ਰੂਸ ਨੇ ਯੂਕ੍ਰੇਨ 'ਤੇ ਇੱਕ ਵਾਰ ਫਿਰ ਵੱਡਾ ਹਮਲਾ ਕੀਤਾ, ਜਿਸ ਵਿੱਚ 51 ਮਿਜ਼ਾਈਲਾਂ ਅਤੇ 653 ਡਰੋਨ ਦਾਗੇ ਗਏ। ਯੂਕ੍ਰੇਨ ਦੇ ਹਥਿਆਰਬੰਦ ਸੈਨਾ ਦਿਵਸ ਦੌਰਾਨ ਹੋਏ ਹਮਲੇ ਦੀ ਪੁਸ਼ਟੀ ਕਰਦੇ ਹੋਏ ਸਰਕਾਰੀ ਅਧਿਕਾਰੀਆਂ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਦੇਸ਼ ਭਰ ਵਿੱਚ ਵਿਆਪਕ ਤਬਾਹੀ ਅਤੇ ਕਈ ਇਲਾਕਿਆਂ 'ਚ ਲੋਕਾਂ ਦੇ ਜ਼ਖਮੀ ਹੋਣਦੀ ਜਾਣਕਾਰੀ ਮਿਲੀ ਹੈ। ਯੂਕ੍ਰੇਨੀ ਹਵਾਈ ਫ਼ੌਜ ਨੇ 30 ਮਿਜ਼ਾਈਲਾਂ ਅਤੇ 585 ਡਰੋਨਾਂ ਨੂੰ ਡੇਗਣ ਦਾ ਦਾਅਵਾ ਕੀਤਾ ਹੈ, ਪਰ 29 ਥਾਵਾਂ 'ਤੇ ਹਮਲਾ ਕੀਤਾ ਗਿਆ, ਜਿਨ੍ਹਾਂ ਵਿੱਚ ਊਰਜਾ ਬੁਨਿਆਦੀ ਢਾਂਚੇ ਨੂੰ ਮੁੱਖ ਤੌਰ 'ਤੇ ਨਿਸ਼ਾਨਾ ਬਣਾਇਆ ਗਿਆ। ਰਾਸ਼ਟਰੀ ਊਰਜਾ ਸੰਚਾਲਕ ਯੂਕਰੇਨੇਰਗੋ ਅਨੁਸਾਰ, ਹਮਲਿਆਂ ਵਿੱਚ ਮੁੱਖ ਤੌਰ 'ਤੇ ਬਿਜਲੀ ਪਲਾਂਟਾਂ ਅਤੇ ਊਰਜਾ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਸੀ, ਜਿਸਦਾ ਉਦੇਸ਼ ਸਰਦੀਆਂ ਦੀ ਸ਼ੁਰੂਆਤ 'ਤੇ ਯੂਕਰੇਨ ਦੇ ਬਿਜਲੀ ਸਿਸਟਮ ਨੂੰ ਅਸਥਿਰ ਕਰਨਾ ਸੀ। ਯੂਕਰੇਨ ਅਤੇ ਪੱਛਮੀ ਦੇਸ਼ਾਂ ਦਾ ਦੋਸ਼ ਹੈ ਕਿ ਰੂਸ ਪਿਛਲੇ ਚਾਰ ਸਾਲਾਂ ਤੋਂ ਗਰਮੀ, ਪਾਣੀ ਅਤੇ ਬਿਜਲੀ ਪ੍ਰਣਾਲੀਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਵਾਰ-ਵਾਰ ਸਰਦੀਆਂ ਨੂੰ ਹਥਿਆਰ ਵਜੋਂ ਵਰਤ ਰਿਹਾ ਹੈ।
ਜ਼ਾਪੋਰਿਝਜ਼ੀਆ ਪਰਮਾਣੂ ਪਲਾਂਟ 'ਤੇ ਵੱਡਾ ਹਮਲਾ
ਅੰਤਰਰਾਸ਼ਟਰੀ ਪਰਮਾਣੂ ਊਰਜਾ ਏਜੰਸੀ (IAEA) ਨੇ ਕਿਹਾ ਕਿ ਹਮਲੇ ਦੌਰਾਨ ਜ਼ਾਪੋਰਿਝਜ਼ੀਆ ਪਰਮਾਣੂ ਪਲਾਂਟ ਨੂੰ ਬਾਹਰੀ ਬਿਜਲੀ ਸਪਲਾਈ ਅਸਥਾਈ ਤੌਰ 'ਤੇ ਕੱਟ ਦਿੱਤੀ ਗਈ ਸੀ। ਹਾਲਾਂਕਿ ਪਲਾਂਟ ਦੇ ਰਿਐਕਟਰ ਬੰਦ ਹਨ, ਪਰ ਬਾਲਣ ਨੂੰ ਠੰਡਾ ਰੱਖਣ ਲਈ ਅਜੇ ਵੀ ਸਥਿਰ ਬਿਜਲੀ ਦੀ ਲੋੜ ਹੈ। ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਅਜਿਹੀ ਸਥਿਤੀ ਪ੍ਰਮਾਣੂ ਹਾਦਸੇ ਦਾ ਖ਼ਤਰਾ ਵਧਾਉਂਦੀ ਹੈ। ਪਲਾਂਟ ਅਜੇ ਵੀ ਰੂਸ ਦੇ ਨਿਯੰਤਰਣ ਵਿੱਚ ਹੈ।
ਦੇਸ਼ ਭਰ 'ਚ ਘੱਟੋ-ਘੱਟ 8 ਲੋਕ ਜ਼ਖਮੀ, ਕੀਵ 'ਚ 3
ਯੂਕਰੇਨੀ ਗ੍ਰਹਿ ਮੰਤਰੀ ਇਹੋਰ ਕਲਾਈਮੇਂਕੋ ਅਨੁਸਾਰ, ਦੇਸ਼ ਭਰ ਵਿੱਚ ਘੱਟੋ-ਘੱਟ 8 ਲੋਕ ਜ਼ਖਮੀ ਹੋਏ ਹਨ। ਕੀਵ ਖੇਤਰ ਵਿੱਚ ਤਿੰਨ ਜ਼ਖਮੀਆਂ ਦੀ ਪੁਸ਼ਟੀ ਹੋਈ ਹੈ। ਡਰੋਨ ਹਮਲਿਆਂ ਦਾ ਦਾਇਰਾ ਇੰਨਾ ਵਿਸ਼ਾਲ ਸੀ ਕਿ ਪੱਛਮੀ ਸਰਹੱਦ ਦੇ ਨੇੜੇ ਲਵੀਵ ਖੇਤਰ ਵਿੱਚ ਵੀ ਡਰੋਨ ਦੇਖੇ ਗਏ।
ਯੂਕ੍ਰੇਨ 'ਤੇ ਰੂਸ ਦਾ ਜਵਾਬੀ ਹਮਲਾ
ਰੂਸ ਨੇ ਦਾਅਵਾ ਕੀਤਾ ਕਿ ਉਸਨੇ ਯੂਕ੍ਰੇਨਨੀ ਡਰੋਨ ਡੇਗ ਦਿੱਤੇ। ਇਸ ਦੌਰਾਨ, ਯੂਕਰੇਨੀ ਫੌਜ ਨੇ ਕਿਹਾ ਕਿ ਉਸਨੇ ਰੂਸ ਦੀ ਰਿਆਜ਼ਾਨ ਤੇਲ ਰਿਫਾਇਨਰੀ 'ਤੇ ਹਮਲਾ ਕੀਤਾ। ਰੂਸੀ ਖੇਤਰੀ ਅਧਿਕਾਰੀਆਂ ਨੇ ਵੀ ਹਮਲੇ ਦੀ ਪੁਸ਼ਟੀ ਕੀਤੀ ਪਰ ਰਿਫਾਇਨਰੀ ਨੂੰ ਹੋਏ ਨੁਕਸਾਨ 'ਤੇ ਚੁੱਪ ਰਹੇ। ਦਰਅਸਲ, ਯੂਕਰੇਨ ਨੇ ਹਾਲ ਹੀ ਦੇ ਮਹੀਨਿਆਂ ਵਿੱਚ ਰੂਸੀ ਤੇਲ ਰਿਫਾਇਨਰੀਆਂ 'ਤੇ ਲੰਬੀ ਦੂਰੀ ਦੇ ਡਰੋਨ ਹਮਲੇ ਤੇਜ਼ ਕਰ ਦਿੱਤੇ ਹਨ, ਜਿਸਦਾ ਉਦੇਸ਼ ਰੂਸ ਦੇ ਤੇਲ ਮਾਲੀਏ ਨੂੰ ਨੁਕਸਾਨ ਪਹੁੰਚਾਉਣਾ ਹੈ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਹਮਲਿਆਂ ਦੇ ਵਿਚਕਾਰ, ਫਲੋਰੀਡਾ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਲਾਹਕਾਰਾਂ ਅਤੇ ਯੂਕਰੇਨੀ ਪ੍ਰਤੀਨਿਧੀਆਂ ਵਿਚਕਾਰ ਗੱਲਬਾਤ ਚੱਲ ਰਹੀ ਹੈ। ਇਹ ਗੱਲਬਾਤ ਯੁੱਧ ਤੋਂ ਬਾਅਦ ਦੇ ਸੁਰੱਖਿਆ ਢਾਂਚੇ 'ਤੇ ਇੱਕ ਸੰਭਾਵੀ ਸਮਝੌਤੇ 'ਤੇ ਕੇਂਦ੍ਰਿਤ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੇਨਸਕੀ ਨੇ ਕਿਹਾ ਕਿ ਦੇਸ਼ ਅਸਲ ਸ਼ਾਂਤੀ ਪ੍ਰਾਪਤ ਕਰਨ ਲਈ ਵਚਨਬੱਧ ਹੈ। ਹਾਲਾਂਕਿ, ਦੋਵਾਂ ਧਿਰਾਂ ਨੇ ਸਵੀਕਾਰ ਕੀਤਾ ਕਿ ਕਿਸੇ ਵੀ ਹੱਲ ਦੀ ਸਫਲਤਾ ਰੂਸ ਦੀ ਲੰਬੇ ਸਮੇਂ ਦੀ ਸ਼ਾਂਤੀ ਪ੍ਰਤੀ ਗੰਭੀਰ ਵਚਨਬੱਧਤਾ 'ਤੇ ਨਿਰਭਰ ਕਰੇਗੀ। ਇਸ ਦੌਰਾਨ, ਯੂਕੇ, ਫਰਾਂਸ ਅਤੇ ਜਰਮਨੀ ਦੇ ਨੇਤਾ ਸੋਮਵਾਰ ਨੂੰ ਲੰਡਨ ਵਿੱਚ ਜ਼ੈਲੇਂਸਕੀ ਨਾਲ ਮੁਲਾਕਾਤ ਕਰਨਗੇ। ਇਹ ਮੀਟਿੰਗ ਟਕਰਾਅ ਦੇ ਸੰਭਾਵੀ ਹੱਲਾਂ ਅਤੇ ਸੁਰੱਖਿਆ ਢਾਂਚੇ 'ਤੇ ਕੇਂਦਰਿਤ ਹੋਵੇਗੀ।