ਨੋਰਫੋਕ : ਪੱਛਮੀ ਏਸ਼ੀਆ ਵਿੱਚ ਵਧਦੇ ਤਣਾਅ ਦੇ ਵਿਚਕਾਰ ਅਮਰੀਕਾ ਨੂੰ ਉਸ ਸਮੇਂ ਵੱਡਾ ਮਾਲੀ ਅਤੇ ਰਣਨੀਤਕ ਨੁਕਸਾਨ ਹੋਇਆ ਜਦੋਂ ਉਸਦਾ ਇੱਕ ਅਤਿ-ਆਧੁਨਿਕ MQ-4C ਟ੍ਰਾਈਟਨ (MQ-4C Triton) ਜਾਸੂਸੀ ਡਰੋਨ ਫ਼ਾਰਸ ਦੀ ਖਾੜੀ (Persian Gulf) ਵਿੱਚ ਹਾਦਸਾਗ੍ਰਸਤ ਹੋ ਗਿਆ। ਅਮਰੀਕੀ ਨੇਵਲ ਸੇਫਟੀ ਕਮਾਂਡ ਨੇ ਅਧਿਕਾਰਤ ਤੌਰ 'ਤੇ ਇਸ ਮਹਿੰਗੇ ਡਰੋਨ ਦੇ ਗੁਆਚਣ ਦੀ ਪੁਸ਼ਟੀ ਕਰ ਦਿੱਤੀ ਹੈ।
250 ਮਿਲੀਅਨ ਡਾਲਰ ਸੀ ਡਰੋਨ ਦੀ ਕੀਮਤ
ਰਿਪੋਰਟਾਂ ਅਨੁਸਾਰ, ਇਸ ਡਰੋਨ ਦੀ ਕੀਮਤ ਲਗਭਗ 240 ਤੋਂ 250 ਮਿਲੀਅਨ ਡਾਲਰ (ਭਾਰਤੀ ਕਰੰਸੀ ਮੁਤਾਬਕ ਲਗਭਗ 2000 ਕਰੋੜ ਰੁਪਏ ਤੋਂ ਵੱਧ) ਸੀ। ਅਮਰੀਕੀ ਰੱਖਿਆ ਵਿਭਾਗ ਦੇ ਨਿਯਮਾਂ ਅਨੁਸਾਰ, 2.5 ਮਿਲੀਅਨ ਡਾਲਰ ਤੋਂ ਵੱਧ ਦੇ ਨੁਕਸਾਨ ਵਾਲੀ ਘਟਨਾ ਨੂੰ 'ਕਲਾਸ ਏ' (Class A) ਹਾਦਸਾ ਮੰਨਿਆ ਜਾਂਦਾ ਹੈ, ਅਤੇ ਇਹ ਘਟਨਾ ਇਸੇ ਸ਼੍ਰੇਣੀ ਵਿੱਚ ਦਰਜ ਕੀਤੀ ਗਈ ਹੈ।
ਈਰਾਨ ਵੱਲੋਂ ਮਾਰ ਗਿਰਾਉਣ ਦੀ ਚਰਚਾ, ਅਮਰੀਕਾ ਨੇ ਕਿਹਾ 'ਕ੍ਰੈਸ਼'
ਸ਼ੁਰੂਆਤੀ ਰਿਪੋਰਟਾਂ ਵਿੱਚ ਇਹ ਦਾਅਵਾ ਕੀਤਾ ਗਿਆ ਸੀ ਕਿ ਈਰਾਨੀ ਫੌਜਾਂ ਨੇ ਇਸ ਡਰੋਨ ਨੂੰ ਤਬਾਹ ਕਰ ਦਿੱਤਾ ਹੈ, ਪਰ ਅਮਰੀਕੀ ਅਧਿਕਾਰੀਆਂ ਨੇ ਹੁਣ ਇਸ ਨੂੰ ਸਿਰਫ਼ ਇੱਕ 'ਕ੍ਰੈਸ਼' ਦੱਸਿਆ ਹੈ। 9 ਅਪ੍ਰੈਲ ਨੂੰ ਵਾਪਰੇ ਇਸ ਹਾਦਸੇ ਵਿੱਚ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਜ਼ਿਕਰਯੋਗ ਹੈ ਕਿ 1 ਅਪ੍ਰੈਲ ਤੋਂ ਹੁਣ ਤੱਕ ਅਮਰੀਕਾ ਸਟਰੇਟ ਆਫ ਹਾਰਮੁਜ਼ ਦੇ ਇਲਾਕੇ ਵਿੱਚ ਲਗਭਗ 24 MQ-9 ਰੀਪਰ ਡਰੋਨ ਗੁਆ ਚੁੱਕਾ ਹੈ, ਜਿਸ ਨਾਲ ਉਸਨੂੰ 720 ਮਿਲੀਅਨ ਡਾਲਰ ਦਾ ਵਾਧੂ ਫਟਕਾ ਲੱਗਾ ਹੈ।
ਡਰੋਨ ਦੀਆਂ ਖੂਬੀਆਂ
MQ-4C ਟ੍ਰਾਈਟਨ ਡਰੋਨ ਨੌਰਥਰੋਪ ਗਰੁਮੈਨ ਕੰਪਨੀ ਦੁਆਰਾ ਬਣਾਇਆ ਗਿਆ ਹੈ, ਜੋ ਖਾਸ ਤੌਰ 'ਤੇ ਸਮੁੰਦਰੀ ਖੇਤਰ ਵਿੱਚ ਖੁਫੀਆ ਜਾਣਕਾਰੀ ਇਕੱਠੀ ਕਰਨ ਅਤੇ ਨਿਗਰਾਨੀ ਲਈ ਵਰਤਿਆ ਜਾਂਦਾ ਹੈ। ਇਹ ਡਰੋਨ 50,000 ਫੁੱਟ ਤੋਂ ਵੱਧ ਦੀ ਉਚਾਈ 'ਤੇ ਉੱਡ ਸਕਦਾ ਹੈ ਅਤੇ ਇੱਕ ਵਾਰ ਵਿੱਚ ਲਗਾਤਾਰ 24 ਘੰਟਿਆਂ ਤੱਕ ਜਾਸੂਸੀ ਕਰਨ ਦੀ ਸਮਰੱਥਾ ਰੱਖਦਾ ਹੈ। ਇਸ ਵਿੱਚ 360-ਡਿਗਰੀ ਸੈਂਸਰ ਲੱਗੇ ਹੁੰਦੇ ਹਨ ਜੋ ਦੁਸ਼ਮਣ ਦੀਆਂ ਹਰਕਤਾਂ ਦਾ ਤੁਰੰਤ ਪਤਾ ਲਗਾ ਲੈਂਦੇ ਹਨ। ਅਧਿਕਾਰੀਆਂ ਮੁਤਾਬਕ ਇਹ ਡਰੋਨ ਆਮ ਜਹਾਜ਼ਾਂ ਦੇ ਮੁਕਾਬਲੇ ਅੱਧੇ ਖਰਚੇ 'ਤੇ 33 ਫੀਸਦੀ ਜ਼ਿਆਦਾ ਪ੍ਰਭਾਵਸ਼ਾਲੀ ਨਤੀਜੇ ਦਿੰਦਾ ਹੈ।