ਭੋਪਾਲ : ਮੱਧ ਪ੍ਰਦੇਸ਼ ਸਰਕਾਰ ਨੇ ਰਾਸ਼ਟਰੀ ਸਵੈਮ ਸੇਵਕ ਸੰਘ (RSS) ਦੇ 100 ਸਾਲਾਂ ਦੇ ਸਫ਼ਰ 'ਤੇ ਆਧਾਰਿਤ ਹਿੰਦੀ ਫ਼ਿਲਮ 'ਸ਼ਤਕ: ਸੰਘ ਕੇ 100 ਸਾਲ (2026)' ਨੂੰ ਪੂਰੇ ਸੂਬੇ ਵਿੱਚ ਟੈਕਸ ਫ੍ਰੀ (ਮਨੋਰੰਜਨ ਟੈਕਸ ਮੁਕਤ) ਕਰ ਦਿੱਤਾ ਹੈ। ਮੁੱਖ ਮੰਤਰੀ ਮੋਹਨ ਯਾਦਵ ਨੇ ਸੋਸ਼ਲ ਮੀਡੀਆ ਰਾਹੀਂ ਇਸ ਦਾ ਐਲਾਨ ਕਰਦਿਆਂ ਫ਼ਿਲਮ ਦੀ ਸ਼ਲਾਘਾ ਕੀਤੀ ਹੈ।
"ਰਾਸ਼ਟਰ ਸੇਵਾ ਤੇ ਕਦਰਾਂ-ਕੀਮਤਾਂ ਦੀ ਪ੍ਰਤੀਕ ਹੈ ਫ਼ਿਲਮ"
ਮੁੱਖ ਮੰਤਰੀ ਮੋਹਨ ਯਾਦਵ ਨੇ 'X' 'ਤੇ ਪੋਸਟ ਸਾਂਝੀ ਕਰਦਿਆਂ ਲਿਖਿਆ, "ਹਿੰਦੀ ਫ਼ਿਲਮ 'ਸ਼ਤਕ' ਨੂੰ ਪੂਰੇ ਮੱਧ ਪ੍ਰਦੇਸ਼ ਵਿੱਚ ਟੈਕਸ ਮੁਕਤ ਕੀਤਾ ਗਿਆ ਹੈ। ਇਹ ਫ਼ਿਲਮ ਰਾਸ਼ਟਰੀ ਸੇਵਾ ਅਤੇ ਉਨ੍ਹਾਂ ਮੁੱਲਾਂ ਦੀ ਪਰੰਪਰਾ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਪੇਸ਼ ਕਰਦੀ ਹੈ, ਜਿਨ੍ਹਾਂ ਨੂੰ ਆਰ.ਐੱਸ.ਐੱਸ. ਨੇ ਦਹਾਕਿਆਂ ਤੋਂ ਜਿਉਂਦਾ ਰੱਖਿਆ ਹੈ।" ਉਨ੍ਹਾਂ ਅੱਗੇ ਕਿਹਾ ਕਿ ਇਹ ਫ਼ਿਲਮ ਚਰਿੱਤਰ ਨਿਰਮਾਣ ਅਤੇ ਸੇਵਾ ਭਾਵਨਾ ਰਾਹੀਂ ਇੱਕ ਮਜ਼ਬੂਤ ਅਤੇ ਆਤਮ-ਨਿਰਭਰ ਭਾਰਤ ਦੇ ਨਿਰਮਾਣ ਦਾ ਸੁਨੇਹਾ ਦਿੰਦੀ ਹੈ।
ਫ਼ਿਲਮ ਵਿੱਚ ਕੀ ਹੈ ਖ਼ਾਸ?
ਇਤਿਹਾਸਕ ਪਿਛੋਕੜ 'ਤੇ ਆਧਾਰਿਤ ਇਸ ਫ਼ਿਲਮ ਵਿੱਚ ਸੰਘ ਦੇ ਸੰਸਥਾਪਕ ਕੇਸ਼ਵ ਬਲੀਰਾਮ ਹੇਡਗੇਵਾਰ ਦੇ ਨਾਗਪੁਰ ਵਿੱਚ ਬਚਪਨ, ਉਨ੍ਹਾਂ ਦਾ 'ਅਨੁਸ਼ੀਲਨ ਸਮਿਤੀ' ਨਾਲ ਜੁੜਾਅ ਅਤੇ 1925 ਵਿੱਚ ਸੰਗਠਨ ਦੀ ਸਥਾਪਨਾ ਤੱਕ ਦੇ ਘਟਨਾਕ੍ਰਮ ਨੂੰ ਦਿਖਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਫ਼ਿਲਮ ਵਿੱਚ, ਦਾਦਰਾ ਅਤੇ ਨਗਰ ਹਵੇਲੀ ਦੀ ਮੁਕਤੀ ਅਤੇ 1948 ਦਾ ਕਸ਼ਮੀਰ ਸੰਕਟ ਵਰਗੇ ਸੰਘਰਸ਼ਾਂ ਦਾ ਵੀ ਜ਼ਿਕਰ ਹੈ।
ਆਸ਼ੀਸ਼ ਮਾਲ ਨੇ ਕੀਤਾ ਹੈ ਨਿਰਦੇਸ਼ਨ
ਇਸ ਫ਼ਿਲਮ ਦਾ ਨਿਰਦੇਸ਼ਨ ਆਸ਼ੀਸ਼ ਮਾਲ ਨੇ ਕੀਤਾ ਹੈ ਅਤੇ ਨਿਰਮਾਣ ਵੀਰ ਕਪੂਰ ਵੱਲੋਂ ਕੀਤਾ ਗਿਆ ਹੈ। ਇਹ ਫ਼ਿਲਮ 19 ਫਰਵਰੀ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਹੈ। ਹੁਣ ਮੱਧ ਪ੍ਰਦੇਸ਼ ਵਿੱਚ ਟੈਕਸ ਫ੍ਰੀ ਹੋਣ ਤੋਂ ਬਾਅਦ ਆਮ ਲੋਕ ਸਸਤੀਆਂ ਟਿਕਟਾਂ 'ਤੇ ਇਹ ਫ਼ਿਲਮ ਦੇਖ ਸਕਣਗੇ।