ਢਾਕਾ : ਮੁਸ਼ਫਿਕੁਰ ਰਹੀਮ ਟੈਸਟ ਕ੍ਰਿਕਟ ’ਚ 7000 ਦੌੜਾਂ ਬਣਾਉਣ ਵਾਲਾ ਬੰਗਲਾਦੇਸ਼ ਦਾ ਪਹਿਲਾ ਬੱਲੇਬਾਜ਼ ਬਣ ਗਿਆ ਹੈ। ਉਸ ਨੇ ਵੈਸਟਇੰਡੀਜ਼ ਵਿਰੁੱਧ ਸਿਲਹਟ ’ਚ ਚੱਲ ਰਹੇ ਟੈਸਟ ਮੈਚ ਦੇ ਆਖਰੀ ਦਿਨ ਇਹ ਉਪਲਬਧੀ ਹਾਸਲ ਕੀਤੀ। ਲੰਚ ਤੋਂ ਠੀਕ ਬਾਅਦ, ਉਸ ਨੇ ਰੋਸਟਨ ਚੇਜ਼ ਦੀ ਗੇਂਦ ’ਤੇ 1 ਦੌੜ ਲੈ ਕੇ ਇਸ ਮੁਕਾਮ ਨੂੰ ਛੂਹਿਆ।
ਅਜਿਹਾ ਲੱਗਿਆ ਕਿ ਉਸ ਨੂੰ ਇਸ ਉਪਲਬਧੀ ਦਾ ਪਤਾ ਹੀ ਨਹੀਂ ਲੱਗਿਆ। ਉਸ ਨੂੰ ਇਸ ਦਾ ਅਹਿਸਾਸ ਉਦੋਂ ਹੋਇਆ ਜਦੋਂ ਡ੍ਰੈਸਿੰਗ ਰੂਮ ’ਚ ਉਸ ਦੇ ਸਾਥੀ ਖਿਡਾਰੀ ਖੜ੍ਹੇ ਹੋ ਕੇ ਉਸ ਲਈ ਤਾਲੀਆਂ ਵਜਾਉਣ ਲੱਗੇ।
ਮੁਸ਼ਫਿਕੁਰ, ਜਿਹੜਾ ਉਂਗਲ ’ਚ ਸੱਟ ਲੱਗਣ ਦੇ ਕਾਰਨ ਇਸ ਲੜੀ ਦਾ ਪਹਿਲਾ ਟੈਸਟ ਨਹੀਂ ਖੇਡ ਸਕਿਆ ਸੀ, ਟੈਸਟ ਕ੍ਰਿਕਟ ’ਚ 5000 ਤੇ 6000 ਦੌੜਾਂ ਤੱਕ ਪਹੁੰਚਣ ਵਾਲਾ ਵੀ ਬੰਗਲਾਦੇਸ਼ ਦਾ ਪਹਿਲਾ ਬੱਲੇਬਾਜ਼ ਸੀ। ਉਸ ਨੇ ਕ੍ਰਮਵਾਰ 2022 ਤੇ 2024 ’ਚ ਇਹ ਮੁਕਾਮ ਹਾਸਲ ਕੀਤੇ ਸਨ। ਟੈਸਟ ਕ੍ਰਿਕਟ ’ਚ ਬੰਗਲਾਦੇਸ਼ ਲਈ ਸਭ ਤੋਂ ਜ਼ਿਆਦਾ ਦੌੜਾਂ ਬਣਾਉਣ ਵਾਲਿਆਂ ਦੀ ਸੂਚੀ ’ਚ ਮੁਸ਼ਫਿਕੁਰ ਤੋਂ ਬਾਅਦ ਮੋਮਿਨੁਲ ਹੱਕ ਦੂਜੇ ਤੇ ਸੰਨਿਆਸ ਲੈ ਚੁੱਕਾ ਤਮੀਮ ਇਕਬਾਲ ਤੀਜੇ ਨੰਬਰ ’ਤੇ ਹੈ। ਹਾਲਾਂਕਿ, ਮੋਮਿਨੁਲ 5293 ਦੌੜਾਂ ਦੇ ਨਾਲ ਮੁਸ਼ਫਿਕੁਰ ਤੋਂ ਲੱਗਭਗ 2000 ਦੌੜਾਂ ਪਿੱਛੇ ਹੈ।
ਬੰਗਲਾਦੇਸ਼ ਲਈ ਸਭ ਤੋਂ ਜ਼ਿਆਦਾ ਸੈਂਕੜੇ ਲਾਉਣ ਵਾਲਿਆਂ ਦੀ ਸੂਚੀ ’ਚ ਵੀ ਮੋਮਿਨੁਲ ਤੇ ਤਮੀਮ, ਮੁਸ਼ਫਿਕੁਰ ਤੋਂ ਠੀਕ ਪਿੱਛੇ ਹਨ। ਮੁਸ਼ਫਿਕੁਰ ਦੇ ਨਾਂ 14 ਸੈਂਕੜੇ ਹਨ, ਜਿਸ ’ਚ ਉਸ ਦਾ ਸਰਵੋਤਮ ਸਕੋਰ ਅਜੇਤੂ 219 ਦੌੜਾਂ ਹੈ। ਇਹ ਟੈਸਟ ਕ੍ਰਿਕਟ ’ਚ ਕਿਸੇ ਬੰਗਲਾਦੇਸ਼ੀ ਬੱਲੇਬਾਜ਼ ਦਾ ਸਭ ਤੋਂ ਵੱਡਾ ਨਿੱਜੀ ਸਕੋਰ ਸੀ, ਜਿਸ ਨੂੰ ਹਾਲ ਹੀ ’ਚ ਸਿਲਹਟ ਟੈਸਟ ’ਚ ਤੌਹੀਦ ਹ੍ਰਿਦੋਏ ਨੇ ਅਜੇਤੂ 242 ਦੌੜਾਂ ਬਣਾ ਕੇ ਪਿੱਛੇ ਛੱਡ ਦਿੱਤਾ। ਮੋਮਿਨੁਲ ਤੇ ਤਮੀਮ ਦੇ ਨਾਂ ਕ੍ਰਮਵਾਰ 13 ਤੇ 10 ਸੈਂਕੜੇ ਹਨ।