ਯੂਕ੍ਰੇਨ ਤੇ ਰੂਸ ਵਿਚਾਲੇ ਪਿਛਲੇ ਲੰਬੇ ਸਮੇਂ ਤੋਂ ਚੱਲਦੀ ਆ ਰਹੀ ਜੰਗ ਰੁਕਣ ਦਾ ਨਾਂ ਨਹੀਂ ਲੈ ਰਹੀ। ਇਸੇ ਦੌਰਾਨ ਇਕ ਹੋਰ ਵੱਡੀ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਯੂਕ੍ਰੇਨ ਨੇ ਰੂਸ ਦੇ ਅੰਦਰ ਇੱਕ ਉਦਯੋਗਿਕ ਪਲਾਂਟ 'ਤੇ ਲੰਬੀ ਦੂਰੀ ਦੇ ਡਰੋਨਾਂ ਨਾਲ ਹਮਲਾ ਕੀਤਾ।
ਇਸ ਦੌਰਾਨ, ਪੂਰਬੀ ਡੋਨੇਟਸਕ ਖੇਤਰ ਦੇ ਇੱਕ ਪ੍ਰਮੁੱਖ ਸ਼ਹਿਰ ਪੋਕਰੋਵਸਕ 'ਤੇ ਰੂਸੀ ਹਮਲੇ ਨੂੰ ਰੋਕਣ ਲਈ ਯੂਕ੍ਰੇਨੀ ਫੌਜਾਂ ਜ਼ੋਰਦਾਰ ਲੜਾਈ ਲੜ ਰਹੀਆਂ ਹਨ। ਖੇਤਰੀ ਗਵਰਨਰ ਰੈਡੀ ਹਬੀਰੋਵ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਦੋ ਡਰੋਨਾਂ ਨੇ ਰੂਸ ਦੇ ਬਾਸ਼ਕੋਰਤੋਸਤਾਨ ਖੇਤਰ ਦੇ ਸਟਰਲਿਟਾਮਕ ਸ਼ਹਿਰ ਵਿੱਚ ਇੱਕ ਉਦਯੋਗਿਕ ਸਹੂਲਤ ਨੂੰ ਨਿਸ਼ਾਨਾ ਬਣਾਇਆ, ਹਾਲਾਂਕਿ ਉਨ੍ਹਾਂ ਨੇ ਫੈਸਿਲਟੀ ਦਾ ਨਾਂ ਨਹੀਂ ਦੱਸਿਆ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਦੋਵੇਂ ਡਰੋਨਾਂ ਨੂੰ ਨਾਕਾਮ ਕਰ ਦਿੱਤਾ ਗਿਆ ਹੈ।
ਹਬੀਰੋਵ ਨੇ ਬਿਆਨ ਵਿੱਚ ਕਿਹਾ ਕਿ ਇਸ ਡਰੋਨ ਹਮਲੇ 'ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਅਤੇ ਫੈਸਿਲਟੀ 'ਤੇ ਆਮ ਕੰਮ ਜਾਰੀ ਰਿਹਾ। ਇਸ ਦੌਰਾਨ ਸ਼ਹਿਰ ਦੇ ਪ੍ਰਸ਼ਾਸਨ ਨੇ ਦੱਸਿਆ ਕਿ ਸਟਰਲਿਟਾਮਕ ਪੈਟਰੋ ਕੈਮੀਕਲ ਪਲਾਂਟ ਵਿੱਚ ਇੱਕ ਧਮਾਕੇ ਨੇ ਇੱਕ ਵਾਟਰ ਪਿਉਰੀਫਿਕੇਸ਼ਨ ਯੂਨਿਟ ਨੂੰ ਅੰਸ਼ਕ ਤੌਰ 'ਤੇ ਤਬਾਹ ਕਰ ਦਿੱਤਾ। ਪਲਾਂਟ ਰਬੜ ਅਤੇ ਹਵਾਬਾਜ਼ੀ ਬਾਲਣ ਪੈਦਾ ਕਰਦਾ ਹੈ।
ਰੂਸੀ ਮੀਡੀਆ ਦੇ ਅਨੁਸਾਰ ਯੂਕ੍ਰੇਨ ਤੋਂ ਲਗਭਗ 800 ਕਿਲੋਮੀਟਰ (500 ਮੀਲ) ਦੂਰ ਨਿਜ਼ਨੀ ਨੋਵਗੋਰੋਡ ਖੇਤਰ ਦੇ ਇੱਕ ਉਦਯੋਗਿਕ ਖੇਤਰ ਵਿੱਚ ਵੀ ਧਮਾਕੇ ਸੁਣੇ ਗਏ, ਜਿੱਥੇ ਇੱਕ ਤੇਲ ਰਿਫਾਇਨਰੀ ਅਤੇ ਇੱਕ ਪੈਟਰੋ ਕੈਮੀਕਲ ਪਲਾਂਟ ਸਥਿਤ ਹੈ। ਰੂਸੀ ਰੱਖਿਆ ਮੰਤਰਾਲੇ ਨੇ ਮੰਗਲਵਾਰ ਨੂੰ ਕਿਹਾ ਕਿ ਯੂਕ੍ਰੇਨੀ ਡਰੋਨਾਂ ਨੂੰ ਬਾਸ਼ਕੋਰਤੋਸਤਾਨ ਅਤੇ ਨਿਜ਼ਨੀ ਨੋਵਗੋਰੋਡ ਵਿੱਚ ਮਾਰ ਸੁੱਟਿਆ ਗਿਆ।
ਮੰਤਰਾਲੇ ਨੇ ਇਹ ਵੀ ਦਾਅਵਾ ਕੀਤਾ ਕਿ ਰਾਤੋ-ਰਾਤ 85 ਡਰੋਨਾਂ ਨੂੰ ਰੋਕਿਆ ਗਿਆ। ਯੂਕ੍ਰੇਨੀ ਅਧਿਕਾਰੀਆਂ ਨੇ ਕਿਹਾ ਕਿ ਰੂਸ ਨੇ ਯੂਕ੍ਰੇਨ ਦੇ ਦੱਖਣ-ਪੂਰਬੀ ਡਨੀਪ੍ਰੋਪੇਟ੍ਰੋਵਸਕ ਖੇਤਰ ਵਿੱਚ ਰਾਤੋ-ਰਾਤ ਡਰੋਨ ਅਤੇ ਮਿਜ਼ਾਈਲ ਹਮਲੇ ਕੀਤੇ, ਨਾਲ ਹੀ ਤੋਪਖਾਨੇ ਦੀ ਬੰਬਾਰੀ ਕੀਤੀ, ਜਿਸ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਦੋ ਬੱਚਿਆਂ ਸਮੇਤ 11 ਹੋਰ ਜ਼ਖਮੀ ਹੋ ਗਏ।
ਯੂਕ੍ਰੇਨੀ ਹਵਾਈ ਸੈਨਾ ਨੇ ਕਿਹਾ ਕਿ ਰੂਸ ਨੇ ਰਾਤ ਨੂੰ ਯੂਕ੍ਰੇਨ 'ਤੇ ਕਈ ਤਰ੍ਹਾਂ ਦੀਆਂ ਮਿਜ਼ਾਈਲਾਂ ਅਤੇ ਸਿਮੂਲੇਟਡ ਡਰੋਨ ਦਾਗੇ। ਇਸ ਤੋਂ ਇਲਾਵਾ, ਰੋਮਾਨੀਆ ਦੇ ਰੱਖਿਆ ਮੰਤਰਾਲੇ ਨੇ ਮੰਗਲਵਾਰ ਨੂੰ ਕਿਹਾ ਕਿ ਰੂਸ ਨੇ ਆਪਣੀ ਸਰਹੱਦ ਦੇ ਨੇੜੇ ਯੂਕ੍ਰੇਨ ਦੇ ਡੈਨਿਊਬ ਬੰਦਰਗਾਹ ਦੇ ਬੁਨਿਆਦੀ ਢਾਂਚੇ 'ਤੇ ਰਾਤੋ-ਰਾਤ ਦੋ ਹਮਲੇ ਕੀਤੇ।