ਨਵੀਂ ਦਿੱਲੀ : ਭਾਰਤੀ ਸਟੇਟ ਬੈਂਕ (ਐੱਸ. ਬੀ. ਆਈ.) ਅਤੇ 7 ਹੋਰ ਬੈਂਕਾਂ ਨੇ ਯੈੱਸ ਬੈਂਕ ’ਚ ਆਪਣੀ ਸਾਂਝੀ ਹਿੱਸੇਦਾਰੀ ਦਾ 20 ਫ਼ੀਸਦੀ ਜਾਪਾਨ ਦੀ ਸੁਮਿਤੋਮੋ ਮਿਤਸੁਈ ਬੈਂਕਿੰਗ ਕਾਰਪੋਰੇਸ਼ਨ (ਐੱਸ. ਐੱਮ. ਬੀ. ਸੀ.) ਨੂੰ 13,483 ਕਰੋੜ ਰੁਪਏ ’ਚ ਵੇਚਣ ਦਾ ਐਲਾਨ ਕੀਤਾ।
ਇਸ ਦੇ ਨਾਲ ਹੀ ਇਹ ਭਾਰਤੀ ਬੈਂਕਿੰਗ ਖੇਤਰ ’ਚ ਸਭ ਤੋਂ ਵੱਡਾ ਵਿਦੇਸ਼ੀ ਨਿਵੇਸ਼ ਹੋ ਜਾਵੇਗਾ।
ਲੈਣ-ਦੇਣ ਪੂਰਾ ਹੋਣ ਤੋਂ ਬਾਅਦ ਐੱਸ. ਐੱਮ. ਬੀ. ਸੀ. ਮੁੰਬਈ ਸਥਿਤ ਯੈੱਸ ਬੈਂਕ ਦੀ ਸਭ ਤੋਂ ਵੱਡੀ ਸ਼ੇਅਰਧਾਰਕ ਬਣ ਜਾਵੇਗੀ। ਐੱਸ. ਐੱਮ. ਬੀ. ਸੀ. ਜਾਪਾਨ ਦੇ ਦੂਜੇ ਵੱਡੇ ਬੈਂਕਿੰਗ ਸਮੂਹ ਸੁਮਿਤੋਮੋ ਮਿਤਸੁਈ ਫਾਈਨਾਂਸ਼ੀਅਲ ਗਰੁੱਪ (ਐੱਸ. ਐੱਮ. ਐੱਫ. ਜੀ.) ਦੀ ਪੂਰਨ ਮਾਲਕੀ ਵਾਲੀ ਇਕਾਈ ਹੈ।
ਐੱਸ. ਐੱਮ. ਐੱਫ. ਜੀ. ਦੀ ਕੁੱਲ ਜਾਇਦਾਦ ਦਸੰਬਰ, 2024 ਤੱਕ 2 ਲੱਖ ਕਰੋੜ ਡਾਲਰ ਹੈ। ਸੌਦੇ ਵਾਲੀ ਕੁੱਲ 20 ਫ਼ੀਸਦੀ ਹਿੱਸੇਦਾਰੀ ’ਚੋਂ ਐੱਸ. ਬੀ. ਆਈ. 8,889 ਕਰੋੜ ਰੁਪਏ ’ਚ ਐੱਸ. ਐੱਮ. ਬੀ. ਸੀ. ਦੇ ਪੱਖ ’ਚ 13.19 ਫ਼ੀਸਦੀ ਹਿੱਸੇਦਾਰੀ ਵੇਚੇਗਾ। ਬਾਕੀ 6.81 ਫ਼ੀਸਦੀ ਹਿੱਸੇਦਾਰੀ 7 ਹੋਰ ਬੈਂਕਾਂ- ਐਕਸਿਸ ਬੈਂਕ, ਬੰਧਨ ਬੈਂਕ, ਫੈਡਰਲ ਬੈਂਕ, ਐੱਚ. ਡੀ. ਐੱਫ. ਸੀ. ਬੈਂਕ, ਆਈ. ਸੀ. ਆਈ. ਸੀ. ਆਈ. ਬੈਂਕ, ਆਈ. ਡੀ. ਐੱਫ. ਸੀ. ਫਸਟ ਬੈਂਕ ਅਤੇ ਕੋਟਕ ਮਹਿੰਦਰਾ ਬੈਂਕ ਵੱਲੋਂ ਲੱਗਭਗ 4,594 ਕਰੋੜ ਰੁਪਏ ’ਚ ਵੇਚੀ ਜਾਵੇਗੀ।
ਐੱਸ. ਬੀ. ਆਈ. ਨੇ ਸ਼ੇਅਰ ਬਾਜ਼ਾਰ ਨੂੰ ਦਿੱਤੀ ਸੂਚਨਾ ’ਚ ਕਿਹਾ ਕਿ ਬੈਂਕ ਦੇ ਕੇਂਦਰੀ ਨਿਰਦੇਸ਼ਕ ਮੰਡਲ ਦੀ ਕਾਰਜਕਾਰੀ ਕਮੇਟੀ (ਈ. ਸੀ. ਸੀ. ਬੀ.) ਨੇ ਯੈੱਸ ਬੈਂਕ ਦੇ 413.44 ਕਰੋੜ ਸ਼ੇਅਰ ਭਾਵ 13.19 ਫ਼ੀਸਦੀ ਇਕੁਇਟੀ ਦੇ ਬਰਾਬਰ ਹਿੱਸੇਦਾਰੀ 8,888.97 ਕਰੋੜ ਰੁਪਏ ’ਚ ਵੇਚਣ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।
ਇਹ ਲੈਣ-ਦੇਣ ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਅਤੇ ਭਾਰਤੀ ਮੁਕਾਬਲੇਬਾਜ਼ੀ ਕਮਿਸ਼ਨ (ਸੀ. ਸੀ. ਆਈ.) ਸਮੇਤ ਜ਼ਰੂਰੀ ਰੈਗੂਲੇਸ਼ਨ ਅਤੇ ਕਾਨੂੰਨੀ ਪ੍ਰਵਾਨਗੀਆਂ ਦੇ ਅਧੀਨ ਹੈ ਅਤੇ ਇਹ ਪ੍ਰਕਿਰਿਆਤਮਕ ਸਮਾਪਤੀ ਸ਼ਰਤਾਂ ਦੇ ਅਧੀਨ ਹੋਵੇਗਾ। ਇਹ ਲੈਣ-ਦੇਣ ਯੈੱਸ ਬੈਂਕ ਦੀ ਮਾਲਕੀ ਅਤੇ ਰਣਨੀਤਿਕ ਦਿਸ਼ਾ ਨੂੰ ਨਵਾਂ ਆਕਾਰ ਦੇ ਸਕਦਾ ਹੈ। ਅੱਜ ਬੀ. ਐੱਸ. ਈ. ’ਤੇ ਯੈੱਸ ਬੈਂਕ ਦਾ ਸ਼ੇਅਰ 9.77 ਫ਼ੀਸਦੀ ਵਧ ਕੇ 20 ਰੁਪਏ ਪ੍ਰਤੀ ਇਕਾਈ ’ਤੇ ਬੰਦ ਹੋਇਆ।