ਲੰਡਨ : ਲੰਡਨ ਦੇ ਹੀਥਰੋ ਹਵਾਈ ਅੱਡੇ ਤੋਂ ਬੈਂਗਲੁਰੂ ਲਈ ਉਡਾਣ ਭਰਨ ਵਾਲੇ ਏਅਰ ਇੰਡੀਆ ਦੇ ਬੋਇੰਗ 787-8 ਡ੍ਰੀਮਲਾਈਨਰ ਨੂੰ ਫਲਾਈਟ ਆਪ੍ਰੇਸ਼ਨ ਤੋਂ ਹਟਾ ਦਿੱਤਾ ਗਿਆ ਹੈ।ਏਅਰਲਾਈਨ ਮੁਤਾਬਕ, ਫਲਾਈਟ ਏ. ਆਈ. 132 ਨੇ ਉਡਾਣ ਭਰਨੀ ਸੀ, ਪਰ ਪਾਇਲਟ ਨੇ ਦੱਸਿਆ ਕਿ ਪਲੇਨ ਦਾ ਫਿਊਲ ਕੰਟਰੋਲ ਸਵਿੱਚ ਇੰਜਣ ਸਟਾਰਟ ਕਰਨ ਦੌਰਾਨ 2 ਵਾਰ ਪੁਜ਼ੀਸ਼ਨ ਤੋਂ ਕੱਟਆਫ ਹੋਇਆ। ਇਸ ਤੋਂ ਬਾਅਦ ਪਲੇਨ ਨੂੰ ਆਪ੍ਰੇਸ਼ਨ ਤੋਂ ਹਟਾ ਦਿੱਤਾ ਗਿਆ। ਜਹਾਜ਼ ’ਚ ਆਈ ਖਰਾਬੀ ਦੀ ਜਾਂਚ ’ਚ ਓਰੀਜਨਲ ਇਕੁਇਪਮੈਂਟ ਮੈਨੂਫੈਕਚਰਰ (ਬੋਇੰਗ ਕੰਪਨੀ) ਨੂੰ ਸ਼ਾਮਲ ਕੀਤਾ ਗਿਆ ਹੈ। ਮਾਮਲੇ ਦੀ ਜਾਣਕਾਰੀ ਸ਼ਹਿਰੀ ਹਵਾਬਾਜ਼ੀ ਦੇ ਡਾਇਰੈਕਟੋਰੇਟ ਜਨਰਲ (ਡੀ. ਜੀ. ਸੀ. ਏ.) ਨੂੰ ਵੀ ਦਿੱਤੀ ਗਈ ਹੈ।
ਏਅਰਲਾਈਨ ਨੇ ਦੱਸਿਆ ਕਿ ਡੀ. ਜੀ. ਸੀ. ਏ. ਦੇ ਹੁਕਮ ਤੋਂ ਬਾਅਦ ਉਸ ਨੇ ਆਪਣੇ ਪੂਰੇ ਬੋਇੰਗ 787 ਫਲੀਟ ਦੇ ਫਿਊਲ ਕੰਟਰੋਲ ਸਵਿੱਚ ਦੀ ਜਾਂਚ ਕੀਤੀ ਸੀ, ਜਿਸ ’ਚ ਕੋਈ ਸਮੱਸਿਆ ਸਾਹਮਣੇ ਨਹੀਂ ਆਈ ਸੀ। ਰਿਪੋਰਟਾਂ ’ਚ ਦਾਅਵਾ ਕੀਤਾ ਗਿਆ ਹੈ ਕਿ ਪਿਛਲੇ ਸਾਲ 12 ਜੂਨ ਨੂੰ ਅਹਿਮਦਾਬਾਦ ’ਚ ਪਲੇਨ ਕ੍ਰੈਸ਼ ਵੀ ਫਿਊਲ ਕੰਟਰੋਲ ਸਵਿੱਚ ਇੰਜਣ ਸਟਾਰਟ ਕਰਨ ’ਚ ਦਿੱਕਤ ਦੀ ਵਜ੍ਹਾ ਕਾਰਨ ਹੋਇਆ ਸੀ।
ਫਿਊਲ ਕੰਟਰੋਲ ਸਵਿੱਚ ਜਹਾਜ਼ ਦੇ ਕਾਕਪਿਟ ’ਚ ਥ੍ਰਸਟ ਲੀਵਰ ਦੇ ਕੋਲ ਹੁੰਦੇ ਹਨ। ਇਹ ਇੰਜਣ ’ਚ ਫਿਊਲ ਦੀ ਸਪਲਾਈ ਨੂੰ ਕੰਟਰੋਲ ਕਰਦੇ ਹਨ। ਇਸ ਦਾ ਮੁੱਖ ਕੰਮ ਇੰਜਣ ’ਚ ਫਿਊਲ ਦੀ ਸਪਲਾਈ ਨੂੰ ਸ਼ੁਰੂ ਕਰਨਾ (ਰਨ ਪੁਜ਼ੀਸ਼ਨ) ਜਾਂ ਬੰਦ ਕਰਨਾ (ਕੱਟਆਫ ਪੁਜ਼ੀਸ਼ਨ) ਹੈ। ਹਰ ਇੰਜਣ ਲਈ ਵੱਖ-ਵੱਖ ਫਿਊਲ ਕੰਟਰੋਲ ਸਵਿੱਚ ਹੁੰਦਾ ਹੈ। ਉਦਾਹਰਣ ਲਈ, ਬੋਇੰਗ 787 ’ਚ 2 ਇੰਜਣ ਹਨ, ਤਾਂ 2 ਸਵਿੱਚ ਹੋਣਗੇ- ਇਕ ਖੱਬੇ ਇੰਜਣ ਲਈ, ਇਕ ਸੱਜੇ ਲਈ।