ਅਮਰੀਕਾ, ਦੱਖਣੀ ਕੋਰੀਆ ਅਤੇ ਜਾਪਾਨ ਨੇ ਸੋਮਵਾਰ ਨੂੰ ਦੱਖਣੀ ਕੋਰੀਆ ਦੇ ਇੱਕ ਟਾਪੂ ਦੇ ਨੇੜੇ ਹਵਾਈ ਅਤੇ ਜਲ ਸੈਨਾ ਅਭਿਆਸ ਸ਼ੁਰੂ ਕੀਤਾ। ਇਸ ਤੋਂ ਬਾਅਦ ਉੱਤਰੀ ਕੋਰੀਆ ਨੇ ਇਸ ਸਾਂਝੇ ਫੌਜੀ ਅਭਿਆਸ ਦੀ ਨਿੰਦਾ ਕੀਤੀ ਤੇ ਇਸ ਨੂੰ "ਸ਼ਕਤੀ ਦਾ ਲਾਪਰਵਾਹ ਪ੍ਰਦਰਸ਼ਨ" ਕਿਹਾ। ਦੱਖਣੀ ਕੋਰੀਆ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ 'ਫ੍ਰੀਡਮ ਐੱਜ' ਨਾਂ ਦਾ ਇਹ ਅਭਿਆਸ ਸਮੁੰਦਰ, ਹਵਾਈ ਅਤੇ ਸਾਈਬਰ ਖੇਤਰ ਵਿੱਚ ਤਿੰਨਾਂ ਦੇਸ਼ਾਂ ਦੀ ਸਾਂਝੀ ਸੰਚਾਲਨ ਸਮਰੱਥਾ ਨੂੰ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਕੀਤਾ ਜਾ ਰਿਹਾ ਹੈ।
ਇਹ ਉੱਤਰੀ ਕੋਰੀਆ ਤੋਂ ਵਧ ਰਹੇ ਪ੍ਰਮਾਣੂ ਅਤੇ ਮਿਜ਼ਾਈਲ ਖਤਰਿਆਂ ਦਾ ਮੁਕਾਬਲਾ ਕਰਨ ਲਈ ਜ਼ਰੂਰੀ ਹੈ। ਯੂ.ਐੱਸ. ਇੰਡੋ-ਪੈਸੀਫਿਕ ਕਮਾਂਡ ਨੇ ਕਿਹਾ ਕਿ ਇਸ ਅਭਿਆਸ ਵਿੱਚ ਯੂ.ਐੱਸ. ਮਰੀਨ ਅਤੇ ਏਅਰ ਫੋਰਸ ਦੇ ਹਵਾਈ ਉਪਕਰਣ ਸ਼ਾਮਲ ਹੋਣਗੇ ਅਤੇ ਇਸ ਵਿੱਚ ਉੱਨਤ ਬੈਲਿਸਟਿਕ ਮਿਜ਼ਾਈਲ ਅਤੇ ਹਵਾਈ-ਰੱਖਿਆ ਅਭਿਆਸ, ਮੈਡੀਕਲ ਨਿਕਾਸੀ ਅਤੇ ਸਮੁੰਦਰੀ ਕਾਰਜਾਂ ਲਈ ਸਿਖਲਾਈ ਸ਼ਾਮਲ ਹੋਵੇਗੀ। ਇਸ ਨੂੰ ਹੁਣ ਤੱਕ ਦਾ ਸਭ ਤੋਂ ਉੱਨਤ ਤਿਕੋਣੀ ਰੱਖਿਆ ਸਹਿਯੋਗ ਅਭਿਆਸ ਦੱਸਿਆ ਗਿਆ ਹੈ।
ਇਹ ਅਭਿਆਸ ਦੱਖਣੀ ਕੋਰੀਆ ਦੇ ਦੱਖਣੀ ਜੇਜੂ ਟਾਪੂ ਦੇ ਨੇੜੇ ਸ਼ੁੱਕਰਵਾਰ ਤੱਕ ਜਾਰੀ ਰਹੇਗਾ। ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਦੀ ਭੈਣ ਕਿਮ ਯੋ ਜੋਂਗ ਨੇ ਸਰਕਾਰੀ ਮੀਡੀਆ ਵਿੱਚ ਇਨ੍ਹਾਂ ਅਭਿਆਸਾਂ ਦੀ ਆਲੋਚਨਾ ਕੀਤੀ। ਉਨ੍ਹਾਂ ਕਿਹਾ ਕਿ "ਉੱਤਰੀ ਕੋਰੀਆ ਦੇ ਆਲੇ ਦੁਆਲੇ ਸ਼ਕਤੀ ਦਾ ਇਹ ਲਾਪਰਵਾਹ ਪ੍ਰਦਰਸ਼ਨ ਅੰਤ ਵਿੱਚ ਉਨ੍ਹਾਂ ਲਈ ਮਾੜੇ ਨਤੀਜੇ ਲਿਆਏਗਾ।"