ਰੂਸੀ ਵਿਦੇਸ਼ ਮੰਤਰੀ ਸਰਗੇਈ ਲਾਵਰੋਵ ਨੇ ਐਤਵਾਰ ਨੂੰ ਕਿਹਾ ਕਿ ਰੂਸ, ਭਾਰਤ ਅਤੇ ਚੀਨ ਕਈ ਖੇਤਰਾਂ ਵਿਚ ਆਪਣੇ ਸਾਂਝੇ ਹਿੱਤਾਂ ਤੋਂ ਜਾਣੂ ਹਨ। ਤਿੰਨਾਂ ਦੇਸ਼ਾਂ ਵਿਚ ਆਪਸੀ ਭਾਈਵਾਲੀ ਵਿਕਸਤ ਕਰਨ ਦਾ ਸਪੱਸ਼ਟ ਰੁਝਾਨ ਹੈ।
ਲਾਵਰੋਵ ਪਿਛਲੇ ਹਫ਼ਤੇ ਚੀਨ ਦੇ ਤਿਆਨਜਿਨ ਸ਼ਹਿਰ ਵਿਚ ਹੋਏ ਐੱਸ.ਸੀ.ਓ. ਸਿਖਰ ਸੰਮੇਲਨ ਵਿਚ ਤਿੰਨੋਂ ਦੇਸ਼ਾਂ ਦੇ ਨੇਤਾਵਾਂ ਦੁਆਰਾ ਦਿਖਾਏ ਗਏ ਸੁਹਿਰਦ ਮਾਹੌਲ ਦਾ ਹਵਾਲਾ ਦੇ ਰਹੇ ਸਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਅਤੇ ਚੀਨੀ ਨੇਤਾ ਸ਼ੀ ਜਿਨਪਿੰਗ ਦੇ ਤਿੰਨ ਵਾਰ ਹੱਥ ਮਿਲਾਉਣ ਅਤੇ ਐੱਸ.ਸੀ.ਓ. ਸੰਮੇਲਨ ’ਚ ਇਕ-ਦੂਜੇ ਨਾਲ ਮੁਲਾਕਾਤ ਕਰਨ ਨੇ ਦੁਨੀਆ ਭਰ ਵਿਚ ਸੁਰਖੀਆਂ ਬਟੋਰੀਆਂ।
ਰੂਸੀ ਸਰਕਾਰੀ ਟੀ.ਵੀ. ਨੂੰ ਦਿੱਤੀ ਇਕ ਇੰਟਰਵਿਊ ’ਚ ਲਾਵਰੋਵ ਨੇ ਕਿਹਾ, “ਇਹ ਦਰਸਾਉਂਦਾ ਹੈ ਕਿ ਤਿੰਨ ਮਹਾਨ ਸੱਭਿਅਤਾਵਾਂ ਦੀ ਨੁਮਾਇੰਦਗੀ ਕਰਨ ਵਾਲੀਆਂ ਤਿੰਨ ਮਹਾਸ਼ਕਤੀਆਂ ਕਈ ਖੇਤਰਾਂ ਵਿਚ ਆਪਣੇ ਸਾਂਝੇ ਹਿੱਤਾਂ ਤੋਂ ਜਾਣੂ ਹਨ।”
ਅਟਕਲਾਂ ਨੂੰ ਪਾਸੇ ਕਰਦੇ ਹੋਏ ਲਾਵਰੋਵ ਨੇ ਸਪੱਸ਼ਟ ਕੀਤਾ ਕਿ ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਸਭ ਕੁਝ 100 ਫੀਸਦੀ ਇਕੋ ਜਿਹਾ ਹੈ ਪਰ ਚੀਨ, ਰੂਸ ਅਤੇ ਭਾਰਤ ਵਿਚ ਆਪਣੀ ਭਾਈਵਾਲੀ ਵਿਕਸਤ ਕਰਨ ਅਤੇ ਉਨ੍ਹਾਂ ਖੇਤਰਾਂ ਤੋਂ ਆਪਸੀ ਲਾਭ ਪ੍ਰਾਪਤ ਕਰਨ ਦਾ ਰੁਝਾਨ ਹੈ, ਜਿੱਥੇ ਸਾਡੇ ਸਾਂਝੇ ਹਿੱਤ ਹਨ।