ਨਵੀਂ ਦਿੱਲੀ : ਦੇਸ਼ ਦੀ ਸਭ ਤੋਂ ਵੱਡੀ ਜਨਤਕ ਖੇਤਰ ਦੀ ਸਟੀਲ ਉਤਪਾਦਕ ਕੰਪਨੀ, ਸਟੀਲ ਅਥਾਰਟੀ ਆਫ ਇੰਡੀਆ ਲਿਮਟਿਡ (SAIL) ਨੇ ਭਾਰਤੀ ਜਲ ਸੈਨਾ ਦੀ ਸਮਰੱਥਾ ਨੂੰ ਵਧਾਉਣ 'ਚ ਇਕ ਅਹਿਮ ਭੂਮਿਕਾ ਨਿਭਾਈ ਹੈ। ਕੰਪਨੀ ਨੇ ਜਲ ਸੈਨਾ ਦੇ ਨਵੇਂ ਜੰਗੀ ਬੇੜੇ 'INS ਅੰਜਦੀਪ' ਲਈ ਲੋੜੀਂਦੇ ਵਿਸ਼ੇਸ਼-ਗ੍ਰੇਡ ਸਟੀਲ ਦੀ ਸਪਲਾਈ ਕੀਤੀ ਹੈ, ਜਿਸ ਦਾ ਹਾਲ ਹੀ 'ਚ ਜਲਾਵਤਰਣ (ਲਾਂਚ) ਕੀਤਾ ਗਿਆ ਹੈ।
ਤੱਟਵਰਤੀ ਸੁਰੱਖਿਆ ਹੋਵੇਗੀ ਮਜ਼ਬੂਤ
ਕੋਲਕਾਤਾ ਸਥਿਤ ਗਾਰਡਨ ਰੀਚ ਸ਼ਿਪਬਿਲਡਰਜ਼ ਐਂਡ ਇੰਜੀਨੀਅਰਜ਼ (GRSE) ਦੁਆਰਾ ਤਿਆਰ ਕੀਤਾ ਗਿਆ 'INS ਅੰਜਦੀਪ' ਇਕ ਅਤਿ-ਆਧੁਨਿਕ ਜੰਗੀ ਬੇੜਾ ਹੈ। ਇਹ ਵਿਸ਼ੇਸ਼ ਤੌਰ 'ਤੇ ਉਥਲ-ਪੁਥਲ ਵਾਲੇ ਅਤੇ ਘੱਟ ਡੂੰਘੇ ਪਾਣੀ ਵਾਲੇ ਖੇਤਰਾਂ 'ਚ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਬਣਾਇਆ ਗਿਆ ਹੈ। ਇਸ ਦਾ ਮੁੱਖ ਕੰਮ ਭਾਰਤੀ ਜਲ ਸੈਨਾ ਦੀ ਪਣਡੁੱਬੀ ਵਿਰੋਧੀ ਜੰਗੀ ਸਮਰੱਥਾ ਅਤੇ ਤੱਟਵਰਤੀ ਨਿਗਰਾਨੀ ਨੂੰ ਮਜ਼ਬੂਤ ਕਰਨਾ ਹੈ। ਇਹ 'ਐਂਟੀ-ਸਬਮਰੀਨ ਵਾਰਫੇਅਰ ਸ਼ੈਲੋ ਵਾਟਰ ਕ੍ਰਾਫਟ' (ASW-SWC) ਪ੍ਰਾਜੈਕਟ ਦੇ ਤਹਿਤ ਬਣਾਏ ਜਾ ਰਹੇ ਅੱਠ ਜਹਾਜ਼ਾਂ 'ਚੋਂ ਤੀਜਾ ਹੈ, ਜੋ ਪੁਰਾਣੇ ਹੋ ਰਹੇ 'ਅਭੈ-ਸ਼੍ਰੇਣੀ' ਦੇ ਜਹਾਜ਼ਾਂ ਦੀ ਜਗ੍ਹਾ ਲਵੇਗਾ।
ਦੇਸ਼ ਦੇ ਤਿੰਨ ਵੱਡੇ ਪਲਾਂਟਾਂ ਦਾ ਯੋਗਦਾਨ
SAIL ਨੇ ਇਸ ਰਣਨੀਤਕ ਪ੍ਰਾਜੈਕਟ ਲਈ ਲਗਭਗ 3,500 ਟਨ ਵਿਸ਼ੇਸ਼-ਗ੍ਰੇਡ ਸਟੀਲ ਦੀ ਸਪਲਾਈ ਪੂਰੀ ਕਰ ਦਿੱਤੀ ਹੈ। ਇਹ ਸਟੀਲ ਕੰਪਨੀ ਦੇ ਬੋਕਾਰੋ, ਭਿਲਾਈ ਅਤੇ ਰਾਉਰਕੇਲਾ ਸਥਿਤ ਏਕੀਕ੍ਰਿਤ ਸਟੀਲ ਪਲਾਂਟਾਂ ਤੋਂ ਤਿਆਰ ਕੀਤਾ ਗਿਆ ਹੈ। ਇਹ ਪ੍ਰਾਪਤੀ ਰੱਖਿਆ ਨਿਰਮਾਣ ਵਿੱਚ ਭਾਰਤ ਦੀ ਆਤਮ-ਨਿਰਭਰਤਾ ਨੂੰ ਦਰਸਾਉਂਦੀ ਹੈ ਅਤੇ ਵਿਦੇਸ਼ੀ ਆਯਾਤ 'ਤੇ ਨਿਰਭਰਤਾ ਨੂੰ ਘਟਾਉਂਦੀ ਹੈ।
ਰੱਖਿਆ ਖੇਤਰ 'ਚ SAIL ਦੀ ਪੁਰਾਣੀ ਭਾਈਵਾਲੀ
ਇਹ ਪਹਿਲੀ ਵਾਰ ਨਹੀਂ ਹੈ ਕਿ SAIL ਨੇ ਦੇਸ਼ ਦੀ ਸੁਰੱਖਿਆ 'ਚ ਅਜਿਹਾ ਯੋਗਦਾਨ ਪਾਇਆ ਹੋਵੇ। ਇਸ ਤੋਂ ਪਹਿਲਾਂ ਵੀ ਕੰਪਨੀ ਨੇ INS ਵਿਕਰਾਂਤ, INS ਉਦੈਗਿਰੀ, INS ਨੀਲਗਿਰੀ ਅਤੇ INS ਸੂਰਤ ਵਰਗੇ ਕਈ ਮਹੱਤਵਪੂਰਨ ਰੱਖਿਆ ਪ੍ਰਾਜੈਕਟਾਂ ਲਈ ਵਿਸ਼ੇਸ਼ ਸਟੀਲ ਦੀ ਸਪਲਾਈ ਕੀਤੀ ਹੈ। ਇਹ ਕਦਮ ਭਾਰਤ ਸਰਕਾਰ ਦੇ 'ਆਤਮਨਿਰਭਰ ਭਾਰਤ' ਦੇ ਵਿਜ਼ਨ ਨੂੰ ਹੋਰ ਮਜ਼ਬੂਤ ਕਰਦਾ ਹੈ।