ਨਵੀਂ ਦਿੱਲੀ : ਰੇਲ ਮੰਤਰੀ ਨੂੰ ਯੂਰਪ 'ਚ ਵੰਦੇ ਭਾਰਤ ਵਰਗੀ ਹੀ ਟਰੇਨ 'ਚ ਯਾਤਰਾ ਕਰਨ ਲਈ 20 ਗੁਣਾ ਕਿਰਾਏ ਦਾ ਭੁਗਤਾਨ ਕਰਨਾ ਪਿਆ। ਰੇਲ ਮੰਤਰੀ ਸ਼੍ਰੀ ਵੈਸ਼ਨਵ ਨੇ ਸ਼ੁੱਕਰਵਾਰ ਨੂੰ ਰਾਜ ਸਭਾ 'ਚ ਰੇਲ ਮੰਤਰਾਲਾ ਨਾਲ ਜੁੜੇ ਸਵਾਲਾਂ ਦਾ ਜਵਾਬ ਦਿੰਦੇ ਹੋਏ ਦੱਸਿਆ ਕਿ ਉਨ੍ਹਾਂ ਨੇ ਹਾਲ 'ਚ ਯੂਰਪ 'ਚ ਦਾਵੋਸ ਤੋਂ ਜਿਊਰਿਖ ਸਟੇਸ਼ਨ ਤੱਕ (ਦੋਵੇਂ ਸਵਿਟਜ਼ਰਲੈਂਡ 'ਚ) ਰੇਲ ਰਾਹੀਂ ਯਾਤਰਾ ਕੀਤੀ। ਉਨ੍ਹਾਂ ਕਿਹਾ,''ਜਿਸ ਟਰੇਨ 'ਚ ਅਸੀਂ ਸਫ਼ਰ ਕੀਤਾ, ਉਹ ਸਾਡੀ ਵੰਦੇ ਭਾਰਤ ਟਰੇਨਾਂ ਵਰਗੀਆਂ ਹੀ ਸਨ, ਸਾਡੀ ਟਰੇਨ ਸਹੂਲਤ ਉੱਥੋਂ 21 ਹੀ ਹੋਵੇਗੀ ਪਰ ਉਸ ਦਾ ਕਿਰਾਇਆ ਸਾਡੇ ਇੱਥੇ ਦੀ ਤੁਲਨਾ 'ਚ 20 ਗੁਣਾ ਵੱਧ ਸੀ।''
ਉਨ੍ਹਾਂ ਕਿਹਾ ਕਿ ਭਾਰਤ 'ਚ ਰੇਲ ਕਿਰਾਇਆ ਗੁਆਂਢੀ ਪਾਕਿਸਤਾਨ ਅਤੇ ਬੰਗਲਾਦੇਸ਼ ਦੀ ਤੁਲਨਾ 'ਚ ਤਾਂ ਹੋਰ ਵੀ ਘੱਟ ਹੈ, ਜਦੋਂ ਕਿ ਸਾਡੀ ਸਹੂਲਤ ਅਤੇ ਗੁਆਂਢੀ ਦੇਸ਼ਾਂ ਦੀਆਂ ਟਰੇਨਾਂ ਦੀ ਤੁਲਨਾ 'ਚ ਕਾਫ਼ੀ ਚੰਗੀ ਹੈ। ਸ਼੍ਰੀ ਵੈਸ਼ਨਵ ਪਿਛਲੇ ਮਹੀਨੇ ਦਾਵੋਸ ਤੋਂ ਵਰਲਡ ਇਕੋਨਾਮਿਕ ਫੋਰਮ (ਡਬਲਿਊਈਐੱਫ) ਦੀ ਸਾਲਾਨਾ ਬੈਠਕ 'ਚ ਹਿੱਸਾ ਲੈਣ ਲਈ ਉੱਥੇ ਗਏ ਹੋਏ ਸਨ।