ਰਾਸ਼ਟਰੀ ਸਵੈਮ ਸੇਵਕ ਸੰਘ (RSS) ਦੇ 100 ਸਾਲ ਪੂਰੇ ਹੋਣ ਦੇ ਮੌਕੇ 'ਤੇ ਮੁੰਬਈ ਵਿੱਚ ਆਯੋਜਿਤ 'ਨਵੇਂ ਸਿਖਰ' (New Horizons) ਪ੍ਰੋਗਰਾਮ ਦੌਰਾਨ ਸੰਘ ਮੁਖੀ ਮੋਹਨ ਭਾਗਵਤ ਨੇ ਇੱਕ ਅਹਿਮ ਸੰਬੋਧਨ ਕੀਤਾ। ਉਨ੍ਹਾਂ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਆਰ. ਐੱਸ. ਐੱਸ. ਕਿਸੇ ਵੀ ਸੰਗਠਨ ਜਾਂ ਵਿਅਕਤੀ ਦੇ ਖ਼ਿਲਾਫ਼ ਨਹੀਂ ਹੈ ਅਤੇ ਸੰਘ ਦਾ ਕੰਮ ਕਿਸੇ ਪ੍ਰਤੀਯੋਗਤਾ ਜਾਂ ਵਿਰੋਧ ਲਈ ਨਹੀਂ, ਸਗੋਂ ਪੂਰੇ ਦੇਸ਼ ਦੇ ਹਿੱਤ ਅਤੇ ਰਾਸ਼ਟਰ ਨਿਰਮਾਣ ਲਈ ਹੈ। ਸੰਘ ਮੁਖੀ ਨੇ ਕਾਂਗਰਸ ਦੀ ਸਥਾਪਨਾ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਅੰਗਰੇਜ਼ਾਂ ਨੇ ਕਾਂਗਰਸ ਦੀ ਸਥਾਪਨਾ ਇੱਕ 'ਸੇਫਟੀ ਵਾਲਵ' (Safety Valve) ਦੇ ਰੂਪ ਵਿੱਚ ਕੀਤੀ ਸੀ।
ਹਾਲਾਂਕਿ, ਬਾਅਦ ਵਿੱਚ ਭਾਰਤੀਆਂ ਨੇ ਇਸ ਨੂੰ ਆਜ਼ਾਦੀ ਦੀ ਲੜਾਈ ਦੇ ਇੱਕ ਸ਼ਕਤੀਸ਼ਾਲੀ ਸਾਧਨ ਵਿੱਚ ਬਦਲ ਦਿੱਤਾ। ਉਨ੍ਹਾਂ ਅੱਗੇ ਕਿਹਾ ਕਿ ਸੰਘ ਦੀ ਸਥਾਪਨਾ ਕਿਸੇ ਖ਼ਾਸ ਸਥਿਤੀ ਦੀ ਪ੍ਰਤੀਕਿਰਿਆ ਵਜੋਂ ਨਹੀਂ ਹੋਈ ਸੀ ਅਤੇ ਨਾ ਹੀ ਇਹ ਸੱਤਾ ਜਾਂ ਲੋਕਪ੍ਰਿਯਤਾ ਦੀ ਇੱਛਾ ਰੱਖਦਾ ਹੈ।
ਸੰਘ ਕੋਈ ਅਰਧ-ਸੈਨਿਕ ਸੰਗਠਨ ਨਹੀਂ
ਮੋਹਨ ਭਾਗਵਤ ਨੇ ਕਿਹਾ ਕਿ ਬਹੁਤ ਸਾਰੇ ਲੋਕ ਸੰਘ ਨੂੰ ਬਾਹਰੋਂ ਦੇਖ ਕੇ ਗਲਤਫਹਿਮੀਆਂ ਪਾਲ ਲੈਂਦੇ ਹਨ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਭਾਵੇਂ ਸਵੈਮ ਸੇਵਕ ਲਾਠੀ ਚਲਾਉਣਾ ਸਿੱਖਦੇ ਹਨ, ਪਰ ਸੰਘ ਕੋਈ ਅਰਧ-ਸੈਨਿਕ ਸੰਗਠਨ ਨਹੀਂ ਹੈ ਅਤੇ ਨਾ ਹੀ ਇਹ ਦੇਸ਼ ਵਿਆਪੀ ਕੁਸ਼ਤੀ ਦਾ ਅਖਾੜਾ ਹੈ। ਉਨ੍ਹਾਂ ਅਨੁਸਾਰ ਸੰਘ ਦਾ ਕੰਮ ਇੰਨਾ ਵਿਲੱਖਣ ਹੈ ਕਿ ਪੰਜਾਂ ਮਹਾਂਦੀਪਾਂ ਤੋਂ ਲੋਕ ਇਸ ਦੀਆਂ ਗਤੀਵਿਧੀਆਂ ਦਾ ਅਧਿਐਨ ਕਰਨ ਲਈ ਭਾਰਤ ਆਉਂਦੇ ਹਨ।
ਬਾਲੀਵੁੱਡ ਅਤੇ ਉਦਯੋਗ ਜਗਤ ਦੀਆਂ ਹਸਤੀਆਂ ਨੇ ਭਰੀ ਹਾਜ਼ਰੀ
ਇਸ ਪ੍ਰੋਗਰਾਮ ਵਿੱਚ ਦੇਸ਼ ਦੀਆਂ ਕਈ ਮੰਨੀਆਂ-ਪ੍ਰਮੰਨੀਆਂ ਹਸਤੀਆਂ ਸ਼ਾਮਲ ਹੋਈਆਂ। ਫ਼ਿਲਮੀ ਜਗਤ ਤੋਂ ਸਲਮਾਨ ਖਾਨ, ਹੇਮਾ ਮਾਲਿਨੀ, ਬੋਨੀ ਕਪੂਰ, ਅਤੇ ਅਦਨਾਨ ਸਾਮੀ ਵਰਗੇ ਸਿਤਾਰੇ ਪਹੁੰਚੇ। ਇਸ ਤੋਂ ਇਲਾਵਾ ਉਦਯੋਗਪਤੀ ਅਜੈ ਪੀਰਾਮਲ, ਦੀਪਕ ਪਾਰੇਖ, ਰਾਧਾਕ੍ਰਿਸ਼ਨ ਦਮਾਨੀ ਅਤੇ ਸੱਜਣ ਜਿੰਦਲ ਵਰਗੇ ਦਿੱਗਜ ਵੀ ਇਸ ਸਮਾਗਮ ਦਾ ਹਿੱਸਾ ਬਣੇ।