ਮੁੰਬਈ : ਸੰਨੀ ਦਿਓਲ, ਵਰੁਣ ਧਵਨ ਅਤੇ ਪੰਜਾਬੀ ਸੁਪਰਸਟਾਰ ਦਿਲਜੀਤ ਦੋਸਾਂਝ ਦੀ ਉਡੀਕੀ ਜਾ ਰਹੀ ਫਿਲਮ ‘ਬਾਰਡਰ 2’ ਆਪਣੀ ਰਿਲੀਜ਼ ਤੋਂ ਪਹਿਲਾਂ ਹੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ‘ਘਰ ਕਬ ਆਓਗੇ’ ਦੀ ਵੱਡੀ ਸਫਲਤਾ ਤੋਂ ਬਾਅਦ ਨਿਰਮਾਤਾਵਾਂ ਨੇ ਹੁਣ ਫਿਲਮ ਦਾ ਇੱਕ ਹੋਰ ਨਵਾਂ ਗੀਤ ‘ਜਾਤੇ ਹੂਏ ਲਮਹੋਂ’ ਰਿਲੀਜ਼ ਕਰ ਦਿੱਤਾ ਹੈ। ਖ਼ਾਸ ਗੱਲ ਇਹ ਹੈ ਕਿ ਇਹ ਗੀਤ ਵੀ 1997 ਦੀ ਕਲਾਸਿਕ ਫਿਲਮ ‘ਬਾਰਡਰ’ ਦੇ ਅਸਲ ਗੀਤ ਦਾ ਰੀ-ਕ੍ਰਿਏਟਿਡ ਵਰਜ਼ਨ ਹੈ।
ਵਿਸ਼ਾਲ ਮਿਸ਼ਰਾ ਦੀ ਆਵਾਜ਼ ਦਾ ਜਾਦੂ
ਇਸ ਨਵੇਂ ਵਰਜ਼ਨ ਨੂੰ ਮਸ਼ਹੂਰ ਗਾਇਕ ਵਿਸ਼ਾਲ ਮਿਸ਼ਰਾ ਨੇ ਆਪਣੀ ਆਵਾਜ਼ ਦਿੱਤੀ ਹੈ। ਗੀਤ ਦੀ ਖ਼ੂਬਸੂਰਤੀ ਨੂੰ ਬਰਕਰਾਰ ਰੱਖਣ ਲਈ ਇਸ ਵਿੱਚ ਅਸਲ ਗਾਇਕ ਰੂਪ ਕੁਮਾਰ ਰਾਠੌੜ ਦੀ ਆਵਾਜ਼ ਵੀ ਸੁਣਾਈ ਦਿੰਦੀ ਹੈ। ਜਿੱਥੇ ਅਸਲ ਗੀਤ ਨੂੰ ਜਾਵੇਦ ਅਖ਼ਤਰ ਨੇ ਲਿਖਿਆ ਸੀ ਅਤੇ ਅਨੂ ਮਲਿਕ ਨੇ ਕੰਪੋਜ਼ ਕੀਤਾ ਸੀ, ਉੱਥੇ ਹੀ ਹੁਣ ਇਸ ਨੂੰ ਸੰਗੀਤਕਾਰ ਮਿਥੁਨ ਨੇ ਨਵੇਂ ਅੰਦਾਜ਼ ਵਿੱਚ ਤਿਆਰ ਕੀਤਾ ਹੈ।
ਫਿਲਮ ਦਾ ਤੀਜਾ ਗੀਤ ਹੋਇਆ ਰਿਲੀਜ਼
‘ਜਾਤੇ ਹੂਏ ਲਮਹੋਂ’ ਇਸ ਫਿਲਮ ਦਾ ਤੀਜਾ ਗੀਤ ਹੈ। ਇਸ ਤੋਂ ਪਹਿਲਾਂ ‘ਘਰ ਕਬ ਆਓਗੇ’ ਅਤੇ ਇੱਕ ਰੋਮਾਂਟਿਕ ਗੀਤ ‘ਇਸ਼ਕ ਦਾ ਚਿਹਰਾ’ ਰਿਲੀਜ਼ ਕੀਤੇ ਜਾ ਚੁੱਕੇ ਹਨ, ਜਿਨ੍ਹਾਂ ਨੂੰ ਪ੍ਰਸ਼ੰਸਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ ਹੈ।
23 ਜਨਵਰੀ ਨੂੰ ਸਿਨੇਮਾਘਰਾਂ 'ਚ ਹੋਵੇਗੀ ਦਸਤਕ
ਅਨੁਰਾਗ ਸਿੰਘ ਦੇ ਨਿਰਦੇਸ਼ਨ ਹੇਠ ਬਣੀ ਇਹ ਵਾਰ ਡਰਾਮਾ ਫਿਲਮ 23 ਜਨਵਰੀ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਣ ਲਈ ਤਿਆਰ ਹੈ। ਫਿਲਮ ਵਿੱਚ ਸੰਨੀ ਦਿਓਲ, ਵਰੁਣ ਧਵਨ, ਦਿਲਜੀਤ ਦੋਸਾਂਝ ਅਤੇ ਅਹਾਨ ਸ਼ੈੱਟੀ ਦੇ ਨਾਲ-ਨਾਲ ਮੋਨਾ ਸਿੰਘ ਅਤੇ ਪਾਲੀਵੁੱਡ ਦੀ ਮਸ਼ਹੂਰ ਅਦਾਕਾਰਾ ਸੋਨਮ ਬਾਜਵਾ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ। ਪ੍ਰਸ਼ੰਸਕ ਇਸ ਫਿਲਮ ਦਾ ਬੜੀ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ।