਥੇ ਕੋਚੀ ਸ਼ੈਲੀ ਦਾ ਬਣਿਆ ਪ੍ਰਾਰਥਨਾ ਸਥਾਨ (ਸਿਨਾਗੌਗ) ਅਤੇ 'ਭਾਰਤ ਯਹੂਦੀ ਵਿਰਾਸਤ ਕੇਂਦਰ' ਮੌਜੂਦ ਹੈ, ਜੋ ਭਾਰਤੀ ਕਦਰਾਂ-ਕੀਮਤਾਂ ਨੂੰ ਸੰਭਾਲੀ ਬੈਠਾ ਹੈ।
ਇਸ ਮੌਕੇ ਇਜ਼ਰਾਈਲੀ ਅਧਿਕਾਰੀਆਂ ਨੇ ਭਾਰਤ ਦੀ ਤਕਨੀਕੀ ਅਤੇ ਵਾਤਾਵਰਣ ਸਾਂਝੇਦਾਰੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਦੋਵੇਂ ਦੇਸ਼ ਜਲਵਾਯੂ ਪਰਿਵਰਤਨ ਵਿਰੁੱਧ ਮਿਲ ਕੇ ਕੰਮ ਕਰ ਰਹੇ ਹਨ।