ਸਲਮਾਨ ਖਾਨ ਦੀ ਫਿਲਮ 'ਬੈਟਲ ਆਫ ਗਲਵਾਨ' ਦੇ ਟੀਜ਼ਰ ਨੇ ਉਡਾਈ ਚੀਨ ਦੀ ਨੀਂਦ

ਮੁੰਬਈ : ਬਾਲੀਵੁੱਡ ਦੇ 'ਭਾਈਜਾਨ' ਸਲਮਾਨ ਖਾਨ ਇਨ੍ਹੀਂ ਦਿਨੀਂ ਆਪਣੀ ਆਉਣ ਵਾਲੀ ਫਿਲਮ 'ਬੈਟਲ ਆਫ ਗਲਵਾਨ' ਨੂੰ ਲੈ ਕੇ ਸੁਰਖੀਆਂ ਵਿੱਚ ਹਨ। ਹਾਲ ਹੀ ਵਿੱਚ ਰਿਲੀਜ਼ ਹੋਏ ਫਿਲਮ ਦੇ ਟੀਜ਼ਰ ਨੇ ਜਿੱਥੇ ਭਾਰਤ ਵਿੱਚ ਪ੍ਰਸ਼ੰਸਕਾਂ ਦਾ ਦਿਲ ਜਿੱਤ ਲਿਆ ਹੈ, ਉੱਥੇ ਹੀ ਇਸ ਨੇ ਗੁਆਂਢੀ ਮੁਲਕ ਚੀਨ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਚੀਨ ਦੇ ਸਰਕਾਰੀ ਮੀਡੀਆ ਅਤੇ ਮਾਹਿਰਾਂ ਨੇ ਫਿਲਮ ਦੇ ਤੱਥਾਂ 'ਤੇ ਸਵਾਲ ਚੁੱਕਦਿਆਂ ਆਪਣੀ ਬੌਖਲਾਹਟ ਜ਼ਾਹਿਰ ਕੀਤੀ ਹੈ।

ਚੀਨ ਨੇ ਫਿਲਮ ਨੂੰ ਦੱਸਿਆ 'ਓਵਰ ਡਰਾਮੈਟਿਕ'
ਚੀਨੀ ਮੀਡੀਆ 'ਗਲੋਬਲ ਟਾਈਮਜ਼' ਦੇ ਹਵਾਲੇ ਨਾਲ ਉੱਥੋਂ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਭਾਰਤੀ ਫਿਲਮਾਂ ਇਤਿਹਾਸ ਨੂੰ ਨਹੀਂ ਬਦਲ ਸਕਦੀਆਂ। ਚੀਨੀ ਮਾਹਿਰਾਂ ਅਨੁਸਾਰ ਬਾਲੀਵੁੱਡ ਫਿਲਮਾਂ ਅਕਸਰ ਭਾਵਨਾਵਾਂ ਅਤੇ ਮਨੋਰੰਜਨ 'ਤੇ ਆਧਾਰਿਤ ਹੁੰਦੀਆਂ ਹਨ, ਪਰ ਕੋਈ ਵੀ 'ਅਤਿ-ਉਤਸ਼ਾਹੀ ਡਰਾਮਾ' ਚੀਨੀ ਫੌਜ ਦੇ ਆਪਣੇ ਇਲਾਕੇ ਦੀ ਰੱਖਿਆ ਕਰਨ ਦੇ ਇਰਾਦੇ ਨੂੰ ਕਮਜ਼ੋਰ ਨਹੀਂ ਕਰ ਸਕਦਾ। ਕੁਝ ਚੀਨੀ ਯੂਜ਼ਰਸ ਨੇ ਤਾਂ ਇਸ ਫਿਲਮ ਨੂੰ ਤੱਥਾਂ ਤੋਂ ਬਿਲਕੁਲ ਉਲਟ ਅਤੇ 'ਓਵਰ ਡਰਾਮੈਟਿਕ' ਕਰਾਰ ਦਿੱਤਾ ਹੈ।

ਗਲਵਾਨ ਝੜਪ ਦਾ ਕੌੜਾ ਸੱਚ
ਜ਼ਿਕਰਯੋਗ ਹੈ ਕਿ 15-16 ਜੂਨ 2020 ਦੀ ਰਾਤ ਨੂੰ ਗਲਵਾਨ ਘਾਟੀ ਵਿੱਚ ਹੋਈ ਹਿੰਸਕ ਝੜਪ ਦੌਰਾਨ ਭਾਰਤ ਦੇ 20 ਜਵਾਨ ਸ਼ਹੀਦ ਹੋਏ ਸਨ। ਦੂਜੇ ਪਾਸੇ ਇੱਕ ਆਸਟ੍ਰੇਲੀਆਈ ਅਖਬਾਰ ਦੀ ਰਿਪੋਰਟ ਅਨੁਸਾਰ ਇਸ ਝੜਪ ਵਿੱਚ ਚੀਨ ਦੇ 38 ਸੈਨਿਕ ਮਾਰੇ ਗਏ ਸਨ, ਹਾਲਾਂਕਿ ਚੀਨ ਨੇ ਕਦੇ ਵੀ ਅਧਿਕਾਰਤ ਤੌਰ 'ਤੇ ਇਸ ਦੀ ਪੁਸ਼ਟੀ ਨਹੀਂ ਕੀਤੀ। ਚੀਨ ਅਜੇ ਵੀ ਦਾਵਾ ਕਰਦਾ ਹੈ ਕਿ ਭਾਰਤੀ ਸੈਨਿਕਾਂ ਨੇ ਸਮਝੌਤੇ ਦੀ ਉਲੰਘਣਾ ਕਰਕੇ ਐਲ.ਏ.ਸੀ. (LAC) ਪਾਰ ਕੀਤੀ ਸੀ।

ਰਿਲੀਜ਼ ਡੇਟ ਵਿੱਚ ਹੋਇਆ ਬਦਲਾਅ
ਸਲਮਾਨ ਖਾਨ ਦੀ ਇਹ ਫਿਲਮ ਪਹਿਲਾਂ 17 ਮਾਰਚ 2026 ਨੂੰ ਈਦ ਦੇ ਮੌਕੇ 'ਤੇ ਰਿਲੀਜ਼ ਹੋਣੀ ਸੀ। ਪਰ 'ਟੌਕਸਿਕ' ਅਤੇ 'ਧੁਰੰਧਰ 2' ਵਰਗੀਆਂ ਵੱਡੀਆਂ ਫਿਲਮਾਂ ਨਾਲ ਹੋਣ ਵਾਲੇ ਟਕਰਾਅ ਤੋਂ ਬਚਣ ਲਈ ਹੁਣ ਇਸ ਦੀ ਰਿਲੀਜ਼ ਡੇਟ ਵਧਾ ਕੇ 17 ਅਪ੍ਰੈਲ 2026 ਕਰ ਦਿੱਤੀ ਗਈ ਹੈ। ਇਸ ਫਿਲਮ ਦਾ ਨਿਰਦੇਸ਼ਨ ਅਪੂਰਵ ਲਾਖੀਆ ਕਰ ਰਹੇ ਹਨ।