14 ਫਰਵਰੀ ਨੂੰ ਮਨਾਏ ਜਾਣ ਵਾਲੇ ਵੈਲੇਨਟਾਈਨ ਡੇਅ ਨੂੰ ਲੈ ਕੇ ਜਿੱਥੇ ਇਕ ਪਾਸੇ ਪ੍ਰੇਮੀ ਜੋੜਿਆਂ 'ਚ ਭਾਰੀ ਉਤਸ਼ਾਹ ਹੈ, ਉੱਥੇ ਹੀ ਦੂਜੇ ਪਾਸੇ ਕਈ ਸੰਗਠਨਾਂ ਵੱਲੋਂ ਇਸ ਦਾ ਸਖ਼ਤ ਵਿਰੋਧ ਕੀਤਾ ਜਾ ਰਿਹਾ ਹੈ। ਸੋਸ਼ਲ ਮੀਡੀਆ 'ਤੇ ਇਸ ਵਿਰੋਧ ਨਾਲ ਜੁੜੇ ਕਈ ਵੀਡੀਓ ਅਤੇ ਪੋਸਟਰ ਤੇਜ਼ੀ ਨਾਲ ਵਾਇਰਲ ਹੋ ਰਹੇ ਹਨ।
ਪਟਨਾ 'ਚ ਲੱਗੇ ਵਿਵਾਦਿਤ ਪੋਸਟਰ
ਮੀਡੀਆ ਰਿਪੋਰਟਾਂ ਅਨੁਸਾਰ, ਬਿਹਾਰ ਦੀ ਰਾਜਧਾਨੀ ਪਟਨਾ 'ਚ 'ਹਿੰਦੂ ਸ਼ਿਵਭਵਾਨੀ ਸੈਨਾ' ਵੱਲੋਂ ਚਿਤਾਵਨੀ ਭਰੇ ਪੋਸਟਰ ਲਗਾਏ ਗਏ ਹਨ। ਇਨ੍ਹਾਂ ਪੋਸਟਰਾਂ 'ਤੇ ਲਿਖਿਆ ਗਿਆ ਹੈ, "ਜਿੱਥੇ ਮਿਲਣਗੇ ਬਾਬੂ-ਸ਼ੋਨਾ, ਤੋੜ ਦਿਆਂਗੇ ਕੋਨਾ-ਕੋਨਾ।'' ਸੰਗਠਨ ਦਾ ਕਹਿਣਾ ਹੈ ਕਿ ਵੈਲੇਨਟਾਈਨ ਡੇਅ ਭਾਰਤੀ ਸੰਸਕ੍ਰਿਤੀ ਦੇ ਵਿਰੁੱਧ ਹੈ ਅਤੇ ਇਸ ਨਾਲ ਸਮਾਜ 'ਚ ਅਸ਼ਲੀਲਤਾ ਵਧਦੀ ਹੈ। ਪੋਸਟਰਾਂ ਰਾਹੀਂ ਇਹ ਅਪੀਲ ਵੀ ਕੀਤੀ ਗਈ ਹੈ ਕਿ 14 ਫਰਵਰੀ ਨੂੰ 'ਬਾਬੂ-ਸ਼ੋਨਾ' ਕਰਨ ਦੀ ਬਜਾਏ ਪੁਲਵਾਮਾ ਦੇ ਸ਼ਹੀਦਾਂ ਨੂੰ ਨਮਨ ਕੀਤਾ ਜਾਵੇ।
ਮੱਧ ਪ੍ਰਦੇਸ਼ 'ਚ ਕੀਤੀ ਗਈ ਲਾਠੀ ਪੂਜਾ
ਮੱਧ ਪ੍ਰਦੇਸ਼ ਦੇ ਸਾਗਰ ਜ਼ਿਲ੍ਹੇ 'ਚ ਵੀ ਵੈਲੇਨਟਾਈਨ ਡੇਅ ਦਾ ਵਿਰੋਧ ਵੱਖਰੇ ਅੰਦਾਜ਼ 'ਚ ਦੇਖਣ ਨੂੰ ਮਿਲਿਆ। ਇੱਥੇ ਸ਼ਿਵ ਸੈਨਾ ਦੇ ਵਰਕਰਾਂ ਨੇ ਸਿਵਲ ਲਾਈਨ ਸਥਿਤ ਪਹਿਲਵਾਨ ਬਾਬਾ ਮੰਦਰ 'ਚ ਇਕੱਠੇ ਹੋ ਕੇ ਵੈਦਿਕ ਮੰਤਰਾਂ ਦੇ ਉਚਾਰਨ ਨਾਲ ਲਾਠੀਆਂ ਦੀ ਪੂਜਾ ਕੀਤੀ। ਉਨ੍ਹਾਂ ਨੇ ਲਾਠੀਆਂ 'ਤੇ ਤੇਲ ਚੜ੍ਹਾਇਆ ਅਤੇ ਇਸ ਨੂੰ 'ਸੱਭਿਆਚਾਰ ਦੀ ਰੱਖਿਆ' ਦਾ ਪ੍ਰਤੀਕ ਦੱਸਿਆ।
ਮੌਕੇ 'ਤੇ ਹੀ ਵਿਆਹ ਕਰਵਾਉਣ ਦੀ ਚਿਤਾਵਨੀ
ਸ਼ਿਵ ਸੈਨਾ ਦੇ ਆਗੂਆਂ ਨੇ ਸਖ਼ਤ ਲਹਿਜੇ 'ਚ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਕੋਈ ਜੋੜਾ ਜਨਤਕ ਥਾਵਾਂ 'ਤੇ ਇਤਰਾਜ਼ਯੋਗ ਹਾਲਤ 'ਚ ਪਾਇਆ ਗਿਆ, ਤਾਂ ਮੌਕੇ 'ਤੇ ਹੀ ਉਸ ਦਾ ਵਿਆਹ ਕਰਵਾ ਦਿੱਤਾ ਜਾਵੇਗਾ। ਉਨ੍ਹਾਂ ਦਾ ਦੋਸ਼ ਹੈ ਕਿ ਪੱਛਮੀ ਸੱਭਿਆਚਾਰ ਦੇ ਨਾਂ 'ਤੇ ਜਨਤਕ ਥਾਵਾਂ 'ਤੇ ਗਲਤ ਵਿਵਹਾਰ ਕੀਤਾ ਜਾਂਦਾ ਹੈ, ਜਿਸ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਸੋਸ਼ਲ ਮੀਡੀਆ 'ਤੇ ਇਸ ਵਾਰ ਕੁਝ ਨਵੇਂ ਨਾਅਰੇ ਵੀ ਵਾਇਰਲ ਹੋ ਰਹੇ ਹਨ, ਜਿਵੇਂ ਕਿ "ਜਿੱਥੇ ਮਿਲਣਗੇ ਬੰਟੀ-ਬਬਲੀ, ਤੋੜ ਦਿਆਂਗੇ ਹੱਡੀ-ਪਸਲੀ"। ਕੁੱਲ ਮਿਲਾ ਕੇ, 14 ਫਰਵਰੀ ਦਾ ਦਿਨ ਇਕ ਵਾਰ ਫਿਰ ਸਮਰਥਨ ਅਤੇ ਵਿਰੋਧ ਦੇ ਵਿਚਕਾਰ ਖੜ੍ਹਾ ਨਜ਼ਰ ਆ ਰਿਹਾ ਹੈ।