‘ਕੇ.ਜੀ.ਐੱਫ਼.’, ‘ਸਾਲਾਰ’ ਅਤੇ ‘ਕਾਂਤਾਰਾ’ ਵਰਗੀਆਂ ਭਾਰਤ ਦੀਆਂ ਵੱਡੀਆਂ ਪੈਨ ਇੰਡੀਆ ਬਲਾਕਬਸਟਰ ਫ਼ਿਲਮਾਂ ਦੇਣ ਤੋਂ ਲੈ ਕੇ ‘ਮਹਾਵਤਾਰ ਨਰਸਿੰਮ੍ਹਾ’ ਵਰਗੀਆਂ ਵੱਖਰੀ ਤਰ੍ਹਾਂ ਦੀਆਂ ਕਹਾਣੀਆਂ ਨੂੰ ਦਰਸ਼ਕਾਂ ਤੱਕ ਪਹੁੰਚਾਉਣ ਲਈ ਹੋਮਬਲੇ ਫ਼ਿਲਮਜ਼ ਲਗਾਤਾਰ ਭਾਰਤੀ ਸਿਨੇਮਾ ’ਚ ਨਵੇਂ ਪ੍ਰਯੋਗ ਕਰ ਰਿਹਾ ਹੈ। ‘ਸ਼ਰਣਾਗਤੀ’ ਇਕ ਐਨੀਮੇਸ਼ਨ ਫ਼ਿਲਮ ਹੈ, ਜਿਸ ਨੂੰ ਅਤਿ-ਆਧੁਨਿਕ ਏ.ਆਈ. ਮੋਸ਼ਨ ਕੈਪਚਰ ਟੈਕਨਾਲੋਜੀ ਦੀ ਮਦਦ ਨਾਲ ਤਿਆਰ ਕੀਤਾ ਗਿਆ ਹੈ।
ਹੋਮਬਲੇ ਫ਼ਿਲਮਜ਼ ਅਤੇ ਟ੍ਰਾਂਸੇਂਡੈਂਟਲ ਫ਼ਿਲਮਜ਼ ਨੇ ਮਿਲ ਕੇ ਇਕ ਐਨੀਮੇਟਡ ਫ਼ਿਲਮ ‘ਸ਼ਰਣਾਗਤੀ–ਦਿ ਲਾਈਫ਼ ਆਫ਼ ਏ ਸਰੈਂਡਰਡ ਸੋਲ’ ਦਾ ਐਲਾਨ ਕੀਤਾ ਹੈ। ਦੱਸ ਦੇਈਏ ਕਿ ਇਹ ਫ਼ਿਲਮ ਇੰਟਰਨੈਸ਼ਨਲ ਸੁਸਾਇਟੀ ਫ਼ਾਰ ਕ੍ਰਿਸ਼ਨਾ ਕਾਨਸ਼ੀਅਸਨੈੱਸ (ਇਸਕਾਨ) ਦੇ ਸੰਸਥਾਪਕ-ਆਚਾਰੀਆ, ਏ.ਸੀ. ਭਗਤੀਵੇਦਾਂਤ ਸਵਾਮੀ ਸ਼੍ਰੀਲ ਪ੍ਰਭੂਪਾਦ ਦੇ ਪ੍ਰੇਰਨਾਦਾਇਕ ਅਤੇ ਵਿਲੱਖਣ ਜੀਵਨ ਦੇ ਸਫ਼ਰ ’ਤੇ ਹੋਣ ਵਾਲੀ ਹੈ, ਜਿਸ ਵਿਚ ਦਰਸ਼ਕ ਰੂਹਾਨੀ ਮਿਸ਼ਨ ਲਈ ਉਨ੍ਹਾਂ ਦੇ ਸਮਰਪਣ ਨੂੰ ਦੇਖਣ ਦੇ ਨਾਲ-ਨਾਲ ਨੇੜਿਓਂ ਮਹਿਸੂਸ ਕਰ ਸਕਣਗੇ। ਆਰਟੀਫ਼ਿਸ਼ੀਅਲ ਇੰਟੈਲੀਜੈਂਸ ਮੋਸ਼ਨ ਕੈਪਚਰ ਟੈਕਨਾਲੋਜੀ ਇਕ ਅਜਿਹੀ ਚੀਜ਼ ਹੈ ਜੋ ਇਸ ਫ਼ਿਲਮ ਨੂੰ ਹੋਰ ਫ਼ਿਲਮਾਂ ਤੋਂ ਵੱਖਰਾ ਬਣਾਉਂਦੀ ਹੈ।
ਇਹ ਫ਼ਿਲਮ ਸ਼੍ਰੀਲ ਪ੍ਰਭੂਪਾਦ ਦੇ ਅਦਭੁਤ ਜੀਵਨ ਸਫ਼ਰ ਨੂੰ ਦਿਖਾਏਗੀ। 69 ਸਾਲ ਦੀ ਉਮਰ ਵਿਚ 1965 ’ਚ ਉਨ੍ਹਾਂ ਨੇ ਭਾਰਤ ਤੋਂ ਅਮਰੀਕਾ ਦੀ ਯਾਤਰਾ ਕੀਤੀ ਸੀ। ਇਸ ਦੌਰਾਨ ਉਹ ਆਪਣੇ ਨਾਲ ਭਗਵਦ ਗੀਤਾ ਦੀਆਂ ਅਨਮੋਲ ਸਿੱਖਿਆਵਾਂ ਅਤੇ ਭਗਵਾਨ ਕ੍ਰਿਸ਼ਨ ਦਾ ਸੰਦੇਸ਼ ਲੈ ਕੇ ਗਏ ਸਨ। ਗੌਰਾ ਸ਼ਕਤੀ ਦਾਸ ਨੇ ਇਸ ਫ਼ਿਲਮ ਦੀ ਕਹਾਣੀ ਲਿਖਣ ਦੇ ਨਾਲ-ਨਾਲ ਇਸ ਦਾ ਨਿਰਦੇਸ਼ਨ ਵੀ ਕੀਤਾ ਹੈ। ਰਾਜੇਸ਼ ਸਿੰਘ ਅਤੇ ਲੋਹਿਤ ਰਾਓ ਇਸ ਦੇ ਨਿਰਮਾਤਾ ਹਨ, ਜਦ ਕਿ ਸ਼੍ਰੀਧਰ ਸ਼ਿਕਾਰੀਪੁਰਾ ਨੇ ਵਿਜ਼ੂਅਲ ਡਾਇਰੈਕਟਰ ਦੀ ਜ਼ਿੰਮੇਵਾਰੀ ਸੰਭਾਲੀ ਹੈ। ਇਹ ਫ਼ਿਲਮ ਟ੍ਰਾਂਸੇਂਡੈਂਟਲ ਫ਼ਿਲਮਜ਼ ਦੇ ਬੈਨਰ ਹੇਠ ਬਣਾਈ ਜਾ ਰਹੀ ਹੈ, ਜਿਸ ਵਿਚ ਡਾਈਵ ਡੀਪ ਏ.ਆਈ. ਸਟੂਡੀਓ ਦਾ ਸਹਿਯੋਗ ਹੈ।